Ақтөбе тұрғыны әжесінің атына 600 мың теңге заңсыз несие рәсімдеген
Fqsgnfkeis 5 жыл 6 айға бас бостандығынан айыру жазасына кесілді.
Ақтөбе тұрғыны жасырын түрде әжесінің атына 600 мың теңге көлемінде бірнеше несие рәсімдеп, 5,5 жылға бас бостандығынан айырылды, деп хабарлады turkystan.kz.
Іс материалдарынан 18 жастағы ақтөбелік әжесін алдап, оған несие рәсімдегені белгілі болды. Тергеушілердің айтуынша, ол түрлі сылтаулармен оның смартфонын алған.
nur.kz сайтының мәліметінше, күдікті банктің мобильді қосымшасы арқылы туысқанының атына онлайн несие рәсімдеп, алған қарызын өз шотына аударып, қажеттіліктеріне жұмсаған. Осылайша шамамен екі аптаның ішінде әжейдің атына 600 мың теңгеден астам несие рәсімделгені анықталды.
Сондай-ақ қарт әйелдің немересі оның жинақ шотына қол жеткізіп, жеке шотынан өзінің банктік шотына тұрақты түрде аз сомада ақша аударып отырған. Салдарынан қарияға тағы 51 мың теңгеге залал келтірілгені белгілі болды.
«Қарт әйел немересінің қылмысы жайлы оған берілген несие өтемінің кешіктірілгені туралы хабарлама келген соң ғана білген. Зейнеткер мән-жайды бірден түсінді, өйткені ол немересіне сенгендіктен телефонын тек оған берген», - делінген хабарламада.
Ақтөбе тұрғыны алаяқтық жасады деген айыппен күдікке ілінген. Банк жас жігіттің әжесінің атынан алған несиесін жойған жоқ, жәбірленуші банк алдындағы қарызын өзі төлеуді жалғастыруда. Оған қарамастан қарт әйел соттан немересін қатаң жазаламауды сұрап, оған қатысты ешқандай талап қоймаған.
Сонымен қатар айыпталушының қылмыстық ісінде тағы бір ұрлықпен байланысты дерек анықталды.
«Ол бұған дейін жасаған қылмысы үшін пробация қызметінің бақылауында екенін тіркеу мақсатында полиция бөлімшесіне келген. Сол кезде айыпталушы полиция ғимаратында ұйықтап жатқан адамның ұялы телефонын ұрлап үлгерген», - делінген хабарламада.
Ақтөбе қаласының №2 қылмыстық соты жас жігітті алаяқтық және ұрлық (Қылмыстық кодекстің 190 бабы 2-бөлігінің, 4-тармағы, 188 бабы 3-бөлігінің, 2-тармағы) жасағаны үшін кінәлі деп таныды. Сондай-ақ айыпталушыға бұрынғы қылмысы үшін өтелмеген жазасы тағайындалып, ол 5 жыл 6 айға бас бостандығынан айыру жазасына кесілді.
Үкім әлі заңды күшіне енген жоқ.
