Дағдарыс жағдайларында басқару орталығында Төтенше жағдайлар министрі Сырым Шәріпхановтың төрағалығымен республикалық жедел штабтың кезектен тыс отырысы өтті.
Отырысқа азаматтық қорғау қызметтері, жедел штабтың жеке құрамы және Төтенше жағдайлар министрлігінің аумақтық бөлімшелері қатысты.
Жергілікті атқарушы органдармен және Төтенше жағдайлар министрлігінің аумақтық бөлімшелерімен бейнеконференцбайланыс барысында Төтенше жағдайлар министрі "Қазселденқорғау" ММ, ІІМ, Қорғаныс министрлігі, жолдар мен көпірлер қызметі (Қазавтожол), химиялық қызмет, медициналық қызмет, көлік қызметі, байланыс қызметінің баяндамаларын тыңдады.
"Сейсмологиялық бақылаулар мен зерттеулердің ұлттық ғылыми орталығы" ЖШС сейсмикалық жағдайды бағалауына сәйкес, жақын арада Алматы болжамдық полигонының аумағында MSK-64K сейсмикалық шкаласы бойынша қарқындылығы 7 балдан асатын жер сілкінісі күтілмейді.
Айта кету керек, жедел штабтарда ұйымдастырылған жедел желі телефондарына азаматтардан 377 қоңырау келіп түсті.
Сонымен қатар "Қазселденқорғау" ММ ақпаратына сәйкес, Алматы қаласы, Алматы, Жамбыл, Түркістан және Жетісу облыстары бойынша барлық бекеттер бақылау мен деректерді берудің жеделдетілген режиміне көшірілді. Бекеттердің жалпы саны – 76. Жүргізілген зерттеу нәтижелері бойынша, жер сілкінісі селден қорғау құрылыстарына теріс әсер еткен жоқ. Су режимінде ешқандай өзгеріс жоқ. Сырғымалар мен көшкіндердің жүруі туралы ақпарат түскен жоқ.
Қазір, тексеру жұмыстары жалғасып жатыр. Сондай-ақ Қарулы Күштерінің күштері мен құралдары тұрақты орналасу пункттерінде.
Ал Көлік қызметі Алматы қаласының әуежайы штаттық режимде жұмыс істейтінін хабарлады. Қазіргі жағдайда кезекші ауысым күтпеген жағдайлар жоспарына сәйкес әрекет етті.
Сонымен қоса, қоғамдық тәртіпті сақтау қызметінің күштері мен құралдары қызмет атқарудың күшейтілген нұсқасына ауыстырылды.
Отырыс соңында, Төтенше жағдайлар министрі тиісті азаматтық қорғау қызметтеріне бірқатар тапсырмалар берді.