Еліміздің барлық өңірлерінде астық жинау науқаны аяқталуға жақын. Бұл туралы Үкімет отырысында Ауыл шаруашылығы министрі Айдарбек Сапаров айтты, деп хабарлады Turkystan.kz.
«Облыс әкімдіктерінің мәліметі бойынша, 16,9 млн гектар немесе 98,7% бидай орылды. Орташа өнімділік 9,7 ц/га. Бастапқы салмақта 16,4 млн тонна астық жиналды, оның ішінде 11,4 млн тонна бидай. Өнімділік - 8,6 ц/га», – деді Айдарбек Сапаров.
Министр дәнді дақылдар бойынша толық мәлімет берді.
«Дәнді дақылдарды жіктейтін болсақ, бидай оратын жер көлемі 13,4 млн га құрайды. 8,6 ц/га өнімділікпен 11,4 млн тонна астық бастырылды», – деді Ауыл шаруашылығы министрі.
Оның айтуынша, майлы дақылдарды жинау алаңы 1,9 млн гектарға немесе 68%-ға пара-пар болған. Орташа өнімділік 8,4 ц/га құрап, 1,6 млн тонна майлы дақыл жиналған.