СҚО-да 7 жігіт бірнеше рет мал ұрлады деген күдікке ілінді
Ұрланған малдың етін Петропавл қаласында сатқан
СҚО-да жеті жігіт бірнеше рет мал ұрлады деген күдікпен ұсталды, деп хабарлады turkystan.kz.
СҚО Есіл ауданы полиция бөлімінің қызметкерлері бірнеше мал ұрлығын жасады деген күдікпен облыстың 18 бен 22 жас аралығындағы жеті тұрғынына қатысты тергеу жүргізіп жатыр.
Қылмыстар биылғы жылдың жазында Есіл ауданында, тағы екі факті Мамлют және Шал ақын аудандарында жасалған.
«Күдіктілер ауыл тұрғындарының қора-қопсыларына кіріп, қойларды ұрлаған. Бір ұрлағанда 6 бас қойды алып кетіп отырған. Тамыз айында жедел-іздестіру іс-шараларының нәтижесінде полицейлер облыстың күдікті жеті тұрғынын әшкереледі. Тергеу барысында ұрланған малдың етін Петропавл қаласында сатқаны анықталды. Сатып алушыдан төрт бас қой тәркіленді», – делінген Polisia.kz сайтының хабарламасында.
Белгілі болғандай, малдары ұрланған тұрғындар полицияға жүгінбеген.
«Малдары өздері жоғалып кеткен болуы мүмкін деп ойлаған. Бірқатар фактілер тек тергеу барысында анықталды. Бүгінгі күні істе 10 эпизод бар. Соңғысы сотқа дейінгі тергеп-тексерулердің бірыңғай тізіліміне 19 қыркүйек күні тіркелді. Барлығы 31 малдың ұрланғаны белгілі болды», – делінген хабарламада.
Күдіктілер қамауға алынды. ҚР Қылмыстық кодексінің 188-1-бабының 3-бөлігі (Мал ұрлау) бойынша тергеу жүріп жатыр.
