Прокуратура Аrtsport бағдарламасынан қаржы жымқыру фактісін анықтады

Алматы қаласының прокуратурасы Аrtsport бағдарламасы арқылы балалардың спорттық және шығармашылық тапсырыстарын қаржыландыру кезінде заңдылықтың сақталуына тексеру жүргізіп жатыр деп хабарлады turkystan.kz. 2021 жылдың мамыр айынан бастап Алматыда бағдарламаны жүзеге асыруға 12,8 млрд теңге бөлінді. Прокурорлық тексерудің алдын ала нәтижелері бірқатар заңбұзушылықты анықтады. Бюджет қаражатын жымқыру бойынша қылмыстық схемалар анықталды. Атап айтқанда, елден тыс жерде, ауруханада болған және секциялар мен үйірмелерге мүлдем қатыспаған 2000-нан астам балаға орындалған жұмыс актілері ұсынылды. Өткізілген сабақтардың саны 5000-нан асады. Тек 935 Аrtsport қатысушысы іс жүзінде спорт мектептерінде айналысады.

«Балалармен жұмыс істейтін, бұрын сотталған және түрлі қылмыстар үшін жауапқа тартылған 13 жаттықтырушы анықталды. Бұл ретте еңбек шарттарын жасаспаған, зейнетақы аударымдары жүргізілмеген жаттықтырушылардың өздеріне қатысты да еңбек құқықтарын бұзуға жол беріледі.   Аталған фактілер бойынша қала прокуратурасы алаяқтық фактісі бойынша қылмыстық іс қозғады. Бірқатар материалдар процестік шешім қабылдау үшін қылмыстық қудалау органдарына берілді», - деп жазылған хабарламада.

Бұдан басқа, Аrtsport платформасының функционалының жұмысында да елеулі олқылықтар анықталды. Ол мемлекеттік органдардың ақпараттық жүйелерімен біріктірілмеген, балалардың дербес деректері қорғалмаған, басқа да кемшіліктер бар. Қазір мамандарды тарта отырып, тексеру жүргізіліп жатыр.  

Серіктес жаңалықтары