Респонденттердің 82,4 пайызы Президенттің саяси бастамасын қолдайды

Қоғамдық саясат институты 2022 жылғы 7 қыркүйекте телефон арқылы сауалнама жүргізді. Нұр-Сұлтан, Алматы, Шымкент қалалары мен 17 облыстың қала және ауыл тұрғындары арасында 18 жастан асқан 2 394 респондент сауалнамаға қатысқан. Зерттеу нәтижелеріне сәйкес Мемлекет басшысының Қазақстан халқына Жолдауында мәлімдеген саяси бастамалары оң қабылданды. Естеріңізге сала кетейік, Мемлекет басшысы Қ.Тоқаев 2022 жылғы 1 қыркүйектегі Қазақстан халқына Жолдауында Президенттің өкілеттік мерзімінің саны мен ұзақтығын қайта қарауды ұсынған болатын. Атап айтқанда, Президенттің мандатын қайта сайлау құқығынсыз 7 жылға созылатын бір мерзімге шектеу туралы бастама көтерілді. Сауалнамаға қатысқандардың басым көпшілігі (82,4%) осы саяси инновацияны қолдайды. Қатысушылар негізінен мына бастамаларды қолдау білдірген: - 7 жыл ішінде кез келген сайлауалды бағдарламаны жүзеге асыруға болатынына сенімділік (61,7%); - 7 жыл ішінде биліктің барлық құрылымын монополиялау мүмкін емес екеніне деген сенім (14,9%). Бір қызығы, әрбір 5-ші респондент үшін (19,5%) Президент тек бір рет сайланатыны әлдеқайда маңызды болған.  

Серіктес жаңалықтары