50208
Нұрсұлтан Назарбаев халықаралық әуежайынан көптеген заңбұзушылық анықталды
Нұрсұлтан Назарбаев халықаралық әуежайынан көптеген заңбұзушылық анықталды
ҚР ИИДМ аудиттік тексерісі елорда әуежайының жұмысына байланысты көптеген заңбұзушылықты анықтады деп хабарлады turkystan.kz.
«Нұрсұлтан Назарбаев халықаралық әуежайы» АҚ Директорлар кеңесі компания басқармасына тексеріс нәтижесінде анықталған заң бұзушылықтарды қайта қалпына келтіруге бағытталған арнайы жоспар құруды тапсырды.
Азаматтық авиация комитетінің төрағасы Талғат Ластаев «Нұрсұлтан Назарбаев халықаралық әуежайы» АҚ Директорлар кеңесі мүшелерімен отырыс өткізді. Басқосу барысында ҚР ИИДМ ішкі аудит қызметінің биылғы тамыз айында елорда әуежайына жасаған тексеріс қорытындысы қарастырылды.
«Аудиторлық іс-шаралардың қорытындысы бойынша әуежай басшылығы тарапынан жасалған көптеген кемшілік пен бірқатар заңбұзушылық анықталды. Атап айтқанда, сатып алу рәсімдерінің мемлекеттік сатып алу порталынан тыс жүргізілуі, келісімшарттарды жасау барысында ашықтықтың болмауы, еңбекақы төлеу жүйесіндегі бұзушылықтардың орын алуы, жанар-жағармай материалдарын заңсыз босату, ұйымдық құрылымды құрудағы бейберекетсіздік, Қоғам басшылығы арасындағы қызметтік міндеттемелерді заңсыз бөлу сынды заңдылыққа қайшы әрекеттер анықталған», - деп жазылған министрлік хабарламасында.Сонымен қатар директорлар кеңесі әуежайдағы бірқатар қызметті (авиажанармайды тарату, нысандарды жалға беру) аутсорсингке беру кезінде қажетті талаптардың сақталмағанын анықтаған. Өз кезегінде бұл аталған қызметтердің тиімсіздігіне әкеп соққан. Директорлар кеңесі отырысының қорытындысы бойынша әуежай басқармасына арнайы талдау жүргізіп, аудит нәтижесінде анықталған бұзушылықтарды қайта қалпына келтіруге бағытталған жоспар құруды тапсырылды. Сондай-ақ ұйым құрылымын қайта қарау, мемлекеттік сатып алулар кезінде заң талаптарын қатаң сақтау, жанар-жағармай материалдары шығындарына бақылауды күшейту, қызмет көрсету бойынша келісімшарттардың тиімділігіне ревизия жүргізу міндеттелді. Бұдан бөлек, заңсыздыққа жол берген жауапты тұлғаларды жауапкершілікке тарту мәселесі де тапсырылды. Бұған дейін хабарланғандай, бірден бір акционер – ҚР Индустрия және инфрақұрылымдық даму министрлігінің шешімімен 2022 жылғы 6 қыркүйекте «Нұрсұлтан Назарбаев халықаралық әуежайы» АҚ Басқарма төрағасы Ғабит Қалиұлы Тәжімұратовтың өкілеттігі мерзімінен бұрын тоқтатылды. Басқарма төрағасының міндетін уақытша атқарушы болып төрағаның орынбасары Мұхиден Әбілдинов тағайындалды.
