Қарағандыда мал жаппай белгісіз індетке шалдығып жатыр (ВИДЕО)

Қарағанды облысындағы шаруа қожалықтарында мал жаппай белгісіз ауруға шалдығып жатыр, деп хабарлады turkystan.kz «Астана» арнасына сілтеме жасап. Малшылар ірі қараға екі жыл бойына бірде-бір екпе салынбағанын, енді оның зардабын көріп жатқандарын жеткізді. Шет ауданында бүгінде ауруға шалдыққан ірі қара саны 800-ге жеткен. Жергілікті ветеринарлар малшылардың пайымына қарсы уәж айта алмады. Өйткені тегін дәрі алуға мемлекеттен қаржы бөлінбеген.

«Екі жыл болды вакцина салмағанына, ештеңе алмаған. Малдар әбден ауырған соң шақырттық. Сол кезде келіп вакцина салып кетті. Бірақ қалған вакцина мен витаминдерді өзіміз сатып алып салдық. Тегін бе деп сұрадық, бірақ өздеріңіз сатып аласыздар, бізге ондай ақша бөлінген жоқ деді», - дейді Ақжал кентінің тұрғыны Сәуле.

Мал ауруы Шет ауданының Ақжал кентінен басқа Ақшатау, Киікті, Ақсу-Аюлы, Босаға ауылдары мен Мойынты кентінде жаппай өршіген. Сиырлар мен бұзаулардың ауыздарынан су ағып, жем-шөп жей алмай жатып қалыпты. Қарашаның ортасында алғаш байқалған. Алтауы арам қатқан. Алайда ауылдықтар одан да көп сиыр қырылуы мүмкін деп отыр. Ветеринар мамандар да  белгісіз дерттің етек алғанын растады. Тағы оқи отырыңыз: Қызылордада мал қырылып жатыр Сонымен бірге сынамалар республикалық зертханада әлі де сарапталып жатыр деді. Мамандардың дерегінше, Қарқаралы ауданында да ауру белгілері тіркелген.

«Вирустық диарея және инфекциялық ринотрахеит ауруы анықталды. Басқа жерлерден малдарды тасымалдау немесе жеке заңды тұлғалардың малды ветеринариялық мамандардың рұқсатынсыз,  ескертпестен басқа жерден алып келуі, жаңағы карантинге қойылмаған малды алып келу себебінен болады негізі. Ауру тіркелген жеке аулаларда дезинфекция жұмыстары жүргізілді», - деді Ауыл шаруашылығы министрлігі ветеринарлық қадағалау комитеті Қарағанды облыстық инспекциясы жетекшісінің міндетін атқарушы Данияр Мерғазин.

Серіктес жаңалықтары