ОҚО әкімі ІІ республикалық журналистер форумына қатысты

Оңтүстік Қазақстан облысының әкімі Жансейіт Түймебаев «Жаңа ақпараттық саясат: бағдар мен болашақ» тақырыбындағы ІІ республикалық журналистер форумына қатысушы республикалық және облыстық БАҚ өкілдерімен кездесті. Шығармашылық өкілдерімен болған кездесуде әкім басылым - мемлекетіміздің тыныс-тіршілігі мен айнасы екенін айтып, республикалық форумға арнайы келгендері үшін алғысын білдірді. Сонымен бірге, алдағы жұмыс жоспарларымен бөлісті. Өз кезегінде, қаламгерлер де аймағымыздың күннен-күнге дамып келе жатқан үлгілі өңір екенін тілге тиек етіп, Күнгей өлкенің игі бастамалардың ордасы, еңбекқор өлке екенін атап өтті. Оңтүстіктің ақпараттық кеңістігі дамыған аймақ екеніне тоқталған қарымды қаламгерлер біздің облыстан үйренер істің көп екенін айтты. Жиын соңында Жансейіт Қансейітұлы БАҚ өкілдеріне шығармашылық табыс тілеп, бүгінгі форумда талқыланған мәселелер қоғамдағы күрделі проблемаларды шешуде септігін тигізеріне сенім білдірді. Айта кету керек, Оңтүстік Қазақстан облысы БАҚ саны жағынан республикада екінші орында. Қазіргі таңда облыста 239 БАҚ жұмыс жасаса, оның 171-і газет, 38-і журнал, 13-і телеарна, 4-і радио және 13-і интернет сайт.

Серіктес жаңалықтары