4 Маусым 2020, 17:38 867 0 Өндіріс Арайлым Бимендиева

Кәсіпорындар 89,3 миллиард теңгенің азық-түлігін өндірді

Алматы облысында өнеркәсіптің өңдеу секторының үлесі 86,6% болып, республикадағы жоғары көрсеткішке жеткен. Соның ішінде азық-түлік өндіру үлесі 40%-дан асады. Мәселен, биылғы жылдың қаңтар-сәуір айлары аралығында облыс кәсіпорындары 89,3 миллиард теңге болатын немесе өткен жылдың 114,2%-на тең келетін азық-түлік өнімдерін өндірді.

Бұл туралы Алматы облысы әкімінің баспасөз қызметі хабарлады.

Облыстық кәсіпкерлік және индустриалды-инновациялық даму басқармасының мәліметінше, өңірдің өнеркәсіптік әлеуетін мыңнан астам кәсіпорын құрап отыр, онда 70 мыңнан астам адам жұмыс істейді. 2020 жылдың 1-ші жартысында «Жетісу Соя», AGRITECH, «Секвойя плюс», Catexpo, Alacem, «Феникс Фид Миллс», «Ақтоғай Ресайклинг», «Алмаз Керамикс», «ТКМЗ» ЖШС-ның индустриалды жобалары жүзеге асырылады, соның арқасында 850 жұмыс орны ашылады деп күтілуде.

Жалпы өткен жылы облыс өнеркәсібінде сусын өндіру – 12,7%, жеңіл өнеркәсіпте – 29%, фармацевтикада – 20,1%, дайын металл бұйымдарында – 38,9%, машина жасауда 60%-ға ұлғайған.

Соның ішінде облыс өнеркәсібінің жалпы көлемінің 40%-дан астамын тамақ өнімдері мен сусын өндіру құрайды. Мәселен, облыста жылына шамамен 1 миллиард литр сусын шығарылады, өнімнің ассортименті үнемі артып отыр. Биылғы жылдың қаңтар-сәуір айлары аралығында облыс кәсіпорындары 89,3 миллиард теңгенің немесе өткен жылдың 114,2%-на тең келетін азық-түлік өнімдерін өндірді.

Облыс кәсіпорындары шығарған өнімдерін ішкі нарыққа саудалаумен қатар, сыртқа экспорттау географиясын да кеңейтіп келеді. Мәселен, жаңадан ашылған ет өңдеу кәсіпорынның бірі «Империя Фуд» ЖШС Қытай, Иран және басқа да елдер нарығына шықты. «АзияАгроФуд» ЖШС Қырғызстанға және Өзбекстанға ұн жеткізеді. Ал «Жаркент крахмал-сірне зауыты» ЖШС өнімдерін Қытайға, Қырғызстанға, Өзбекстанға, Тәжікстанға, Ресейге, сол сияқты «Хамле компании ЛТД» ЖШС кондитерлік өнімдерін Қырғызстанға, Ресейге, Өзбекстанға экспорттайды.

Соңғы жаңалықтар