Алматы жұртшылығы Нұрмахан Оразбекпен қоштасты

Бүгін Алматыда жұртшылығы белгілі журналист, жазушы, баспагер, Қазақстанның еңбек сіңірген қайраткері Нұрмахан Оразбекпен қоштасты. Жазушылар одағында өткен қаралы жиынға Нұрмахан Оразбектің отбасы мүшелері, туған-туыстары, достары мен әріптестері, ізбасарлары, Қазақстан Журналистер одағы мен Алматы қаласы әкімдігінің өкілдері және басқа да зиялы қауым өкілдері келіп, марқұмды ақтық сапарға шығарып салды. 79 жасқа қараған ша­ғында көрнекті журналист, атақты аудармашы, білікті баспагер1937 жылғы 1 жел­тоқсанда Оңтүстік Қазақстан облысының Түркістан ауданындағы Қандөз елді мекенінде туған. 1955 жылы Шорнақ ауылындағы орта мектепті бітірген соң, өндіріс орындарында жұмыс істеуге үндеген комсомолдық жолдамамен Қостанай өңіріне аттанып, сонда­ғы Соколов-Сарыбай кен байыту комбинатында еңбек еткен. Осыдан кейін КазГУ-дің журналистика факультетіне оқуға түсіп, оны 1962 жылы бітірген соң, жас маман ретінде Қарағанды облысының Жезді аудандық «Октябрь туы» газетіне жіберілді. 1964-1973 жыл­ы Алматыға қайта оралып, респуб­ликалық «Лениншіл жас» газе­тіне қызметке алынды. Осыдан кейін Қазақстан ЛКСМ Орталық Комитетінде, Қазақстан Компартиясы Орта­лық Комитеті жанындағы Партия тарихы институтында жұмыс істеп, «Социалистік Қазақстан» газетінде еңбек етті. 1974 жылы Қазақ ақпарат агенттігінде (ҚазТАГ) ­бас редактор, 1982 жылы директордың орынбасары болып тағайындалды. 1988-1994 жылдары Қарағанды облыстық «Орталық Қазақстан» газетінің бас редакторы, тәуелсіз Қазақстанның жаңадан құрылған Баспасөз министрлігіндегі басқарма бастығы, ағылшын тілінде шыққан «Қазақстан» газетінің бас редакторы болып, 1995 жылдан бері қоғамдық-саяси әдебиеттер шығаратын «Қазақстан» баспасының директоры қызметін атқарды. Қазақ журналистерінің бірнеше буынының ұстазы атанған Н.Оразбектің қаламынан туған «Қасиеттісің, сен Отан!», «Капи­тал қамалындағы 18 күн», «Қа­ғажу көрген өмірден», «Мұхиттың арғы жағы, бергі жағы», «Шапық Шөкин» атты кітаптар – кейінгі ұрпаққа рухани мұра.