كوركەمسۋرەت كوكجيەگى

كوركەمدىك ونەردىڭ دامۋى قوعام قاجەتتىلىگىنە قاراي ماڭىزدى. سەبەبى عىلىم مەن تەحنيكانىڭ ءورىس الۋى كوركەمدىك شىعارماشىلىققا اسەر ەتۋدە. وسىعان وراي كوركەمدىك ءبىلىم بەرۋ سالاسىنداعى پەداگوگ-سۋرەتشى مامانداردىڭ ساۋاتتىلىعى مەن كاسىبي شەبەرلىگىنە، زاماناۋي باعىتتاعى ونەر تۇرلەرىنە كوڭىل ءبولىنۋى ۋاقىت تالابى.

كوركەمدىك ونەر ونىڭ ىشىندە گرافيكا، كوركەم سۋرەت، ءمۇسىن، قولدانبالى ساندىك ونەرى، ديزاين شەبەرلەرى العاشقى ءوزىنىڭ باستاۋىن شىنايى تابيعاتتان الادى. قوعامداعى وزگەرىستەر، قورشاعان ورتا قۇبىلىستارى مەن ونداعى تىنىس-تىرشىلىك كوركەمدىك ونەردىڭ دامىپ، وركەندەۋىنە ىقپال ەتەدى.

اباي اتىنداعى قازاق ۇلتتىق پەداگوگيكالىق ۋنيۆەرسيتەتى «ونەر، مادەنيەت جانە سپورت» ينستيتۋتىندا كوركەمدىك ونەردەن جوعارى ءبىلىمدى مامان دايىنداۋ ماقساتىندا قازاقستانداعى تۇڭعىش «كوركەمسۋرەت» فاكۋلتەتى. ونىڭ قۇرىلعانىنا بيىل جارتى عاسىر تولىپ وتىر. بۇل جوعارى وقۋ ورنى عاسىرلار بويى جيناقتالعان قازاق حالقىنىڭ اسىل مۇراسى – كوركەمدىك ونەردەن جاستارعا پاتريوتتىق تاربيە بەردى. قازاقستان رەسپۋبليكاسىنىڭ جالپى ورتا مەكتەپتەرىنە، ۋچيليششەلەرى مەن تەحنيكۋمدارىنا، ارنايى ونەر مەكتەپتەرىنە، جوعارى وقۋ ورىندارىنا كوركەمدىك ءبىلىم بەرەتىن پەداگوگ-سۋرەتشى مامان دايىنداۋدىڭ كوكەيكەستى ماسەلەلەرىن كوتەرگەن ءبىلىم ورداسى بولدى.

قازاق حالقىنىڭ كوركەمدىك ونەرىنىڭ تابيعاتىن جان-جاقتى ەتنوگرافيالىق تۇرعىدا قاراستىرۋدىڭ عىلىم ءۇشىن ماڭىزى زور. ويتكەنى، ەلباسى نۇرسۇلتان ءابىش ۇلى نازارباەۆتىڭ « ۇلى دالانىڭ جەتى قىرى» اتتى ماقالاسىندا قازاقتىڭ كوركەمدىك ونەرىن ۇلى دالانىڭ جەتى قىرىنىڭ ىشىندەگى نەگىزگى سالالارىنىڭ ءبىرى رەتىندە قاراستىرۋ كەرەكتىگى ايتىلعان. جارتى عاسىر بويى كوركەمدىك ونەردەن ءدارىس بەرىپ، پەداگوگ-سۋرەتشىلەر دايىنداپ كەلگەن تۇڭعىش ءبىلىم ورداسىنداعى «ونەر، مادەنيەت جانە سپورت» ينستيتۋتىنىڭ ۇجىمىنا ۋنيۆەرسيتەت رەكتورى تاكير بالىقباەۆ «حالىق­ارالىق عىلىمي-تاجىريبەلىك شىعارماشىلىق» مەرەكەلىك كونتسەرتتىك باعدارلاماسىن وتكىزۋدى ۇسىندى.

جارتى عاسىردان بەرى اباي اتىنداعى قازاق پەداگوگيكالىق ينستيتۋتى «كوركەمسۋرەت» فاكۋلتەتىندە «بەينەلەۋ ونەرى جانە سىزۋ» ءپانى مۇعالىمى ماماندىعىن بىتىرگەن جاستاردىڭ كوركەمدىك ونەر باعىتىندا ورىنداپ جاتقان عىلىمي جانە كاسىبي شىعارماشىلىق تۇرعىسىنداعى ءىس-ارەكەتتەرى شەت مەملەكەتتەردى بۇرىنعى وداقتاس رەسپۋبليكالاردى، ماسكەۋدى بەي-جاي قالدىرماعان.

كەڭەس وداعىنا تانىمال بولعان ربا-نىڭ اكادەميكتەرى، پ.ع.د.، پروفەسسورلارى ە.ۆ. شوروحوۆ، س.پ. لوموۆ، ۆ.س. كۋزين، گ.ۆ. بەدا سىندى مايتالمان ماماندار «كوركەمسۋرەت» فاكۋلتەتىنىڭ «بەينەلەۋ ونەرى جانە سىزۋ» ءپانى مۇعالىمى ماماندىعىن بىتىرگەن قازاقستان جاستارىنىڭ وتانعا دەگەن پاتريوتتىق سەزىمى مەن عىلىمعا دەگەن باعىتىن جوعارى باعالادى.

«كوركەمسۋرەت» فاكۋلتەتىنىڭ «بەينەلەۋ ونەرى جانە سىزۋ» ماماندىعىن بىتىرگەن تۇلەكتەردەن پەداگوگيكا، فيلوسوفيا عىلىمدارىنىڭ دوكتورلارى، پەداگوگيكا، فيلوسوفيا، ونەرتانۋ عىلىمدارىنىڭ كانديداتتارى مەن PhD دوكتورلارى، پروفەسسورلار مەن دوتسەنتتەر شىقتى.

 

قۇرمانعازى جەدەلوۆ،

پ.ع.د.،  پروفەسسور

اباي ات. قاز ۇپۋ-ءنىڭ

ونەر، مادەنيەت جانە سپورت ينستيتۋتى

«كوركەم ءبىلىم» كافەدراسىنىڭ مەڭگەرۋشىسى

ۇقساس جاڭالىقتار

Back to top button