ءتىلدىڭ شۇبارلانۋى بەلەڭ الىپ بارادى

 موڭعوليانىڭ استاناسى ۇلانباتىرعا تابان تىرەگەن قازاقتىڭ ەڭ الدىمەن باس سۇعاتىن مەكەمەلەرىنىڭ ءبىرى – موڭعوليانىڭ ۇلى قۇرالى نەمەسە ءبىزدىڭ تىلمەن ايتقاندا، پارلامەنتى. ويتكەنى، موڭعوليانىڭ تاريحىندا جوعارى زاڭ شىعارۋ ورگانىندا بايان-ولگيدەگى قازاق اعايىنداردىڭ اراسىنان ءۇش دەپۋتات سايلاۋ داستۇرگە اينالعان. بىراق، 2012 جىلعى سوڭعى شاقىرىلىمدا بايان-ولگيدەن سايلانعان دەپۋتاتتاردىڭ سانى 2-گە دەيىن قىسقارىپتى. موڭعوليانىڭ ۇلى قۇرال دەپۋتاتى، ۇلانباتىرداعى قازاق جەرلەستەر قوعامىنىڭ جەتەكشىسى باكەي اعىپار ۇلىنا قويىلعان العاشقى ساۋال وسى بولدى:

– موڭعولياعا قازاقتار قونىستانا باستاعالى 150-160-تاي جىل بولدى. رەسمي تۇردە موڭعوليانىڭ قاراماعىنا ءوتىپ، ازاماتتىعىن قابىلداي باستاعانىنا 101 جىل تولعان ەكەن. سول ءجۇز جىلدىقتا مۇنداعى قازاق ۇلتى وكىلدەرى موڭعول ۇلتىمەن تەڭ دارەجەلى قۇقىقتا ءومىر ءسۇرىپ، قوعامدىق الەۋمەتتىك ماسەلەلەرگە ارالاسىپ كەلە جاتىرمىز. قازىرگى موڭعولياداعى تۇرعىنداردىڭ سانى – 2 ميلليون 8 مىڭنان استام. ونىڭ بەس پايىزدايى – قازاق ۇلتىنىڭ وكىلدەرى. ونىڭ ءجۇز مىڭعا جۋىعى – بايان-ولگي ايماعىندا، قالعانى – ۇلانباتىر، دارحان، ەردەنەت، شارىنگول، نالايح سەكىلدى ءوندىرىستى قالالاردا تىرلىك ەتەدى. موڭعوليانىڭ كونستيتۋتسياسى – نەگىزگى زاڭى بويىنشا، مۇنداعى ۇلتتار تەڭ قۇقىقتى، ەشكىم ۇلتىنا، ناسىلىنە جانە تىلىنە قاراي كەمسىتىلمەيدى. سول سەبەپتى دە، عاسىرعا جۋىق ۋاقىت قازاق ۇلتىنىڭ موڭعولياداعى وكىلدەرى جەرگىلىكتى ۇلتپەن تەڭ دارەجەدە ءومىر ءسۇردى. وسى نەگىزگى زاڭنىڭ 8-بابىنىڭ 2-تارماعىندا ەلدەگى از ساندى ۇلت وكىلدەرى ءوز انا ءتىلىن دامىتۋعا، انا تىلىندە ءبىلىم الۋعا جانە مادەني، عىلىمي اقپاراتتارعا قول جەتكىزۋگە قۇقىلى. وسىعان وراي زاڭدىق نەگىزدەرى دە جاسالعان.
بۇعان دەيىن موڭعوليانىڭ پارلا­مەنتىنە سايلاۋ ماجوريتارلىق جۇيە بويىنشا جۇزەگە اسىرىلىپ كەلدى. سول جۇيەمەن بايان-ولگي ايماعىنان وكىل رەتىندە ءۇش دەپۋتات سايلانىپ كەلگەن بولسا، 2012 جىلعى سايلاۋ جاڭا «سايلاۋ تۋرالى» زاڭ بويىنشا جۇرگىزىلدى. بۇعان وراي، سايلاۋ ماجوريتارلىق جانە پروپورتسيونالدىق جۇيەمەن سايلاندى. موڭعوليانىڭ مەملەكەتتىك ۇلى قۇرىلتايىنا 76 دەپۋتات مۇشە بولسا، ونىڭ 48-ءى ماجوريتارلىق جۇيەمەن، ياعني بەلگىلى ءبىر اۋماقتان، حالىق اراسىنان سايلاندى. قالعان 28-ءى پارتيالىق ءتىزىم بويىنشا ۇسىنىلدى. سول سەبەپتەن دە، بۇرىنعى ءۇش دەپۋتاتتىڭ ورنىنا بايان-ولگيدەن ەكى دەپۋتات مانداتقا يە بولدى. بۇل موڭعوليانىڭ قازاقتارعا دەگەن كوزقاراسىنىڭ سالدارىنان ەمەس، سايلاۋ زاڭىنداعى وزگەرىستەر جانە پارتيالىق تىزىمدە كىمدەردىڭ ءتىزىمنىڭ باسىندا تۇرعانىنا بايلانىستى بولىپ وتىر.
– موڭعوليادان قازاقستانعا سوڭعى جيىرما جىل كولەمىندە ءجۇز مىڭعا جۋىق قازاق ورالدى. الايدا، موڭعوليا مەن قازاقستاننىڭ ءوزارا قارىم-قاتىناسى ءالى كۇنگە دەيىن دۇرىس جولعا قويىلماي كەلەدى. بۇرىن قازاقستاندىق Scat اۋە كومپانياسىنىڭ ۇشاعى «الماتى – وسكەمەن – بايان-ولگي» باعىتىمەن ۇشىپ جۇرگەن. ۋاقىتشا ول دا توقتاعان ەكەن. ءبىز ۇلانباتىرعا قىرعىزستاننىڭ استاناسى بىشكەك ارقىلى كەلدىك. كەلۋشىلەردىڭ كوبى – الماتىدان بولدى جانە ولاردىڭ باسىم كوپشىلىگى تاريحي وتانىنا ورالعان موڭعوليانىڭ بۇرىنعى ازاماتتارى ەكەنى دە تۇسىنىكتى. موڭعوليا مەن قازاقستان اراسىندا نەگە تىكەلەي كولىك بايلانىسى جولعا قويىلماعانى ءبىراز جۇرتتى ابىگەرگە سالعان سياقتى. جالپى، ەكى ەلدىڭ قارىم-قاتىناسىن قانداي دەڭگەيدە باعالار ەدىڭىز؟
– موڭعوليا دەموكراتيالىق جولدى تاڭداعاننان كەيىن، ول ەلدىڭ ازاماتتارى تاڭداعان ەلىنە كوشۋىنە، ءىس ساپارمەن، جەكە ساپارمەن بارۋىنا جانە تاڭداعان مەملەكەتىنىڭ ازاماتتىعىن الۋىنا قۇقىلى بولدى. سول قۇقىقتارىن پايدالانعان قازاق اعايىنداردىڭ باسىم كوپشىلىگى تاريحي وتانىنا ورالدى. قازاقستاننىڭ ازاماتتىعىن قابىلدادى. الايدا موڭعوليادان قانشا قازاقتىڭ قازاقستانعا قونىس اۋدارعانى تۋرالى ناقتى دەرەك جوق. كەيبىر دەرەك كوزدەرى – 65 مىڭ دەسە، ەندى بىرەۋلەرى 100 مىڭ دەيدى. مەنىڭشە، قالاي دەگەنمەن دە قونىس اۋدارعانداردىڭ سانى جەتپىس مىڭنان كەم ەمەس. قازاقستاننىڭ پرەزيدەنتى نۇرسۇلتان نازارباەۆ وسى ۋاقىت ارالىعىندا موڭعولياعا ءۇش رەت رەسمي ساپارمەن كەلىپ كەتتى. موڭعوليانىڭ ءار كەزدەگى پرەزيدەنتتەرى دە قازاقستانعا رەسمي ءىس-ساپارمەن بارىپ ورالدى. باسقا دا دەڭگەيدە ەكى ەل قارىم-قاتىناستارىن جاقسارتۋعا بايلانىستى كەزدەسۋلەر ءجيى قايتالاندى. الايدا، بۇگىنگى تاڭدا موڭعوليا مەن قازاقستان اراسىنداعى قارىم-قاتىناستى وتە جاقسى دەڭگەيدە دەپ ايتۋعا دا، مۇلدەم توقتاپ قالدى دەۋگە دە كەلمەيدى. بىرىنشىدەن، جەكەلەگەن ادامدار اراسىنداعى بايلانىس، قارىم-قاتىناس وتە جاقسى دەڭگەيگە جەتتى. قازاقستاننىڭ كەز كەلگەن بيزنەسمەن، كاسىپكەرلەرى كەلىپ، مۇندا ءوزىنىڭ كاسىبىن جۇرگىزۋگە مۇمكىندىك الا الادى. موڭعوليانىڭ ازاماتتارى دا قازاقستانعا بارىپ قونىستانۋىنا، ءىس قىزمەتىن جۇرگىزۋىنە قۇقىلى. ەكى ەل اراسىنداعى رەسمي قاتىناسى، ەكونوميكالىق، ساۋدا قاتىناسى جانە باسقا قارىم-قاتىناستارعا كەلەتىن بولساق، وسىدان ەكى جىل بۇرىن استانادا موڭعوليانىڭ مادەنيەت كۇندەرى بولدى. ەندى سونداي شارا جاقىن كۇندەرى ۇلانباتىردا وتكىزىلەدى دەپ جوسپارلانعان. Scat اۋە كومپانياسىنىڭ «الماتى-وسكەمەن-ولگي» باعىتىمەن ۇشىرىلىپ كەلگەن ۇشاعىنىڭ توقتاۋ سەبەبىنە كەلەر بولساق، موڭعوليا ۇكىمەتى تاراپىنان قازاقستاندىق Scat كومپانياسىنا ءوز ازاماتتارىنىڭ قاۋىپسىزدىگى جونىندە ناقتى تالاپتار قويعان بولاتىن. ويتكەنى ولاردىڭ ۇشىرىپ كەلگەن اۋە كەمەسى وتكەن عاسىرداعى كەڭەستىك يمپەرياعا تيەسىلى ەسكى «ياك-40» ۇشاعى بولاتىن. ونىڭ بۇگىنگى زامانعى تەحنيكالىق تالاپتارعا جاۋاپ بەرە الماسى انىق. سول سەبەپتى Scat اۋەكومپانياسىنا اۋە كەمەسىن باسقاسىمەن الماستىرۋ تۋرالى ۇسىنىس جاسالعان. بىراق ولار ول ۇسىنىسقا قۇلاق اسپادى. سول سەبەپتى دە، «الماتى-وسكەمەن-ولگي» باعىتىمەن ۇشىرىلاتىن رەيستىڭ توقتاعانىنا ءبىر جارىم جىل بولدى. ءبىز وسى رەيستى قايتا جانداندىرۋ تۋرالى موڭعول ۇكىمەتىنە بىرنەشە رەت دەپۋتاتتىق ساۋالدار جولداپ، تالاپتار قويدىق. ءارى بۇل ساۋالدارىمىزعا جاۋاپ تا الدىق. موڭعوليانىڭ كولىك جانە جول ءمينيسترىنىڭ رەسمي جاۋابىندا: «ەگەردە قازاقستان ۇكىمەتى مۇددەلىلىك تانىتاتىن بولسا، موڭعوليانىڭ بىرنەشە اۋە كومپانياسى بۇل ءىستى ءوز قولىنا الۋعا دايىن» دەگەن ەدى. موڭعوليانىڭ اۋە كومپانيالارى قازىر الەمنىڭ تۇكپىر-تۇكپىرىنە رەيس اشىپ وتىر جانە تەحنولوگيانىڭ ءبارىن باتىستان، امەريكادان ساتىپ العان. ماسەلەن، «موڭعول ەير» كومپانياسى جاقىندا تاعى ءبىر «بوينگ» اۋەكەمەسىن ساتىپ الدى. ولار امەريكانىڭ وزىنە ءترانزيتسىز رەيس ۇشىرىپ كەلەدى. سول سەبەپتى دە بۇل ءىستى موڭعوليالىق اۋە كومپانيالار اتقارۋىنا ابدەن بولادى.
– ال قازاقستان تاراپىنىڭ بۇعان ايتار ءۋاجى قانداي؟
– قازاقستان بۇل تالاپقا مويىنسۇنىپ وتىرعان كورىنەدى. تەك ولاردىڭ قويىپ وتىرعان تالابى، ۇلانباتىر-استانا باعىتىنا ۇشىرىلاتىن رەيستى قازاقستاندىق اۋەكومپانيالار جۇزەگە اسىرسىن دەگەنگە سايادى. قازىر بۇل ماسەلە وڭ شەشىمىن تاپتى. اۋە بايلانىسى قايتا جانداناتىن كۇن الىس ەمەس.
– قازاقستان بيزنەسى بۇگىندە حالىقارالىق دەڭگەيگە شىقتى. ءبىراز مەملەكەتتەرگە قازاقستان تاراپىنان ينۆەستيتسيا سالىنعانى ءمالىم. ال موڭعوليانىڭ بيزنەسىندە قازاقستاننىڭ ۇلەسى قانداي؟ قازاق كاسىپكەرلەرى ينۆەستيتسيا سالعان سالانى ايتىپ بەرە الاسىز با؟
– قازاقستاندىق بيزنەسمەندەر موڭعوليا بيزنەسىنە ءبىرتالاي مۇددەلىلىك تانىتتى جانە ءبىراز سالادا ينۆەستيتسيا سالىپ تا كوردى. قولدا بار مالىمەتتەرگە قاراعاندا، قۇرىلىس سالاسىندا، جول، كولىك سالاسىندا، تاۋ-كەن سالاسىندا ينۆەستيتسيا سالىپ، باسشىلىق جاساپ جۇرگەن ازاماتتار بار. بىراق، مەنىڭ قولىمدا ناقتى ستاتيستيكا بولماي وتىر.
– وتكەن عاسىردىڭ توقسانىنشى جىلدارىنىڭ باسىندا قازاقستان شەتتە جۇرگەن قانداستارىن شاقىر­عانى بەلگىلى. موڭعولياداعى قانداس­تارىمىز وسى كوشتىڭ العاش­قى لەگى بولىپ، تاريحي وتانىنا ات باسىن تىرەدى. سول قازاقتاردىڭ وزدەرى، ۇرپاقتارى بۇگىندە جاقسى جەتىستىكتەرگە قول جەتكىزدى. اسىرەسە، قازاق رۋحانياتىنا ەسەلەپ ۇلەس قوستى. قازىر موڭعوليادان ورالعان قازاقتاردىڭ باسىم كوپشىلىگى، مادەني كوپشىلىك ورىنداردا، اقپارات قۇرالدارىندا، جوعارى وقۋ ورىندارىندا تابىستى ەڭبەك ەتىپ كەلەدى. ساراپشىلار ۇلتتىق ايماق ستاتۋسىنا يە بايانولگيدە قايماعى بۇزىلماعان قازاقى ورتانىڭ قالىپتاسقانى بۇعان سەپتىگىن تيگىزدى دەپ ەسەپتەيدى. الايدا قازىر سول بايانولگي رۋحاني تۇرعىدان جۇتاڭدىققا ۇشىرادى دەگەن اقپارات بار. جالپى، سىزدەر ونداعى قازاقى ورتانىڭ ساقتالىپ قالۋى ءۇشىن قانداي كۇش جۇمساپ وتىرسىزدار؟
– ءبىز بۇنى ماقتان تۇتامىز. قانشاما جىلدار اتاجۇرتىنان جىراق جۇرسە دە، ءوز انا ءتىلىن ساقتاپ قانا قويماي سول تىلدە ادەبيەت، مادەنيەت جاساپ، جالپى قازاق رۋحانياتىنا ولشەۋسىز ۇلەس قوسقانىن قازىر عالىمدار، ساراپشىلار جانە ساياساتتانۋشىلار ايتىپ ءجۇر. بۇل ءۇردىس ءارى قاراي دا جالعاسىن تاباتىن بولادى. ول انىق. ويتكەنى، جوعارىدا ايتىپ وتكەنىمدەي، موڭعوليانىڭ نەگىزگى زاڭىندا از ساندى ۇلتتاردىڭ رۋحانياتى مەن انا ءتىلىن دامىتۋعا كومەكتەسۋ، قولداۋ ناقتى باپتار ارقىلى كورىنىس تاپقان. سونىمەن بىرگە از ساندى ۇلتتاردىڭ ءوز انا تىلىندە ءبىلىم الۋىنا كەڭ جول اشىلعان. موڭعوليانىڭ ءبىلىم تۋرالى زاڭىنىڭ 5-بابىندا «از ساندى ۇلت وكىلدەرىنىڭ ءوز انا تىلىندە ءبىلىم الۋىنا تولىق مۇمكىندىك جاسالادى» دەلىنگەن. وسى زاڭنىڭ اياسىندا قازاقتار شوعىرلانعان بايان-ولگي ايماعىندا جالپى ءبىلىم بەرۋ مەكتەپتەرى قازاق تىلىندە ءبىلىم بەرەدى، ءارى بۇل جالعاسا بەرمەك. دەگەنمەن، كوڭىلگە تۇيتكىل سالار ماسەلەلەر وتە كوپ. ونىڭ ءبىرى – وسى قازاق مەكتەپتەرىن بىتىرگەن بالالاردىڭ كوپشىلىگى موڭعول ءتىلىن جەتىك مەڭگەرمەگەن. ەكىنشى جاعىنان، جاي قارىم-قاتىناستا ءتىلدىڭ شۇبارلانۋى قاتتى بەلەڭ الىپ بارادى. ۇزاق جىلدار بويى قالىپتاسقان رۋحاني ورتا دا، رۋحانيات تا بوساڭسىدى. بۇل موڭعوليا ۇكىمەتىنىڭ ۇستانىپ وتىرعان ساياساتىنان بولىپ وتىرعان جوق، وعان كىنالى تاعى دا ءوزىمىز.
– مەنىڭ ەستۋىمشە، موڭعولياداعى اقپارات قۇرالدارىنىڭ بارلىعى جەكەمەنشىكتىڭ قولىندا. مەملەكەت تاراپىنان شىعارىلاتىن اقپارات قۇرالدارى جوق كورىنەدى. الايدا بايان-ولگيدە كۇنىنە حالىقپەن ءبىر ساعات قاۋىشاتىن قازاق راديوسىن ۇكىمەت قارجىلاندىرادى ەكەن. وسى قازاق راديوسىنىڭ بۇگىنگى حال-احۋالى قالاي؟
– موڭعوليانىڭ زاڭدارىنا سايكەس، اقپارات قۇرالدارىن مەملەكەت تاراپىنان قارجىلاندىرۋعا تىيىم سالىنعان. موڭعوليانىڭ ۇلتتىق بۇقارالىق راديو تەلەۆيزياسىندا جەتى جۇزدەن استام قىزمەتكەرى بار. بىلايىنان مەملەكەتتىك دارەجەسى جوق. وسى اقپارات قۇرالىنىڭ ءبىر بولىمشەسى بايان-ولگي ايماعىندا جۇمىس ىستەيدى. بۇنداي فيليال باسقا ايماقتاردا جوق، تەك بايان-ولگي ايماعىندا عانا جانە بۇل حالىققا قازاق تىلىندە اقپارات تاراتادى. بايان-ولگي ايماعىندا قازاق تىلىندە كۇنىنە ءبىر ساعات اقپارات تاراتاتىن قازاق راديوسى 1965 جىلى چەحوسلوۆاكيانىڭ تەحنيكالىق كومەگىمەن اشىلعان. دەگەنمەن، ودان بەرگى ەلۋ جىلعا جۋىق ۋاقىت ىشىندە ونىڭ تەحنيكالىق جابدىقتارى ەسكىردى. بيىل ناۋرىز ايىندا وسى قازاق راديوسىنىڭ تەحنيكاسى تولىعىمەن جاڭالاندى. قازىر مەملەكەتتەن قارجىلاندىرىلاتىن بىردەن ءبىر اقپارات قۇرالى وسى ولگي قالاسىندا جۇمىس ىستەپ تۇر.
– قازاقستاندا موڭعوليالىق 800 قازاق وتباسىنىڭ قازاقستاننىڭ ازاماتتىعىن زاڭسىز العاندىعى جانە موڭعوليا ازاماتتىعىن قايتا العىسى كەلەتىندىگى جايىندا اقپارات شۋ بولعان ەدى. ونىڭ ۇستىنە ىلە-شالا www.baiolke.com سايتى موڭعوليا ازاماتتىعىن قايتا العان 200 ادامنىڭ ءتىزىمىن جاريالادى. جالپى، وسى ماسەلەنىڭ جاي-كۇيىنەن حابار بەرە الاسىز با؟
– جالپى، قازاقستاننىڭ ازاماتتىعىن ءتۇرلى جولدارمەن قابىلداعان، الايدا، موڭعوليا ازاماتتىعىن قايتا سۇراپ جاتقان قازاقتاردى موڭعوليالىق ساراپشى عالىمدار ءۇش توپقا ءبولىپ قاراستىرادى. ءبىرىنشى، وتكەن عاسىردىڭ توقسانىنشى جىلدارىندا قونىس اۋدارعان، موڭعوليا ازاماتتىعىنان شىعۋعا ءوز ەركىمەن ارىز بەرگەن جانە ءبىراز جىل قازاقستاندا ءومىر سۇرگەن، الايدا دەنساۋلىعىنا وراي، قايتا ورالعاندار. بىراق، ولار تىم از، جۇزگە دە جەتپەيدى. ەكىنشى توپ – ءبىر كەزدەرى قازاقستانعا كوشپەس بۇرىن، موڭعوليا ازاماتتىعىنان شىعىپ كوشەتىن ءۇردىس بولعان. سول ۇردىسپەن ازاماتتىقتان شىعۋعا ارىزىن بەرىپ الىپ، كوشە الماي قالعاندار. سول ارىزدىڭ نەگىزىندە ولار موڭعوليا ازاماتتىعىنان شىعىپ قالعان، قازاقستان ازاماتتىعىن قابىلداماعان، ازاماتتىعى جوقتار توبى. سول ەكى ورتادا ولاردىڭ بالالارى ومىرگە كەلگەن، كامەلەت جاسىنا تولعان دەگەندەي، ءبىراز اۋرە-سارساڭعا تۇسكەن. ولار دا وتە از، ءتىپتى ساۋساقپەن سانارلىق عانا. ءۇشىنشى توپ – الاياقتىقتىڭ قۇربانى بولعاندار. وزدەرىڭىز دە بىلەسىزدەر، قازاقستاندا كوشى-قون كۆوتاسى ارقىلى اقشالاي جاردەماقى تولەنگەلى ون جىلداي ۋاقىت بولدى، وسى قارجىعا يە بولۋدى ماقسات ەتكەن كەيبىر پىسىقتار بايان-ولگيدەگى جەمقورلارمەن جەڭ ۇشىنان جالعاسىپ، كوشى-قون كۆوتاسىن بيزنەسكە اينالدىرىپ العان. سولاردىڭ پىسىقايلىقتارىنىڭ سالدارىنان، ءوز اۋىلىنان ءجۇز مەتر ۇزاپ شىقپاعان مومىن مالشىلار موڭعوليا ازاماتتىعىنان قالاي شىعىپ قالعاندارىن وزدەرى دە بىلمەي قالعان. سەبەبى، پىسىقتار ولاردىڭ شەتەلگە شىعاتىن قۇجاتتارىن الداپ الىپ، ورنىنا اقشا اكەپ بەرۋگە ۋادە بەرگەن كورىنەدى. بالكىم بۇل پىسىقايلاردىڭ قازاقستاندا دا سىبايلاستارى دا بار بولعان شىعار. ءسويتىپ، ءبىر توپ قازاقتىڭ قۇجاتتارىن زاڭسىز جانە الاياقتىق جولمەن قولىنا تۇسىرگەندەر ءوزارا ىمىرالاسا وتىرىپ، مومىن حالىقتىڭ قارجىسىن زاڭسىز جولمەن يەمدەنگەندەرىنىڭ سىرتىندا، ازاماتتىقتان شىعۋىنا ىقپال ەتكەن. قازاقستان تاراپى ولاردى ءوز ازاماتتىعىنا قابىلداپ، موڭعول ۇكىمەتىنە نوتا جىبەرگەن. ءسويتىپ موڭعوليا ولاردى ازاماتتىقتان شىعارىپ جىبەرگەن. نەگىزىنەن بۇلاردىڭ سانى وتە كوپ. ءبىز وسى ماسەلەنى موڭعوليانىڭ پرەزيدەنتىنە جاقسىلاپ تانىستىرىپ بەردىك. سول كىسىنىڭ تاپسىرماسىمەن، موڭعوليانىڭ شەتەل ازاماتتارىمەن جۇمىس ىستەيتىن اگەنتتىگىنىڭ باسشىسى بايان-ولگي ايماعىندا ارنايى ساپارمەن بولىپ، ازاماتتارمەن كەزدەسىپ، ماسەلەنىڭ انىق-قانىعىنا كوز جەتكىزىپ كەلدى. ءسويتىپ، موڭعوليا پرەزيدەنتىنىڭ جارلىعىمەن 200 ادام موڭعوليانىڭ ازاماتتىعىنا قايتا قابىلداندى. ءالى دە 500-600 ادام بار سياقتى. بۇنى دا زاڭ جولىمەن، ادام قۇقىعىنا شەكتەۋ كەلتىرمەي شەشۋگە ىنتالىلىق تانىتىپ جاتىرمىز. جالپى، مەنىڭشە، بۇل ماسەلەگە وراي، ەكى ەلدىڭ بىرلەسكەن تاۋەلسىز كوميسسياسى جۇمىس ىستەپ، الاياقتاردىڭ كەسىرىنەن زارداپ شەككەن قازاقتاردىڭ ماسەلەسىن بىرجاقتى ەتۋ قاجەت سياقتى. ويتكەنى بۇل ادامداردىڭ شارۋاسىن رەتتەۋ ءۇشىن اۋەلى ولار ءبىرىنشى قازاقستان ازاماتتىعىنان شىعىپ كەلۋى قاجەت. ول ءۇشىن جينالاتىن قۇجاتتاردىڭ سانى قىرۋار، ءارى ءبىراز ۋاقىتتى الادى. جاقىندا قازاقستاننىڭ توتەنشە جانە وكىلەتتى ەلشىسى رەتىندە قالىبەك قوبلاندين تاعايىندالدى. ءبىز وعان وسى ماسەلەنى ەگجەي-تەگجەيلى تانىستىردىق. ول دا وعان مۇددەلىلىك تانىتتى. سول سەبەپتى ءبارى دە وڭ شەشىمىن تاۋىپ قالاتىن شىعار دەپ ويلايمىن.
– اڭگىمەڭىزگە راحمەت!

اڭگىمەلەسكەن
ەسەنگۇل كاپقىزى

الماتى – ۇلانباتىر – الماتى

ۇقساس جاڭالىقتار

Back to top button