وڭتۇستىكتە توعىز كۇن ناۋرىز!

وڭتۇستىك قازاقستان وبلىسىنىڭ اكىمى
ا.مىرزاحمەتوۆتىڭ باستاماسىمەن بىلتىر 14-22 ناۋرىز ارالىعىندا وبلىس ناۋرىز
مەيرامىن توعىز كۇن ەرەكشە جاعدايدا اتاپ وتكەن ەدى. وتكەن جىلى ءار كۇنگە اتاۋ
بەرىلىپ ۇيىمداستىرىلعان تاربيەلىك ءىس-شارالار جالپىحالىقتىق مەرەكەنىڭ
ءمان-مازمۇنىن اشۋعا سۇبەلى ۇلەس قوستى. وبلىستىڭ بۇل يگى باستاماسىن رەسپۋبليكالىق
بۇقارالىق اقپارات قۇرالدارى دۇرىس ءتۇسىنىپ،
جوعارى دارەجەدە اقپاراتتىق قولداۋ ءبىلدىردى. ءتىپتى، قر پارلامەنتى
سەناتىنىڭ دەپۋتاتتارى دا وڭتۇستىك قازاقستان وبلىسىنىڭ باستاماسىن بۇكىل ەل
اۋماعىندا ۇلگى ەتۋ كەرەكتىگىن ايتىپ، ۇكىمەتكە دەپۋتاتتىق ساۋال جولدادى.

سوندىقتان، بيىل دا ناۋرىز  مەيرامى وبلىس كولەمىندە جالپىحالىقتىق  سيپاتتا تويلانىپ، وتكەن جىلى قولعا الىنعان
ءىس-شارالار جالعاساتىن تاپپاق.

سونىمەن…

14 ناۋرىز «تاعزىم كۇنى». قازاق حالقىنىڭ ەسكى جىل ساناۋى بويىنشا كوكتەم وسى
كەزدە كەلەدى دەپ ەستەپتەلگەن. ەلىمىزدىڭ باتىس وڭىرلەرىندە بۇل كۇنى «كورىسۋ»
امالى جاسالادى. «ءولى  رازى بولماي ءتىرى
بايىمايدى» دەگەن حالقىمىز ءۇشىن اتا-بابالار رۋحىنا تاعزىم ەتۋ ماڭىزدى. ونىڭ
ۇستىنە بيىلعى 14 ناۋرىز اپتانىڭ  جۇما
كۇنىنە سايكەس كەلىپ وتىر. سوندىقتان، بۇل كۇنى مەشىتتەردە ارنايى قۇران
باعىشتالىپ، جاستار وتان قورعاۋشىلارعا ارنالعان ەسكەرتكىشتەرگە گۇل شوقتارىن
قويادى.

15 ناۋرىز «الاس كۇنى». «الاس» دەگەنىمىز تازارۋ دەگەن ماعىنانى
بىلدىرەدى. وبلىس اۋماعىندا ۇلىستىڭ ۇلى كۇنى
قارساڭىندا جالپىحالىقتىق سەنبىلىك ۇيىمداستىرىلىپ، ارىق-اتىزدار
تازالانادى.

16 ناۋرىز «بەرەكە» كۇنى. بۇل كۇنى وبلىس اۋماعىندا قايىرىمدىلىق شارالارى
ۇيىمداستىرىلادى. بۇل قازاقتىڭ ناۋرىز قارساڭىندا ۇيىمداستىراتىن  «شۇلەن تاراتۋ» ءداستۇرىنىڭ  جاڭعىرعان ءتۇرى بولىپ سانالادى. بۇرىن بايلار
تۇرمىسى تومەن وتباسىلار مەن مۇقتاج جاندارعا وسى كۇنى ايرىقشا كومەك قولدارىن
سوزعان. سول ءداستۇردىڭ جالعاسى «بەرەكە» كۇنى جاسالادى.

17 ناۋرىز «كوكتەم
شۋاعى»
. وبلىس باسشىلارى، قالا جانە اۋدان اكىمدەرى
ارداگەرلەرمەن كەزدەسىپ، كوكتەمنىڭ كەلۋىمەن قۇتتىقتايدى.
جاستار وبلىستاعى قاريالارعا كومەك كورسەتىپ، قايىرىمدىلىق شارالارىن وتكىزەدى.

18 ناۋرىز «ءونىس
كۇنى».
  ناۋرىز مەيرامى قارساڭىندا ومىرگە كەلگەن سابيلەر
مەن ولاردىڭ اتا-انالارىن قۇتتىقتاپ، شاعىن سىي-سياپاتتار جاسالادى. ناۋرىز مەرەكەسىنە
وراي وبلىس اۋماعىنداعى ساياباقتاردا كوشەت وتىرعىزىلادى.

19 ناۋرىز «جايناۋ كۇنى». مەرەكەلىك
شارالاردىڭ بىرقاتارى وسى كۇننەن باستاۋ الادى. قالاداعى قوعامدىق كولىكتەرگە
ۇلىستىڭ ۇلى كۇنىمەن قۇتتىقتاۋلار ىلىنەدى. مەرەكەگە وراي ورتالىق كوشەلەر
بەزەندىرىلەدى. جاستاردىڭ قاتىسۋىمەن مەرەكەلىك اۆتوشەرۋ ۇيىمداستىرىلادى.

20 ناۋرىز «شاتتىق كۇنى».  ەتنو-مادەني ورتالىقتاردىڭ كونتسەرتتىك باعدارلامالارى مەن مەرەكەگە
ارنالعان  سپورتتىق جارىستار وسى كۇنى
باستالادى.

21 ناۋرىز «ۇيلەسىم كۇنى». بۇل كۇنى كۇن مەن ءتۇن تەڭەلىپ، ادەمى
ۇيلەسىمدىلىككە كەلەدى. 22-ءسى كۇنگى تاڭدى قارسى الۋعا ورتالىق الاڭعا جاستار  جينالىپ، سالتاناتتى مەيرام تاڭدى كۇتىپ الۋمەن
باستالادى. جاستار «سەلتەتكىزەر، «ۇيقىاشار» داستۇرلەرىن جاڭعىرتىپ، ءبىر-بىرىنە جاساعان
سىيلىقتارىن تاپسىرادى.

22 ناۋرىز « ۇلىس كۇنى». مەرەكەلەردىڭ تورەسى سانالاتىن ۇلىستىڭ ۇلى كۇنىنە
ارنالعان مەرەكەلىك شارالار ۇيىمداستىرىلادى. بۇل كۇنى ۇلتتىق سپورت تۇرلەرىنەن
جارىستار ۇيىمداستىرىلىپ، مەرەكەنىڭ ۇلتتىق سيپاتتا اتالىپ وتۋىنە باسىمدىق
بەرىلەدى.  ناۋرىز مەرەكەسى وسىلايشا توعىز كۇن بويى جالپىحالىقتىق
سيپاتتا كەڭىنەن تويلانادى.

 

گۇلزينا بەكتاس

ۇقساس جاڭالىقتار

Back to top button