بي ونەرىن اسقاقتاتقان قازاق بالەروندارى

ەلىمىزدىڭ بەلگىلى بالەت ءارتىسى، «استانا وپەرانىڭ» جەتەكشى ءسوليسى، كوپتەگەن مارتەبەلى حالىقارالىق بايقاۋلاردىڭ گران-پري لاۋرەاتى باقتيار ادامجان «ميستەر ۆيرتۋوزنوست» اتالىمىندا بەدەلدى حالىقارالىق Dance Open بالەت سىيلىعىنىڭ (سانكت-پەتەربۋرگ، رەسەي) لاۋرەاتى اتاندى. تەاتردىڭ تاعى ءبىر ونەرپازى –  بالەت ءسوليسى سەرىك ناقىسپەكوۆ «ارابەسك-2018» بايقاۋىنىڭ (پەرم، رەسەي) لاۋرەاتى بولدى.

سانكت-پەتەربۋرگ حالىقارالىق Dance Open بالەت سىيلىعى حالىقارالىق Dance Open بالەت فەستيۆالى اياسىندا جىل سايىن تابىستالادى. فەستيۆالدىڭ ۇيىمداستىرۋ كوميتەتى الەمدىك بالەت جۇلدىزدارى اراسىنان جەڭىسكە ۇمىتكەرلەردى تاڭدايدى. وسى جىلى جارقىن جۇلدىزداردىڭ قاتارىنا باقتيار ادامجان دا ەندى.

فەستيۆال ساحناسىندا اتى الەمگە ءماشھۇر جۇلدىزدار توعىستى: Dance Open فەستيۆالىنىڭ ەڭ قىزعان ماۋسىمىنا الەمنىڭ 6 ەلىنەن 6 بالەت ترۋپپاسى قاتىستى، سونىمەن قاتار يتاليا، گەرمانيا، فرانتسيا، ۇلىبريتانيا، نيدەرلاندتار، يسپانيا، سلوۆەنيا، جاپونيا، كورەيا، قىتاي، ارمەنيا، ۋكراينا، بەلارۋس، رەسەي جانە ت.ب. ەلدەردىڭ سوليستەرى باس قوستى. لاۋرەاتتارعا 1913 جىلى ب.فرەدمان-كليۋزەلدىڭ ايگىلى بالەرينا ا.پاۆلوۆانىڭ اياعى ۇلگىسىندە جاساعان حرۋستال مۇسىنشە كوشىرمەسى تۇرىندە بىرەگەي ەستەلىك سىيلىقتار ۇسىنىلدى. «استانا وپەرا» تەاترىنىڭ جەتەكشى ءسوليسى باقتيار ادامجانعا حرۋستال مۇسىنشەنى ەكى دۇركىن وليمپيادا چەمپيونى، جەڭىل اتلەتيكادان الەمنىڭ رەكوردسمەنى سۆەتلانا ماستەركوۆا تابىستادى.

– سانكت-پەتەربۋرگ حالىقارالىق Dance Open بالەت فەستيۆالى بي ونەرىندەگى ەڭ جوعارعى ساناتتاعى شەبەرلىكتىڭ نىشانى بولىپ تابىلادى. وسىنداي دەڭگەيدەگى فەستيۆالگە قاتىسۋ – اسا زور مارتەبە عانا ەمەس، سونىمەن قاتار ۇلكەن جاۋاپكەرشىلىك. بارشا قۇرلىقتان كەلگەن ارتىستەردىڭ ونەرىن قازىلار قۇرامىنداعى الەمدىك حورەوگرافيانىڭ بەدەلدى تۇلعالارى مەن پەتەربورلىق اككى كورەرمەن قاتاڭ باعالادى. قازاق ونەرىنىڭ داڭقىن اسقاقتاتۋ ءۇشىن بارىمدى سالدىم. بۇل ماراپات قازاقستاندىق مەكتەپتىڭ الەمدىك بالەت مايتالماندارى اراسىندا لايىقتى قۇرمەتكە يە ەكەندىگىن دالەلدەسە كەرەك، – دەيدى باقتيار ادامجان.

تەاتردىڭ تاعى ءبىر ماڭدايالدى ونەرپازى سەرىك ناقىسبەكوۆ ە.ماكسيموۆا اتىنداعى «ارابەسك-2018» XV بالەت ارتىستەرىنىڭ اشىق بايقاۋىندا (پەرم، رەسەي) ەرەكشە ونەرىمەن كوزگە ءتۇستى. سوليست گەورگي زوريچتىڭ «ءبيشىنىڭ تەحنيكالىق تازالىعى مەن ورىنداۋشىلىق ارتىستىگى ءۇشىن» ارنايى سىيلىعىنا يە بولدى. وسى جىلى قاتىسۋشىلار اۋقىمى 15 مەملەكەت پەن رەسەيدىڭ 15 قالاسىن قامتىدى. كلاسسيكالىق حورەوگرافيالىق بايقاۋعا – 111، زاماناۋي حورەوگرافيا سايىسىنا 79 ادام قاتىسقان بولاتىن.

ارتىستەردىڭ حالىقارالىق بايقاۋلارداعى جەتىستىكتەرى قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ «رۋحاني جاڭعىرۋ» باعدارلاماسىن ىسكە اسىرۋ جولىنداعى تولاعاي تابىستاردىڭ قاتارىن تولىقتىرارى ءسوزسىز. وتاندىق ونەرپازدار قازاقستاندىق ونەردىڭ حالىقارالىق ارەناداعى تانىمالدىلىعىن ودان ءارى ارتتىرا بەرمەك.

 

ۇقساس جاڭالىقتار

Back to top button