نيكول پاشينيان ارمەنيا پرەمەرى قىزمەتىنە رەسمي تۇردە ۇسىنىلدى

ارمەنياداعى نارازىلىق قوزعالىسىنىڭ جەتەكشىسى، پارلامەنتتىك «ەلك» فراكتسياسىنىڭ باسشىسى نيكول پاشينيان ارمەنيا پرەمەرى قىزمەتىنە ۇمىتكەر رەتىندە رەسمي تۇردە بەكىتىلدى.

جاڭا پرەمەر-ءمينيستردى سايلاۋ ارمەنيا ۇلتتىق جينالىسىنىڭ (پارلامەنت) 1 مامىرداعى ارنايى وتىرىسىندا وتەدى. كونستيتۋتسيالىق رەفورمالاردان سوڭ پرەمەردى پارلامەنت بەكىتەدى، ءسويتىپ ەلدەگى بارلىق بيلىك پرەزيدەنتتىڭ ەمەس، پرەمەردىڭ قولىنا وتەدى.

پارلامەنتتە پرەمەر-مينيستر بولىپ سايلانۋ ءۇشىن ۇمىتكەرگە 53 داۋىس جيناۋ قاجەت. وپپوزيتسيالىق «ەلك» فراكتسياسىندا توعىز عانا ورىن بار. باسىم داۋىسقا بيلىك باسىنداعى رەسپۋبليكا پارتياسى يە – 58 ورىن.

جاپپاي نارازىلىق اكتسياسىنان سوڭ رەسپۋبليكالىقتار ءوز ۇمىتكەرىن پرەمەرلىككە ۇسىنبايتىنىن جاريالادى. دەگەنمەن ءىس باسىنداعى پارتيانىڭ پارلامەنتتەگى فراكتسياسىنىڭ جەتەكشىسى ۆاگرام باگداساريان پارتيانىڭ وپپوزيتسيا جەتەكشىسى ءۇشىن دە داۋىس بەرمەيتىنىن ەسكەرتتى.

وتكەن اپتادا پاشينيان «حالىق سەنىم بىلدىرسە»، ارمەنيا پرەمەرى اتانۋعا دايىن ەكەندىگىن مالىمدەدى.

ارمەنيادا جاپپاي نارازىلىق شەرۋلەرى ەكى اپتادان استام ۋاقىتتان بەرى توقتاعان جوق. وعان ون جىل بيلىك باسقارعان پرەزيدەنت سەرج سارگسياننىڭ پرەمەرلىككە تاعايىندالۋى سەبەپ بولدى. كونستيتۋتسيالىق رەفورما وتكىزگەن ۋاقىتتا ول پرەمەرلىككە تالاسپايتىنىن مالىمدەگەن ەدى. سارگسياننىڭ بيلىككە قايتىپ كەلۋىن ارمەنيا حالقى «ساياساتكەر الداپ كەتتى» دەپ ءتۇسىندى.

ارمەنيانىڭ كوپتەگەن قالالارىنداعى نارازىلىق اكتسيالارىنان سوڭ سارگسيان وتستاۆكاعا كەتتى، بىراق وپپوزيتسيا جاڭا پارلامەنتتىك سايلاۋ وتكىزۋىن تالاپ ەتتى. 42 جاستاعى پاشينيان ازاماتتىق مويىنسۇنباي بەيبىت اكتسياسى جالعاسا بەرەتىنىن جاريالاپ، «حالىق قوزعالىسى» جاقتاستارىن 1 مامىر – پرەمەر-ءمينيستردى سايلاۋ كۇنى «ارمەنيا الاڭدارى مەن كوشەلەردى تولتىرۋعا» شاقىردى.

ۇقساس جاڭالىقتار

Back to top button