«ۇيات بولماسىن!» – ۇلاعاتتى ۇعىم

پرەمەر-مينيستر باقىتجان ساعىنتاەۆتىڭ توراعالىعىمەن كەزەكتى ۇكىمەت وتىرىسى ءوتتى. جيىندا مال شارۋاشىلىعىن دامىتۋ جايى، كەدەندىك اكىمشىلەندىرۋدى جەتىلدىرۋ، مەديتسينالىق جابدىقتاردى ساتىپ الۋ، بىرىڭعاي نومەنكلاتۋراسىن قالىپتاستىرۋ جانە سەرۆيستىك قىزمەت كورسەتۋ ماسەلەلەرى تالقىلاندى.

ۇكىمەت مۇشەلەرى وتىرىستى مال شارۋاشىلىعىن دامىتۋ ماسەلەسىمەن باستادى. ەڭ الدىمەن اۋىل شارۋاشىلىعى ءبىرىنشى ۆيتسە-ءمينيسترى ارمان ەۆنيەۆ «ەتتى مال شارۋاشىلىعىن دامىتۋدىڭ 2018-2027 جىلدارعا ارنالعان باعدارلاماسىن» تانىستىردى. ۆيتسە-ءمينيستردىڭ سوزىنشە، اتالعان باعدارلامانى جۇزەگە اسىرۋ ارقىلى جاڭا مال ءوسىرۋشى فەرمەرلەر كلاسىن قۇرۋعا مۇمكىندىك تۋادى. باعدارلاما شەڭبەرىندە فەرمەرلىك شارۋاشىلىقتار سانىن 20 مىڭنان 100 مىڭعا، اۋىل تۇرعىندارى ءۇشىن اشىلاتىن جۇمىس ورىندارىن 100 مىڭنان 500 مىڭعا دەيىن ارتتىرۋ كوزدەلگەن. سونىمەن بىرگە، ءىرى قارا مال سانىن 7 ملن-نان 15 ملن-عا دەيىن كوبەيتىپ، سيىر جانە قوي ەتى ءوندىرىسىن 600 مىڭ توننادان 1،6 ملن تونناعا دەيىن ارتتىرۋ جوسپارلانىپ وتىر.

اۋىل شارۋاشىلىعى مينيسترلىگى ۇسىنىپ وتىرعان باعدارلاما شارۋا قوجالىقتارىن دامىتۋدى ماقسات ەتەدى. بۇل رەتتە «قازاگرو» حولدينگى فەرمەرلىك شارۋاشىلىقتار مەن شاعىن بيزنەس سۋبەكتىلەرىن قارجىلاندىرماق. «قازاگرو» حولدينگى باسقارما توراعاسى نۇرلىبەك ءمالىلوۆتىڭ ايتۋىنشا، فەرمەرلەر مالداردى ودان ارى كوبەيتۋ ءۇشىن تولدەيتىن مال ساتىپ الۋعا، اۋىل شارۋاشىلىعى تەحنيكاسىن جانە مال ازىعى وندىرىسىنە جابدىقتار الۋعا، مال ۇستايتىن ورىنداردى سالۋعا 15 جىل مەرزىمگە جىلىنا 4 پايىزدىق وسىممەن نەسيە الا الادى. بيىل فەرمەرلەردى قارجىلاندىرۋعا شامامەن 50 ملرد تەڭگە باعىتتالماق.

ال «اتامەكەن» ۇكپ باسقارما توراعاسى ابىلاي مىرزاحمەتوۆ مينيسترلىك ۇسىنعان جاڭا باعدارلامانىڭ مال شارۋاشىلىعىن دامىتۋعا وڭ ىقپال ەتەتىندىگىنە توقتالدى.  «بۇل باعدارلاما تەك ەتتى مال شارۋاشىلىعى مəسەلەلەرىن عانا ەمەس، سونداي-اق، جايىلىمداردى ءتيىمدى پايدالانۋ، سۋارمالى جايىلىمداردىڭ كولەمىن ارتتىرۋ سەكىلدى ماڭىزدى مəسەلەلەردى دە قوزعايدى. باعدارلاما جەم-ءشوپ ءوندىرىسىن دامىتۋعا باعىتتالعانىن ەرەكشە اتاپ وتكىم كەلەدى»، – دەدى ابىلاي مىرزاحمەتوۆ. كاسىپكەرلەر پالاتاسىنىڭ توراعاسى قۋاتتىلىعى جىلىنا 180 مىڭ مال سوياتىن ەت كومبيناتىنىڭ جوباسى جايىندا ءسوز قوزعادى. ونىڭ ايتۋىنشا، Inalca Eurasia كومپانياسى جوبا قۇرىلىسىن مامىر ايىنىڭ سوڭىندا باستايدى.

جاڭا باعدارلامانىڭ تۇجىرىمدارىنا قاتىستى بىرقاتار وبلىس اكىمدەرى مەن ۆيتسە-پرەمەر، اۋىل شارۋاشىلىعى ءمينيسترى ومىرزاق شوكەەۆ ءسوز سويلەدى. ال تاقىرىپتى قورىتىندىلاعان ۇكىمەت باسشىسى باقىتجان ساعىنتاەۆ: «جاسىراتىن نەسى بار، كەزىندە ءبىز 2010-2016 جىلى 60 مىڭ ءىرى قارا مال ەتىن سىرتقا ەكسپورتتايمىز دەپ مىندەتتەمە العان بولاتىنبىز. اقىرى سول مىندەت ورىندالمادى. ءارتۇرلى سەبەپتەرمەن، ارينە، قازىر ونى تالقىلاۋىڭ قاجەتى جوق. 2016 جىلى ءبىز بار بولعانى 6،8 مىڭ توننا ەت ەكسپورتتاساق، 2017 جىلى 5 مىڭ توننا ءىرى قارا مال ەتى سىرتقا شىقتى. ەندى قازىر ەلباسىنىڭ تىكەلەي ارالاسۋىمەن قىتايعا جىلقى ەتى مەن قوي ەتىن كىرگىزۋ بويىنشا كەدەرگىلەر الىنىپ تاستالدى. اراب امىرلىگىمەن دە ءىرى قارا مال ەتىن ساتىپ الۋ، كىرگىزۋ كەدەرگىلەرى دە الىنىپ تاستالدى. قىتايمەن ءىرى قارا مال ەتى بويىنشا جۇمىس جىل سوڭىنا دەيىن اياقتالادى. الداعى ۋاقىتتا مال  سانىن كوبەيتىپ، ەكپورتقا شىعارۋعا مۇمكىندىكتەر بار»، – دەدى. ءسوز سوڭىندا پرەمەر-مينيستر ومىرزاق شوكەەۆكە قاراتا وتىرىپ: «ۇلكەن تاپسىرما، مىندەت قويىلىپ وتىر. «اسپانداعى قۇستى ۇياتقا قالدىراتىن جەردەگى جەم» دەيدى، سول سەبەپتى ۇلكەن تاپسىرمانى ورىنداۋ بارىسىندا ومىرزاق ەستاي ۇلى، ەلباسى مەن حالىقتىڭ الدىندا تاعى دا ۇياتقا قالمايىق. باقىلاۋ سىزدە»، – دەپ سيپاي قامشىلاپ ءوتتى.

ودان ءارى ۇكىمەت مۇشەلەرى كەدەندىك اكىمشىلەندىرۋدى جەتىلدىرۋ ماسەلەلەرىن تالقىلاۋعا كوشتى. بۇل ماسەلە بويىنشا قارجى ءمينيسترى باقىت سۇلتانوۆ پەن اقپارات جانە كوممۋنيكاتسيالار ءمينيسترى داۋرەن اباەۆ بايانداما جاسادى. مينيسترلەر «استانا-1» اقپاراتتىق جۇيەسى جوباسىن جۇزەگە اسىرۋ بارىسىمەن تانىستىردى. «بيىلعى 1 سəۋىردەن باستاپ يمپورت بويىنشا جəنە قالعان كەدەندىك رəسىمدەر بويىنشا «استانا-1» اقپاراتتىق جۇيەسى جۇمىس ىستەۋدە. بۇگىنگى تاڭدا يمپورت بويىنشا تاۋارلارعا ارنالعان 16،3 مىڭ دەكلاراتسيا رەسىمدەلگەن، ودان تاۋارلارعا ارنالعان دەكلاراتسيالاردىڭ 90 پايىزى «جاسىل ءدəلىز» ارقىلى اۆتوماتتى رەجىمدە شىعارىلدى»، – دەپ اتاپ ءوتتى باقىت سۇلتانوۆ.

ال اقپارات جانە كوممۋنيكاتسيالار ءمينيسترى داۋرەن اباەۆ ءساۋىر ايىنان باستاپ «استانا-1» اقپاراتتىق جۇيەسى مەن ونى «ە-ليتسەنزيالاۋ» مەملەكەتتىك دەرەكتەر قورىمەن ىقپالداستىرۋ جۇزەگە اسىرىلعانىنا توقتالدى. جوبانى جۇزەگە اسىرۋ بارىسىندا ارنايى جول كارتاسىنىڭ ازىرلەنىپ، بەكىتىلگەنى دە ايتىلدى. جاڭا جۇيە بويىنشا تالاپ ەتىلەتىن قۇجاتتار سانى ازايتىلىپ، قىزمەت كورسەتۋ ۋاقىتى 26 جۇمىس كۇنىنەن 8 جۇمىس كۇنىنە قىسقارتىلماق. قازىرگى ۋاقىتتا 63 كەدەن بەكەتى جەردەگى بايلانىس ارنالارى ارقىلى، 8 وتكىزۋ بەكەتى – سپۋتنيكتىك بايلانىس ارقىلى جەلىگە قوسىلعان.

كۇن تارتىبىندەگى كەلەسى ماسەلە – مەديتسينالىق جابدىقتاردى ساتىپ الۋ، بىرىڭعاي نومەنكلاتۋراسىن قالىپتاستىرۋ جانە سەرۆيستىك قىزمەت كورسەتۋ. اتالمىش تاقىرىپ بويىنشا دەنساۋلىق ساقتاۋ ءمينيسترى ەلجان ءبىرتانوۆ ەسەپ بەردى. مينيستر كەلتىرگەن دەرەكتەرگە سۇيەنسەك، جاراقتاندىرۋدىڭ ەڭ تومەنگى نورماتيۆتەرىنە ساي مەديتسينالىق تەحنيكامەن جاراقتاندىرۋدىڭ ورتاشا ۇلەسى – 65،2 پايىز. سونداي-اق، ۆەدومستۆو باسشىسى مەملەكەتتىك دەنساۋلىق ساقتاۋ ۇيىمدارىنداعى مەديتسينالىق تەحنيكانىڭ 35 پايىزدان استامى توزعانىن اتاپ ءوتتى. 2016-2018 جىلدار ارالىعىندا جالپى سوماسى 128 ملرد تەڭگەگە مەديتسينالىق تەحنيكا ساتىپ الىنعان. بۇدان بولەك جىل سايىن جەرگىلىكتى اتقارۋشى ورگاندار ماتەريالدىق-تەحنيكالىق جاراقتاندىرۋعا جالپى سيپاتتاعى ترانسفەرتتەر بولەدى ەكەن. «مەملەكەت باسشىسىنىڭ تاپسىرمالارىن ورىنداۋ ءۇشىن دەنساۋلىق ساقتاۋ مينيسترلىگى مەديتسينالىق تەحنيكانى پايدالانۋ تيىمدىلىگىن تالداۋ ماقساتىندا 2017 جىلعى مامىر-ماۋسىم كەزەڭدەرىندە 2012-2016 جىلدار ارالىعىندا ساتىپ الىنعان تەحنيكاعا كەزەڭ-كەزەڭمەن تەكسەرىس جۇرگىزدى. قۇنى 5 ملن-نان استام تەڭگە تۇراتىن مەديتسينالىق تەحنيكاعا تالداۋ جاسالدى. جۇرگىزىلگەن اۋديت   قورىتىندىسى بويىنشا زاڭ بۇزۋشىلىقتار انىقتالىپ، ءتيىستى شارالار   قابىلداندى»، – دەدى ەلجان ءبىرتانوۆ.

سونىمەن قاتار، دەنساۋلىق ساقتاۋ ءمينيسترى جىل سوڭىنا دەيىن مەديتسينالىق ۇيىمداردى تسيفرلاندىرىپ، ولارعا قىمبات تۇراتىن مەديتسينالىق جابدىقتاردى قوسۋ ارقىلى بارلىق مەملەكەتتىك دەنساۋلىق ساقتاۋ ۇيىمدارىندا مونيتورينگ جۇيەسىن ەنگىزۋدىڭ جوسپارلانعانىن اتاپ ءوتتى. ال جيىندى قورىتىندىلاعان ۇكىمەت باسشىسى باقىتجان ساعىنتاەۆ دەنساۋلىق ساقتاۋ مينيسترلىگىنە جەرگىلىكتى اتقارۋشى ورگاندارمەن جانە «اتامەكەن» ۇلتتىق كاسىپكەرلەر پالاتاسىمەن بىرلەسىپ، ءتيىستى جۇمىستاردى جالعاستىرۋ تۋرالى تاپسىرما جۇكتەدى.

 

 

ۇقساس جاڭالىقتار

Back to top button