«ДАРАБОЗДАН» ДАРА ШЫҚ…

Қазақ балалар әдебиетінің дамуына үлкен үлес қосып келе жатқан дәстүрлі халықаралық “Дарабоз” бәйгесі биыл жетінші рет өткізілмекші. Сол себепті “ZHERSU” корпорациясы мен Қазақстан Жазушылар одағы бірлесіп бәйгенің талаптарын жария етеді.

Бәйгеге балабақша тәрбиеленушілері мен 1-8 сынып оқушыларына арналған прозалық, сахналық қойылымдар қабылданады. Повестер 20-25 беттен, әңгімелер, ертегілер 10 беттен, топтама өлеңдер, балладалар, ертегі-өлеңдер, шағын поэмалар, сахналық қойылымдар 5-10 беттен аспауы – шарт. Бәйгеге балабақша бүлдіршіндеріне арналған қысқа әңгімелерден, топтама өлеңдерден басқа тек бір ғана шығарма жіберілуі тиіс.

Шығармалар компьютерлік стан­дарт­қа сай 14 кегльмен (аралық 1,5) теріліп, 3 дана етіп басылып, беттелуі қатаң талап етіледі.

Бәйге – жабық бәйге түрінде өтетіндіктен, автордың бүркеншік атының анықтамасы, аты-жөні, мекен жайы, байланыс телефоны жазылған парақ кіші конвертке салынып желімделіп, сыртына тек бүркеншік аты ғана жазылады. Кіші конверт салған үлкен конвертке үш дана шығарма салып желімдеп, сыртына мекен жайы, бүркеншiк аты немесе басқа бір лақап есім жазылуы керек.

Байқау шартына сай емес, бұрын жарық көрген, мерзімінен кешігіп келген шығармалар бәйгеге қатыстырылмайды. Бәйгеге барлық қаламгерлер, жас талапкерлер, шетелдегі қандастар қатысуына болады, тек бүгінгі қазақ әліпбиімен, яғни «кириллицамен» жазылуы міндетті.

Бәйгеге түскен шығармалар мына адрес бойынша қабылданады: 050008, Алматы қаласы, “Дарабоз” бәйгесіне, №010057505 куәлік иесіне.

Шығармалар 2012 жылдың 10 сәуіріне дейін қабылданып, бәйге қорытындысы халықаралық балаларды қорғау күні қарсаңында жарияланады.

Есенқұлқажы Маманов атындағы бас бәй­ге – Бір миллион теңге.

Бірінші бәйге (екеу) — 375 мың теңгеден;

Екінші бәйге (екеу) — 170 мың теңгеден;

Үшінші бәйге (үшеу) — 110 мың теңгеден;

Ынталандыру бәйгесі (төртеу) — 77 мың теңгеден.

Бәйге әділқазыларының шешімі тексерілуге жатпайды.

Байқау қорытындысы бойынша жүлде алған туындылар арнайы жинақ-қа топтастырылып, балабақша, мектеп кітапханаларына тегін таратылады. Кітап қазақ және орыс тілдерінде жарық көреді.

Халықаралық “Дарабоз “ бәйгесiнiң ұйымдастыру комиссиясы

Ұқсас жаңалықтар

Back to top button