ҰЛЫС ЖЫРЫ

Ұлыстың ұлы күнi Ақ пен Қара

Астасып — болады мәз Қарт пен Бала.

Теңелiп төрт құбыласы табар таупық,

Тағдырдың тауқыметiн тартқан Дала.

Айырылып бейпарасат пенделiктен,

Ереуiл ел тынысын ер кеңiткен.

Құлпырып қызыл-жасыл керуен-наурыз,

Қаулайды жас құрақтай көлге бiткен.

Ұлыс бұл — Жақсылықты жан қалаған,

Ақ бата адал асқа болған алаң.

Түйсiнiп әз болмысын, танып тегiн.

Аңдаған айырмасын Аңнан Адам.

Ұлыс бұл — Жамандықтың дiлiн кескен

Дос боп Қас атасының құнын кешкен.

Күллi әлем Күннiң алтын нұрына елтiп,

Жерде — ұл-қыз, Көкте — жұлдыз күлiмдескен.

Ұлыс бұл — Тәңiр-Ана иген күнi,

Қараға хақ теңдiгi тиген күнi.

Теңдессiз құдiретке айналады,

Адамзат табиғаттың сүйген құлы

ИРАН-ҒАЙЫП

 

Ұқсас жаңалықтар

Back to top button