Маусымның сегiзiнде болған Үкiмет отырысындағы негiзгi мәселе — ұлттық инновациялық жүйенi қалыптастыру және «электронды үкiметтi» құрудың тұжырымдамасын жасау болды. Мұндағы елдi елең еткiзген бiр жаңалық — мемлекеттiк тiлдiң қолданылу барысын ел Премьерiнiң қадағалауы. Ол «Тiлдер туралы» заң мен Тiлдердi дамытудың 2001-2010 жылға арналған бағдарламасының орындалу барысы туралы есептi тыңдады. Мәдениет министрi Дүйсен Қасейiновтiң айтуы бойынша, мемлекеттiк тiлдiң қазiргi жағдайы адам қызығарлықтай емес. Мемлекеттiк тiлдi жүзеге асыру барысын жеделдету үшiн министр Тiл саясаты жөнiндегi департаменттiң рөлiн күшейтудi ұсынады. Ол тiптi бұл департаменттiң Комитет деңгейiне жеткенi жөн деп есептейдi. Ал Ауыл-шаруашылығы министрiнiң I орынбасары Асқар Мырзахметов Ауылшаруашылығы министрлiгi 2006 жылдан бастап мемлекеттiк тiлге толықтай көшедi деген мәлiмдеме жасады.
Премьер-министр мемлекеттiк қызметкерлерден мемлекеттiк тiлде iс-қағаздарын жүргiзудi талап ету керек дегендi айтты. Қазiргi мәлiмет бойынша, iс-қағаздарының 90%-i орыс тiлiнде жүргiзiледi. Даниал Ахметов бұл мәселеге жарты жылдан кейiн айналып соғатындығын бiлдiрдi. Әуелi таяу арада министрлердiң мемлекеттiк тiлдi қалай бiлетiндiгiн сынақтан өткiзу де жоспарланған көрiнедi.
Сөз бар, ал нақты iске қашан көшерiмiздi құдай бiлсiн. Премьердiң бұл игi iсiн құптай отырып, жарты жылдан кейiн сайлау аяқталып, бәрi орнына келген соң, қайтадан таз қалпымызға түсемiз бе деген күмән да жоқ емес.
Есенгүл Кәпқызы