تاۋەلسىزدىكتىڭ جەمىسى – تىڭ وزگەرىستەر

قازاقستاننىڭ ەگەمەن ەل اتانىپ، ءوز الدىنا دەربەس مەملەكەت بولعانىنا بيىل 26 جىل. وسى ۋاقىت ارالىعىندا تاۋەلسىز ەلىمىزدىڭ ىرگەسىن مىقتاپ، شاڭىراعىن شايقالتپاۋ ءۇشىن اتقارىلعان شارۋالار شاش ەتەكتەن. اۋەلى شەكارامىزدى بەكىتتىك، اتا زاڭىمىزدى قابىلداپ، مەملەكەتتىك رامىزدەرىمىزدى بەلگىلەدىك.
1995 جىلى 30 تامىزدا بۇكىلحالىقتىق رەفەرەندۋمدا قابىلدانعان قازاقستان رەسپۋبليكاسىنىڭ كونستيتۋتسياسى ەل دامۋىنىڭ باعىتىن ناقتىلاپ بەردى. مەملەكەت باسشىسى تاۋەلسىزدىككە قول جەتكىزگەن العاشقى كۇندەردەن-اق تاۋەلسىز سوت، قۋاتتى قۇقىق قورعاۋ ورگاندارىن قۇرۋدى دەموكراتيالىق، قۇقىقتىق مەملەكەتتى نىعايتۋدىڭ باسىم باعىتتارىنىڭ ءبىرى رەتىندە بەلگىلەدى. ەلىمىزدە قۇقىقتىق سالاداعى شارالار جەدەل تۇردە جۇزەگە اسىرىلدى. مەملەكەتتىك بيلىكتىڭ ءبىر تارماعى – سوت جۇيەسىندە بولعان تىڭ وزگەرىستەرگە پرەزيدەنتتىڭ سارابدال ساياساتى سەرپىلىس بەردى.
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ پارلامەنتتىڭ ءVى شاقىرىلىمىنىڭ ءبىرىنشى سەسسياسىنىڭ اشىلۋىندا: «قازاقستاندىق سوت تورەلىگى مەن قۇقىق ءتارتىبى جۇيەسى كاسىبيلىك تۇرعىسىنداعى جاڭا ساپاعا يە بولدى. قازاقستاندىقتار سۋبەكتىلەرىنىڭ قۇقىقتارىن سوتتا قاراۋ دەڭگەيى ەندىگى جەردە ەىدۇ مەملەكەتتەرىنىڭ جوعارى ستاندارتتارىنا سايكەس كەلەدى»، – دەگەن بولاتىن. بۇگىندە تاۋەلسىز قازاقستان ازاماتتارىنىڭ سوتقا دەگەن سەنىمى ارتىپ كەلەدى. ونىڭ ءبىر دالەلى – ازاماتتاردىڭ زاڭدى قۇقىقتارى مەن بوستاندىقتارىن قورعاۋ ماقساتىندا سوتقا شاعىم بەرۋ سانىنىڭ كوبەيۋى، رەسپۋبليكا بويىنشا سوت ادىلدىگىن جۇزەگە اسىراتىن سۋديالار شتاتىنىڭ جىل سايىن ارتۋى.
تاۋەلسىز ەل اتانۋىمىزدىڭ باستى ناتيجەسى رەتىندە سوتتار مەن سۋديالاردىڭ مارتەبەسى كونستيتۋتسيالىق زاڭدارمەن بەلگىلەندى، سوتتار ءبىر جۇيەگە بىرىكتىرىلىپ، سوت قۇرىلىسى مەن سوت ءىسىن جۇرگىزۋدىڭ وڭتايلى جانە ءتيىمدى نەگىزى قالاندى.
ەندىگى مىندەت – سوت جۇيەسى، سوت ادىلدىگى ۇستەم دەپ تانىلعان الدىڭعى قاتارلى 30 مەملەكەتتىڭ قاتارىنا ەنۋ. تاۋەلسىز قازاق ەلى بۇل مەجەنى دە ەڭسەرەرى انىق.

ارىسباي تىلەگەنوۆ،
تۇركىستان قالالىق سوتىنىڭ
توراعاسى مىندەتىن اتقارۋشى

ۇقساس جاڭالىقتار

Back to top button