«Delta Bank» قىزمەتى سوتپەن ءماجبۇرلى تۇردە توقتاتىلادى

«Delta Bank» قىزمەتى سوتپەن ءماجبۇرلى تۇردە توقتاتىلادى. قر ۇلتتىق بانكى توراعاسىنىڭ ورىنباسارى ولەگ سمولياكوۆ «Delta Bank» اق-نىڭ بانكتىك جانە وزگە دە وپەراتسيالاردى جۇرگىزۋگە، قۇندى قاعازدار نارىعىندا قىزمەت اتقارۋعا ارنالعان ليتسەنزياسىنىڭ قايتارىلىپ الىنۋىنا قاتىستى باق وكىلدەرىنەن ءتۇسىپ جاتقان ساۋالدارعا جاۋاپ بەردى، دەپ حابارلايدى قازاقپارات.

«Delta Bank» اق-تى ليتسەنزيادان ايىرۋ تۋرالى شەشىم كەلەسى فاكتورلاردىڭ بولۋىنا نەگىزدەلگەن. ءبىرىنشى كەزەكتە،  زاەمشىلاردى نەسيەلەۋگە مۇمكىندىك بەرگەن كرەديتتىك تاۋەكەلدەردى باسقارۋ بويىنشا ىشكى پروتسەدۋرالاردىڭ جەتكىلىكسىزدىگى، تۇراقسىز قارجىلىق جاي-كۇيدىڭ بولۋى، سونىمەن قاتار ساپالى كەپىلمەن قامتاماسىز ەتىلمەگەن زايمداردى بەرۋ كرەديت بويىنشا وتەۋ مەرزىمى ءوتىپ كەتكەن بەرەشەكتىڭ ايتارلىقتاي وسىمىنە تۇرتكى بولدى. ماسەلەن، 2017 جىلدىڭ 1 قازانىندا وتەۋ مەرزىمى ءوتىپ كەتكەن زايمدار بانكتىڭ ۇارىز قورجىنىڭ 99،7 پايىزىن (314،8 ملرد تەڭگە) قۇرادى»، – دەدى ول. ونىڭ ايتۋىنشا، ەكىنشىدەن، ليتسەنزيادان ايىرۋ تۋرالى شەشىم قابىلدانعان كەزدە بانكتىڭ كوررەسپوندەنتتىك ەسەپشوتتارىندا جانە كاسساسىندا قالعان اقشا 215،1 ملن تەڭگەنى قۇراعان. ال ءدال وسى كەزدەگى دەپوزيتورلار مەن كرەديورلار الدىنداعى وتەۋ مەرزىمى ءوتىپ كەتكەن مىندەتتەمە سوماسى شامامەن 79،8 ملرد تەڭگە بولعان. وسىعان بايلانىستى ۇلتتىق بانك ۇزاق ۋاقىتتان بەرى «Delta Bank» اق مەنەدجەرلەرىمەن جانە اكتسيونەرلەرىمەن اشىق سۇحبات جۇرگىزىپ، بانككە قارجىلىق قولداۋ قاجەت ەكەندىگىن بەلگىلەپ بەرگەن. الايدا بانكتىڭ ءىرى اكتسيونەرى تاراپىنان بانككە قارجىلاي قولداۋ كورسەتىلمەگەن. «بانك سەكتورىنداعى جيىنتىق اكتيۆتەر مەن مىندەتتەمەلەردەگى بۇل بانكتىڭ اكتيۆتەرى مەن مىندەتتەمەلەرىنىڭ ۇلەسى تومەن ەكەندىگىنە بايلانىستى بانكتىڭ ليتسەنزيادان ايىرىلۋى وزگە قارجىلىق ينستيتۋتتارعا قانداي دا ءبىر تاۋەكەل اكەلمەيتىندىگىن اتاپ وتەمىز. قر ۇلتتىق بانكى توراعاسىنىڭ 2017 جىلعى 2 قاراشاداعى №402 بۇيرىعىمەن ۋاقىتشا اكىمشىلىك تاعايىندالىپ، وعان بانكتىڭ بارلىق باسقارۋ ورگاندارىنىڭ وكىلەتتىگى بەرىلدى. ۋاقىتشا اكىمشىلىك سوتپەن تاراتۋ كوميسسياسى تاعايىندالعانعا دەيىن جۇمىس ىستەيتىن بولادى»، – دەدى ولەگ سمولياكوۆ.   ۇب توراعاسى ورىنباسارىنىڭ سوزىنە قاراعاندا، 3 قاراشادان باستاپ كليەنتتەردىڭ جانە بانكتىڭ بانكتىك ەسەپشوتتارى بويىنشا بارلىق وپەراتسيالار توقتاتىلدى. تەك وكىلەتتى ورگانداردىڭ نورماتيۆتىك-قۇقىقتىق اكتىلەرىندە كوزدەلگەن شىعىستارمەن بايلانىستى بانككە تۇسەتىن اقشالاردى اۋدارۋ عانا جۇرگىزىلەدى. «قر ۇلتتىق بانكى بەلگىلەنگەن زاڭنامالىق تارتىپپەن سوتقا بانك قىزمەتىن ءماجبۇرلى تۇردە توقتاتۋ تۋرالى ارىز بەردى»، – دەدى ول. بۇعان قوسا، ول اتالعان بانك جەكە تۇلعالاردىڭ دەپوزيتتەرىن مىندەتتى كەپىلدەندىرۋ جۇيەسىنە قاتىسۋى ەكەندىگىن ەسكەرتىپ وتەدى. ونىڭ دەرەگىنشە، تەڭگە تۇرىندەگى دەپوزيت بويىنشا كەپىل بەرىلگەن سوما 10 ملن تەڭگە دەيىنگى، ال شەتەل ۆاليۋتاسىندا 5 ملن تەڭگەگە دەيىنگى سومانى قۇرايدى. وسىعان بايلانىستى دەپوزيتورلارعا بەلگىلەنگەن تارتىپپەن كەپىل بەرىلگەن سوما وتەلەدى.

ۇقساس جاڭالىقتار

Back to top button