اسقار مامين جۇمىس ساپارىمەن – وڭتۇستىك قازاقستاندا

   بۇگىن قر پرەمەر-ءمينيسترىنىڭ ءبىرىنشى ورىنباسارى اسقار مامين باستاعان جۇمىسشى توپ ىسساپارمەن وڭتۇستىك قازاقستان وبلىسىنا باردى.  

بۇل تۋرالى وقو اكىمىنىڭ ءباسپاسوز قىزمەتى حابارلادى.  دەلەگاتسيا قۇرامىندا قر ينۆەستيتسيالار جانە دامۋ ۆيتسە-ءمينيسترى رومان سكليار،  قر ۇلتتىق ەكونوميكا ۆيتسە-ءمينيسترى ايباتىر جۇماعۇلوۆ، قازاقستان تەمىر جولى» ۇك» اق پرەزيدەنتى الپىسباەۆ قانات، «قازاۆتوجول» ۇك» اق باسقارما توراعاسى ەرمەك قيزاتوۆ،  «بايتەرەك» ۇبح» اق باسقارما توراعاسىنىڭ ورىنباسارى ءانۋار ومارحودجاەۆ بار. ەڭ الدىمەن اسقار مامين شىمكەنتتەگى حالىقارالىق اۋەجايىنىڭ جۇمىسىن ارالاپ كورىپ، وندا «شىمكەنت اۋەجايى» اق باسقارما توراعاسىنىڭ ورىنباسارى ساكەن مامىربەكوۆتىڭ اۋەجايدىڭ جۇمىسى تۋرالى بايانداماسىن تىڭدادى. بۇدان بولەك، جۇمىسشى توپ وڭتۇستىك قازاقستان وبلىسىنىڭ اكىمى ج.تۇيمەباەۆتىڭ قاتىسۋىمەن وتكەن اۋەجايدى قايتا قۇرۋ بويىنشا جيىنعا قاتىستى.  شىمكەنت اۋەجايى 1968 جىلى اشىلعان. «شىمكەنت» اۋەجايى شەكتەۋسىز اۋە كەمەلەرىنىڭ بارلىق تيپتەرىن قابىلدايتىن حالىقارالىق اۋەجاي بولىپ كەلەدى. اۋەجاي تاۋلىك بويى جۇمىس ىستەيتىن  كەدەندىك، شەكارالىق جانە سانيتارلىق-كارانتيندىك باقىلاۋدى تولىق كولەمدە قامتاماسىز ەتەدى. بۇل جەردەن قازاقستان رەسپۋبليكاسىنىڭ بارلىق وبلىستىق ورتالىقتارىنا، سونىمەن قاتار تمد ەلدەرىنىڭ، الىس جانە جاقىن شەتەلدىڭ قالالارىنا تۇراقتى رەيستەر جۇزەگە اسىرىلادى. ساپار بارىسىندا دەلەگاتسيا مۇشەلەرى «وڭتۇستىك» كولىكتىك-لوگيستيكالىق ورتالىعىنىڭ جۇمىسىمەن تانىستى. قازاقستاننىڭ ەۋرازيالىق كولىك-لوگيستيكالىق حابىنا اينالۋى بويىنشا مەملەكەتتىك «نۇرلى جول» باعدارلاماسى اياسىندا قۇرىلعان «وڭتۇستىك» كولىك-لوگيستيكالىق ورتالىقتىڭ اۋماعى 92 گەكتاردى قۇرايدى.  قازىرگى تاڭدا اتالعان ايماقتا جەكەمەنشىك 8 ينۆەستيتسيالىق جوبا جۇزەگە اسىرىلۋدا، ونىڭ ىشىندە «Kazakhstan Logistics group» جشس مەن «زەردە» نپو جشس كومپانيالارى ءوز جوبالارىنىڭ ءبىرىنشى كەزەڭىن ىسكە قوستى. بۇگىنگى تاڭدا ىسكە قوسىلعان قويمالاردىڭ جالپى اۋماعى 18 326 شارشى مەتردى قۇرايدى. ال وسى جىلدىڭ سوڭىنا دەيىن «Continental Logistics Shymkent» جشس-ءنىڭ 20 736 شارشى مەتر قويماسى مەن «زەردە» جشس-ءنىڭ 5 760 شارشى مەتر قويماسى بار ينۆەستيتسيالىق جوباسىنىڭ ەكىنشى كەزەڭى ىسكە قوسىلماق. قالعان ينۆەستيتسيالىق جوبالاردىڭ قۇرىلىس-مونتاجداۋ جۇمىستارىنىڭ 30 پايىزى اياقتالىپ وتىر. بۇدان سوڭ، اسقار مامين ورداباسى اۋدانىندا ورنالاسقان يندۋستريالاندىرۋ كارتاسىنا ەنگەن «اگرو V» كىرپىش زاۋىتىن ارالاپ كوردى.  جوبا قۇنى 527 ملن. تەڭگەنى قۇرايتىن زاۋىت جىلىنا 25 ميلليون كىرپىش ءونىمىن شىعارادى. بۇندا 60 ازامات جاڭا جۇمىس ورىنىمەن قامتاماسىز ەتىلگەن. زاۋىت قىسى-جازى جۇمىس جاسايدى. مۇنداعى تەحنولوگيالىق قۇرال-جابدىقتار ارنايى تاپسىرىسپەن قىتاي حالىق رەسپۋبليكاسىنان الىنعان. جابدىقتار كوپ كومپونەنتتى قوسپالاردان جوعارى ساپالى ءونىم شىعارۋعا جانە تولىعىمەن اۆتوماتتاندىرىلعاننىڭ ەسەبىنەن كىرپىشتەردىڭ گەومەتريالىق پىشىندەرىن ساقتاۋعا مۇمكىندىك بەرەدى. سونداي-اق، كىرپىشتەردى كۇيدىرۋگە ارنالعان پەشتىڭ ەلىمىزدە بالاماسى جوق.

ۇقساس جاڭالىقتار

Back to top button