ۇشقىش بولعىڭ كەلسە...

ەلىمىزدە اۆياتسيا ماماندارىنىڭ تاپشىلىعى جىلدان جىلعا ارتىپ كەلەدى. اپتا باسىندا «ەير استانا» ۇلتتىق اۋە كومپانياسى وسى ماسەلە توڭىرەگىندە ءباسپاسوز كونفەرەنتسياسىن وتكىزگەن بولاتىن. جيىندا اۋە كەمەلەرىنە قاجەتتى بورت سەرىكتەر، ۇشقىشتار جانە تەحنيكالىق مامانداردىڭ دايىندىعى مەن جۇمىسقا تۇرۋى تالقىلاندى.

2020 جىلعا دەيىن اۋە كومپانياسى ۇشاقتاردىڭ سانىن ەكى ەسەلەمەك. قازىر كومپانيانىڭ ەنشىسىندە 31 ۇشاق بار. اۋە كومپانيادا 5 مىڭ قىزمەتكەر جۇمىس ىستەيدى. ۇشاقتاردىڭ سانى كوبەيگەن سايىن اۆياتسيا ماماندارىنىڭ قاجەتتىلىگى تۋىندايدى. دەمەك، كادر دايىنداۋ قازىردەن باستالۋى كەرەك. «ەير استانا» اۋە كومپانياسىنىڭ پرەزيدەنتى پيتەر فوستەردىڭ ايتۋىنشا، ۇشقىشتار يسپانيا مەن يرلانديادا، ال بورت سەرىكتەر گەرمانيا، ۇلىبريتانيا جانە قازاقستاندا تاجىريبەدەن وتەدى. «اعىمداعى جىلدان باستاپ اۆياتەحنيكتەردى استانا قالاسىنداعى ءوزىمىزدىڭ ينجەنەرلىك-تەحنيكالىق ورتالىعىمىزدا PART-66 ستاندارتى بويىنشا وقىتۋدى باستايمىز. وسىلايشا، قىزمەتكەرلەردىڭ جەتىسپەۋشىلىگىن تولتىرىپ قويماي، سونداي-اق قازاقستاندىق جاستاردى جانە بەدەلدى مامانداردى تاربيەلەۋ ارقىلى ءوزىمىزدىڭ الەۋمەتتىك جاۋاپكەرشىلىگىمىزدى كورسەتەمىز»، – دەيدى «ەير استانا» اق پرەزيدەنتى پيتەر فوستەر.

2009 جىلى ab-initio ۇشقىشتاردى دايىنداۋ باعدارلاماسى باستالعاننان بەرى 189 كادەت دايىندالىپ، قازىر كومپانيادا ەكىنشى ۇشقىشتار مەن كومانديرلەر قىزمەتىن اتقارىپ ءجۇر. جىل سايىن يسپانياداعى حەرەس ۇشۋ ورتالىعىندا جانە يرلاندياداعى كورك قالاسىندا 24 كادەت بىلىكتىلىگىن ارتتىرادى. 2018 جىلى كادەتتەر سانىن 40 ادامعا دەيىن ارتتىرۋ جوسپارلانىپ وتىر. وسى تۇرعىدا كومپانيا «ارمانىڭدى ىسكە اسىر» ناۋقانىن باستادى. بۇل باعدارلاما بويىنشا كەز كەلگەن قازاقستاندىق باعىن سىناپ كورە الادى. «ەير استانا» كومپانياسىنىڭ قىزمەتكەرلەردى باسقارۋ جانە اكىمشىلىك جونىندەگى ۆيتسە-پريزيدەنت ەۆگەنيا ءنيدىڭ ايتۋىنشا، رەسپۋبليكا ايماقتارىنداعى حالىق، اسىرەسە جاستار وزىنە سەنىمسىزدىك تانىتادى. ال جاڭا ناۋقان جاستاردى اۆياتسيا سالاسىنداعى ماماندىقتارعا قىزىعۋشىلىق تانىتىپ، باعىن سىناپ كورۋگە ارنالعان. «ەير استانا» اق قىزمەتكەرلەردى باسقارۋ جانە اكىمشىلىك ماسەلەلەر جونىندەگى ۆيتسە-پرەزيدەنت: «ءبىزدىڭ باعدارلامالارىمىز بىرەگەي بولىپ تابىلادى، سەبەبى وقىتۋ تولىعىمەن اۋە كومپانيا ەسەبىنەن جۇزەگە اسىرىلادى. وقۋدى بىتىرگەن ۇمىتكەرلەرگە حالىقارالىق ماقۇلداۋلار، سەرتيفيكاتتار مەن ليتسەنزيالار بەرىلەدى، بارلىق ەمتيحاندار ءساتتى وتكەننەن كەيىن جۇمىسقا ورنالاسۋعا كەپىلدىك بەرىلەدى. ءبىز مەكتەپ وقۋشىلارى مەن ستۋدەنتتەردى جانە اتا-انالاردى اۆياتسيالىق ماماندىقتارعا نازار اۋدارۋىن سۇرايمىز. اسپاندا قالىقتاۋدى ارماندايتىن جانە كوپ نارسەنى ۇيرەنۋگە دايىن قازاقستاننىڭ كەز-كەلگەن ازاماتى ءوزىن-ءوزى سىناپ كورە الادى. ءومىرىڭىزدى اۆياتسيامەن بايلانىستىرساڭىز، قىزىقتى ءارى تالاپ ەتىلەتىن ماماندىقتى الىپ شىعاسىز. بىزگە كەلىپ، ارمانىڭىزدى ىسكە اسىرىڭىز!»، – دەدى ول. «ارمانىڭدى ىسكە اسىر» ناۋقانىنا كامەلەتكە تولعان ءاربىر جاس قاتىسا الادى. باستى تالاپ – فيزيكا، ماتەماتيكاعا قابىلەتى مەن اعىلشىن ءتىلى ماشىقتارى.

كوماندير جانە تەحنيكالىق ۇشقىش ەرلان نۇرعاليەۆ ۇشاق تىزگىنىنە قالاي كەلگەنىن اڭگىمەلەپ بەردى. «2010 جىلدان باستاپ Fokker ۇشاعىندا، كەيىننەن Embraer ۇشقىشى بولدىم. بۇل ۇشاق – ەڭ كىشى جولاۋشى ۇشاقتاردىڭ ءبىرى. ال اعىلشىن ءتىلىن 42 جاسىمدا ۇيرەنە باستادىم. سەگىز ايدىڭ ىشىندە قاجەتتى دەڭگەيدە مەڭگەرىپ الدىم»، –  دەدى ۇشقىش.

ون بەس جىلدىڭ ىشىندە كومپانيا ءىرى تاسىمالداۋشى رەتىندە تانىلا الدى. پيتەر فوستەردىڭ مالىمەتىنشە، سوڭعى ءۇش-ءتورت جىلداعى بيزنەس مودەلدى وزگەرتۋ وڭ وزگەرىستەرگە الىپ كەلگەن. «اۋە كومپانياسى باتىس پەن شىعىس اراسىنداعى تاسىمالداۋشى، اتاپ ايتقاندا باتىس پەن شىعىستى جالعاستىرۋشى. ياعني، ترانزيتتىك مۇمكىندىكتى پايدالانىپ، قازاقستان ارقىلى قىتاي مەن رەسەي قالالارىنا، ءۇندىستان، تاياۋ شىعىس جانە ازيانىڭ بىرقاتار ەلدەرىنەن شىعىس ەۋروپاعا، رەسەيگە جولاۋشى تاسىمالدايمىز. قازاقستان حالقى – نەبارى 18 ميلليون. بۇل وتە كىشكەنتاي نارىق. ءبىزدىڭ باستى ارتىقشىلىعىمىز – جولاۋشى نارىعى ءىرى – رەسەي، قىتاي، ۇندىستانعا جاقىن ورنالاسقاندىعىمىز. ءبىزدىڭ بولاشاعىمىز كورشىلەس نارىقتارمەن بىرگە داميدى»، – دەدى فوستەر مىرزا.

ۇقساس جاڭالىقتار

Back to top button