مانچەستەر، ساعان مىڭ سالەم!

الماتى مەن مانچەستەردىڭ اراسى جاقىنداي تۇسپەك. ىنتىماقتاستىقتىڭ ەكى قالا ءۇشىن دە ءتيىمدى تۇستارى قازاقستاننىڭ ۇلىبريتانياداعى توتەنشە جانە وكىلەتتى ەلشىسى ەرلان ىدىرىسوۆ پەن مانچەستەر قالاسىنىڭ لورد-اكىمى ەددي نيۋماننىڭ كەزدەسۋىندە تالقىلاندى.

مانچەستەر – الەمدە ونەركاسىپتى ەڭ العاش قولعا العان قالا. قازىر ۇلىبريتانيانىڭ وندىرىستىك جانە ينجەنەرلىك-يننوۆاتسيالىق كلاستەرىنىڭ ورتالىعى سانالادى. بۇل قالا  ءوزىنىڭ ماشينا جاساۋ، توقىما ءوندىرىسى، حيميا جانە جەڭىل ونەركاسىپ، قايتا قالپىنا كەلەتىن ەنەرگيا كوزدەرى، تسيفرلى ەكونوميكا سالالارى بويىنشا وزىق تاجىريبەسىمەن تانىمال. سوندىقتان دا قازاقستاننىڭ ۇلىبريتانياداعى ەلشىسى ەرلان ىدىرىسوۆتىڭ مانچەستەر قالاسىنىڭ لورد-اكىمى ەددي نيۋمانمەن كەزدەسۋىندە ەڭ الدىمەن ەنەرگەتيكا، وزىق تەحنولوگيالاردى پايدالانۋ، يننوۆاتسيانى دامىتۋ، لوگيستيكا، كولىك ينفراقۇرىلىمى سالالارى بويىنشا كەلەلى ماسەلەلەر تالقىلاندى.

قازاقستان جانە بريتان وڭىرلەرى اراسىنداعى قارىم-قاتىناس اۋقىمىن كەڭەيتۋ ماقساتىندا تاراپتار ءبىرشاما سۇراقتاردى تارازىلادى. «الماتى حالقىنىڭ سانى 1،6 ملن ادامنان اسىپ جىعىلادى. ەتەگىندە اسەم تابيعاتى بار تاۋىمەن ەرەكشە، ونىڭ بيىكتىگى – 6 400 مەتر. بۇگىندە قالانىڭ بولاشاققا دەگەن ۇمتىلىسى بيىك، قازىردەن باستاپ ءححىى عاسىرعا نازارىن سالىپ وتىر. الماتىنىڭ مانچەستەر تەحنولوگيالىق حابىمەن تىعىز بايلانىس ورناتۋعا دەگەن قۇلشىنىسى ەرەكشە»، –  دەدى قازاقستاننىڭ ۇلىبريتانياداعى ەلشىسى ەرلان ىدىرىسوۆ.

كەزدەسۋدە سونداي-اق، يادرولىق قارۋدى تاراتپاۋ ماسەلەسى بويىنشا بايلانىستى كۇشەيتۋ تۋرالى دا ءسوز بولدى. ايتا كەتەتىنى، مانچەستەر – «اكىمدەر بەيبىتشىلىك ءۇشىن» باعدارلاماسىنىڭ بەلسەندى مۇشەسى. بۇل جاھاندىق باستاما يادرولىق قارۋسىز الەم يدەياسىن دامىتۋ ءۇشىن 1982 جىلى قولعا الىنعانى بەلگىلى. جانە ءوزىن يادروسىز ايماق دەپ اتاعان ءبىرىنشى بريتانيالىق قالا. شاھار باسشىسى ەددي نيۋمان يادرولىق قاۋىپسىزدىك پەن قارۋسىزداندىرۋ ماسەلەلەرى بويىنشا ىمىراسىز جانە بەلسەندى ۇستانىمى ءۇشىن قازاقستان پرەزيدەنتى نۇرسۇلتان نازارباەۆتى ەرەكشە قۇرمەتتەيتىندىگىن ايتتى.

– ءبىز قازاقستاننىڭ جانە ونىڭ كوشباسشىسىنىڭ يادروعا قارسى ساياسات ۇستاناتىندىعىنا وتە ريزامىز. مەنىڭشە، نۇرسۇلتان نازارباەۆ الەمنىڭ تۇكپىر-تۇكپىرىندەگى يادرولىق قارۋسىز الەم يدەياسىن ۇستاناتىندارعا ۇلگى بولىپ كەلەدى، – دەدى مانچەستەر قالاسىنىڭ لورد-اكىمى ەددي نيۋمان.

مانچەستەردىڭ لورد-اكىمى سونىمەن بىرگە قازاقستاندا جۇرگىزىلىپ جاتقان ەكونوميكالىق جانە الەۋمەتتىك رەفورمالارعا وڭ باعا بەرە وتىرىپ، مەملەكەتىمىزدىڭ حالىقارالىق قاۋىپسىزدىكتى كۇشەيتۋگە قوسقان ۇلەسىن ەرەكشە اتاپ ءوتتى. كەزدەسۋ سوڭىندا ەرلان ىدىرىسوۆ پىكىرلەر كىتابىنا جۇرەكجاردى لەبىزىن جازىپ، لورد-اكىمدى قازاقستانعا قوناق بولۋعا شاقىردى.

ۇقساس جاڭالىقتار

Back to top button