جاكىباەۆتىڭ ەسىمى جاڭعىردى

وتكەن اپتادا الماتى قالاسى اكىمدىگىنىڭ جانە ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ۇيىمداستىرۋىمەن، قازاقستاننىڭ حالىق ءارتيسى، قازاقستاننىڭ ەڭبەك سىڭىرگەن قايراتكەرى، تاۋەلسىز «پلاتينالى تارلان» سىيلىعىنىڭ يەگەرى قاسىم جاكىباەۆتىڭ قۇرمەتىنە ورناتىلعان ەسكەرتكىش تاقتانىڭ سالتاناتتى اشىلۋى بولدى.

وسىدان ءبىراز جىل بۇرىن «ۇنتاق جەپ وسكەن ۇرپاقتىڭ وكىلىمىز» دەپ گازەتىمىزگە سۇحبات بەرگەن قازاقتىڭ قالاقتاي عانا  قارا شالىنىڭ ەسىمىن ماڭگى ەسكە قالدىرۋ ماقساتىندا ءوزى تۇرعان ءۇيدىڭ بۇرىشىنا مەموريالدىق تاقتا ورناتىلدى. قازاق مادەنيەتى مەن ونەرىنە وشپەس ءىز قالدىرعان جان قۇستىڭ ۇياسىنداي عانا ەكى بولمەلى پاتەردە تۇرىپ-اق، ءومىرىنىڭ سوڭىنا دەيىن قازاق تەاتر ونەرىنىڭ جۇلدىزىن جارقىراتىپ جاعىپ كەتتى. سوناۋ 1948 جىلعى ەڭ العاشقى ا.تولستويدىڭ «التىن كىلت» ەرتەگىسىندەگى مىسىق بازيليو رولىنەن باستاپ، م.اقىنجانوۆتىڭ «التىن ساقا» مەن «ىبىراي التىنسارينىندە» – سارمان مەن جاقايى، س.مۇقانوۆتىڭ «ءمولدىر ماحابباتىندا»– قايراقباي،  س.بودىقوۆتىڭ «وتىرار ەرتەڭ قيرايدىسىندا» – بۇكىر،  ع.مۇسىرەپوۆ پەن ق.ىسقاقتىڭ «ۇلپان-ەسەنەيىندە» – توقاي، ش.ايتماتوۆ پەن م.شاحانوۆتىڭ «ميعۇلا تەرىسى ۇستىندەگى سوتىندا» شىڭعىس حان رولدەرىمەن بىرگە، شەتەلدىك اۆتورلاردىڭ قويىلىمدارىنداعى سومداعان وبرازدارى كوپشىلىكتىڭ كوڭىلىنەن ءالى دە وشە قويماعانى انىق. اسىرەسە، ۆ.شەكسپيردىڭ «گاملەتىندەگى» – پولوني، ف. شيللەردىڭ «ز ۇلىمدىق پەن ماحابباتىندا» – ۆۋرلە سىندى ءۇش جۇزگە تاياۋ كەيىپكەرلەرىمەن بىرگە قۋانىپ، بىرگە مۇڭايىپ جۇرگەن تالانتتىڭ ءومىرى دە، ونەرى دە ۇلگى-ونەگەگە تولى. قاسىم جاكىباەۆ اقساقال كينو سالاسىندا دا وزىندىك ءىز قالدىرىپ قانا قويماي، كەشەگى مەن بۇگىنگى كورەرمەن كوڭىلىندە مىقتاپ جاتتالىپ قالعان اكتەر. «دەرسۋ ۋزالا»، قازاق كينو ونەرىنىڭ التىن قورىنا ەنگەن «قان مەن تەر»، «جانسەبىل»، «ۇشەۋ»، «دانەكەر»، «وتىرار»، «ماحاببات ستانتسياسى» سىندى كوركەمفيلمدەردىڭ جۇگىن كوتەرگەن اكتەر «توعىسقان تاعدىرلار» تەلەسەرياسىندا دا جاڭاشا ءبىر كەيىپكە ەنىپ،  كەيىپكەرلەرىن سەندىرە الاتىنداي بەينەلەپ شىققان.

قازاق ونەرىنە ولشەۋسىز ەڭبەك سىڭىرگەن جانعا ارنالعان مەموريالدىق تاقتا اشۋ راسىمىنە استانا مەن الماتى قالالارىنان زيالى قاۋىم وكىلدەرى مەن ارىپتەستەرى، تۋعان-تۋىستارى قاتىستى.

Back to top button