تاريحي ورىندار دارىپتەلەدى

وڭتۇستىك قازاقستان وبلىسىندا بيىلعى جىلدىڭ سوڭىندا «كونە جەتىگەننىڭ سىرى» اتتى 13 سەريالى كينوحيكايا مەن «قاجىمۇقان»، «وتىراردى قورعاۋ»، «كيەلى قازىعۇرت» اتتى انيماتسيالىق فيلمدەردىڭ تۇساۋى كەسىلمەك. بۇل تۋرالى وڭىرلىك كوممۋنيكاتسيا ورتالىعىندا وتكەن ءباسپاساوز كونفەرەنتسياسىندا «وڭتۇستىك-فيلم» كينوستۋدياسىنىڭ ديرەكتورى باتىرحان داۋرەنبەكوۆ حابارلادى.

اتالعان تۋىندىلاردىڭ ءتۇسىرىلىم جۇمىستارىمەن ەلىمىزگە بەلگىلى «ساق» جانە «وڭتۇستىك-فيلم» كينوستۋديالارى اينالىسادى. بۇل تۋىندىلار وڭتۇستىك قازاقستان وبلىسى اكىمدىگىنىڭ قولداۋىمەن ءوڭىردىڭ كيەلى جانە تاريحي جەرلەرىن دارىپتەۋ مەن ءتۋريزمدى ناسيحاتتاۋ ماقساتىندا تۇسىرىلۋدە. «اتالعان تۋىندىلاردىڭ يدەيا اۆتورى – وڭتۇستىك قازاقستان وبلىسىنىڭ اكىمى جانسەيىت تۇيمەباەۆ. جىل باسىندا وبلىس اكىمى ءبىزدى ارنايى قابىلداپ، ىشكى ءتۋريزمدى دامىتۋعا سەبەپكەر بولاتىن كينو جانە انيماتسيالىق فيلمدەر تۇسىرۋگە تاپسىرما بەرگەن بولاتىن. كەيىننەن بيۋدجەتتەن قارجى ءبولدى. «كونە جەتىگەننىڭ سىرى» اتتى كينوحيكايانىڭ ءتۇسىرىلىم جۇمىستارىنا 30-عا جۋىق اكتەر تارتىلىپ، جۇمىس جۇيەلى تۇردە جالعاسۋدا»، – دەيدى باتىرحان قالداربەك ۇلى.

«كونە جەتىگەننىڭ سىرى» اتتى كينوجوبا جەلىسى وتە قىزىقتى. قازىعۇرت اسۋىنداعى جول جوندەۋ جۇمىسىمەن اينالىسىپ جاتقان ەكسكاۆاتورشى سىرتى شىرۋگە اينالعان تەرى قاپشىق تاۋىپ الادى. قاپشىقتىڭ ىشىنەن كونە جەتىگەن اسپابى شىعادى. ىشەكتەرى مەن اسىقتارى جوق بۇل اسپاپتىڭ سىرتقى بەتىندە ەسكى كونە تۇركى ارىپتەرىمەن جازىلعان جازۋدىڭ ىزدەرى كورىنەدى. ءفيلمنىڭ باستى كەيىپكەرى – سامال مەن ونىڭ دوسى نۇرجان جانە ارحەولوگ جاندوس ۇشەۋى جەتىگەننىڭ سىرتىنداعى ولەڭ شۋماقتارىنىڭ قۇپيا سىرلارىن اشۋعا تىرىسادى.

ءفيلمنىڭ باس رەجيسسەرى نۋريددين پاتتەەۆتىڭ ايتۋىنشا، كينو تۇركىستان، ارىستان باب، وتىرار، ساۋران، سايرام، اقسۋ-جاباعىلى، قازىعۇرت تاۋى، وگەم سەكىلدى تاريحي جانە تابيعاتى اسەم جەرلەردە تۇسىرىلۋدە. جالپى، فيلمگە 70 ملن تەڭگە ءبولىنىپ، ءار سەرياسىنا 6 ملن تەڭگە شىعىندالىپ جاتقان كورىنەدى.

 

ۇقساس جاڭالىقتار

Back to top button