نۇرسۇلتان نازارباەۆ: ءبىز دۇرىس باعىتتا ىلگەرىلەدىك

اپتا باسىندا پرەزيدەنت نۇرسۇلتان نازارباەۆ ەۋرازيالىق ۇكىمەتارالىق كەڭەس مۇشەلەرىمەن كەزدەستى. وتىرىس بارىسىندا  ەۋرازيالىق ەكونوميكالىق وداقتىڭ تسيفرلىق كۇن ءتارتىبىن ىسكە اسىرۋدىڭ نەگىزگى باعىتتارىن دايىنداۋ ، ەۋرازەق-قا مۇشە مەملەكەتتەردىڭ ەڭبەككەرلەرىن زەينەتاقىمەن قامتاماسىز ەتۋ تۋرالى شارت جوباسى، سونداي-اق، ەۋرازەق پەن يران رەسپۋبليكاسى اراسىندا ەركىن ساۋدا ايماعىن قۇرۋعا باعىتتالعان ۋاقىتشا كەلىسىمگە قول قويۋ بويىنشا كەلىسسوزدەر تالقىلاندى.

اتالمىش  جيىنعا قر پرەمەر-ءمينيسترى باقىتجان ساعىنتاەۆ، ارمەنيا پرەمەر-ءمينيسترى كارەن كاراپەتيان، بەلارۋس  پرەمەر-ءمينيسترى اندرەي كوبياكوۆ، قىرعىز پرەمەر-ءمينيسترى سوورونباي جەەنبەكوۆ، رەسەي فەدەراتسياسى ۇكىمەتىنىڭ توراعاسى دميتري مەدۆەدەۆ، ەۋرازيالىق ەكونوميكالىق كوميسسيا القاسىنىڭ توراعاسى تيگران ساركيسيان قاتىستى.

نۇرسۇلتان نازارباەۆ ەۋرازيالىق ۇكىمەتارالىق كەڭەس مۇشەلەرىنىڭ ەلورداعا كەلگەندەرىنە قۋانىشتى ەكەنىن جەتكىزىپ، كەزدەسۋدىڭ استانا قالاسىنداعى «ەكسپو-2017» حالىقارالىق كورمەسىمەن تۇسپا-تۇس ءوتىپ وتىرعانىن ايتتى.  «ۇكىمەت باسشىلارىنىڭ ءوز مەملەكەتىنىڭ ۇلتتىق پاۆيلوندارىنا بارۋعا، سونداي-اق قازاقستان مەن وزگە ەلدەردىڭ ەكسپوزيتسيالارىن ارالاپ كورۋگە مۇمكىندىكتەرى بار. ەۋرازيالىق ەكونوميكالىق وداقتىڭ ءۇشىنشى جىل جۇمىس ىستەپ جاتقانىن اتاپ وتكەن ءجون. بۇل كەزەڭ الەمدەگى جانە وداققا مۇشە ەلدەردىڭ ۇلتتىق ەكونوميكاسىنداعى كۇردەلى احۋالدارعا بايلانىستى بولىپ وتىر. سونىمەن قاتار، ورتاق نارىق پەن بىرىڭعاي ەكونوميكالىق قۇرىلىم قۇرۋ باستى فاكتور بولىپ سانالادى»، – دەدى قازاقستان پرەزيدەنتى.

مەملەكەت باسشىسى ەكونوميكانىڭ ءوسىمى ەلدەر اراسىنداعى تاۋار اينالىمىنىڭ ارتىپ، ءوزارا قارىم-قاتىناستاردىڭ نىعايۋىنا تىكەلەي بايلانىستى ەكەنىن جەتكىزدى. «ءبىز وسى ۋاقىت ىشىندە دۇرىس باعىتتا ىلگەرىلەي الدىق دەپ ەسەپتەيمىن. قازىر ورىن الىپ وتىرعان بىرقاتار ماسەلەگە قاراماستان، ەۋرازيالىق ەكونوميكالىق وداقتى نىعايتۋىمىز قاجەت. الدىمىزدا ەل ىشىندەگى ماسەلەلەردى شەشىپ، ءوزارا قارىم-قاتىناسىمىزدى ودان ءارى دامىتا ءتۇسۋ مىندەتى تۇر. بۇل جۇمىستاعى نەگىزگى ءرولدى ۇكىمەتتەرىمىز اتقارادى. بۇل دەگەنىمىز – ەكونوميكالىق مىندەتتەردى شەشۋ، مەملەكەتتەر اراسىنداعى ءوزارا ءىس-قيمىل ماسەلەلەرىن رەتتەۋ»، – دەدى نۇرسۇلتان نازارباەۆ.

سونىمەن قاتار، كۇن ءتارتىبىنىڭ ماڭىزدى بولىگىندە ەۋرازيالىق ەكونوميكالىق وداققا مۇشە مەملەكەتتەردىڭ بىرىندە بەرىلگەن ۇلتتىق ءارى حالىقارالىق جۇرگىزۋشىلىك كۋالىكتەردى ءوزارا مويىنداۋ ماسەلەسى قارالدى. ياعني بۇل قادام وداقتىڭ باسقا ەلىنىڭ اۋماعىندا كاسىپكەرلىك قىزمەتتى جۇزەگە اسىرۋعا باعىتتالعان. وسىعان دەيىن قازاقستاندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول قوزعالىسى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قابىلدانعان بولاتىن. وندا ەاەو مۇشە مەملەكەتتەرى ازاماتتارىنان وزگە شەتەل ازاماتتارىنىڭ نەمەسە حالىقارالىق كولىك جۇرگىزۋ كۋالىگىمەن كولىك جۇرگىزۋگە تىيىم سالۋ تۋرالى نورما قارالعان ەدى. بۇل نورما 2017 جىلدىڭ 15 شىلدەسىنەن باستاپ زاڭدى كۇشىنە ەندى. وتىرىس بارىسىندا تالقىلانعان ماڭىزدى ماسەلەنىڭ ءبىرى – ترانسپورتتىق ساياسات. مەملەكەتتەردىڭ ترانسپورتتىق ساياساتىنىڭ اۋە كولىگىنە قاتىستى 2018-2020 جىلدارعا ارنالعان جوسپارىنىڭ نەگىزگى باعىتتارى قارالدى. اتالعان جوسپار ەۋرازيالىق ەكونوميكالىق وداق اياسىندا ورتاق اۋە تاسىمالىن قۇرۋدى دا كوزدەيدى. سونداي-اق، ەكسپورتتاۋشىنىڭ ەۋرازەق-قا مۇشە مەملەكەتتەردىڭ قايسىسىنا جاتاتىنىنا قاراماستان، تەڭىز پورتتارىنا شىعۋعا تەڭ قۇقىقتى قامتاماسىز ەتۋ قاجەتتىگى تۋرالى ۇسىنىس جاسالدى.

ۇكىمەتارالىق كەڭەس مۇشەلەرى كەزدەسۋىنىڭ سوڭىندا ەلباسى كەڭەستىڭ بۇگىنگى وتىرىسى ارقىلى ۇيىمدى ءارى قاراي دامىتۋعا ماڭىزدى ۇلەس قوسىلاتىنىن ايتىپ، قاتىسۋشىلاردىڭ جۇمىسىنا تابىس تىلەدى.

ۇقساس جاڭالىقتار

Back to top button