جول ەرەجەسىن بۇزباعان جۇرگىزۋشىلەر ماراپاتتالدى

الماتى وبلىسى ءىىد جەرگىلىكتى پوليتسيا قىزمەتى جولدا قابىلداۋ اكتسياسىن وتكىزدى، دەپ حابارلايدى قازاقپارات.

اكتسيانىڭ ماقساتى حالىقتى قوعامدىق جانە جول قوزعالىسى قاۋىپسىزدىگىن ساقتاۋ بويىنشا قۇلاقتاندىرۋ. قوعامدا قۇقىقبۇزۋشىلىقتارعا «نولدىك توزىمدىلىك» ءپرينتسيپىن قالىپتاستىرۋ.  «بۇل اكتسيا ازاماتتارعا ولارعا قولايلى ۋاقىت پەن ىڭعايلى جەردە جول قوزعالىسى قاۋىپسىزدىگىن قامتاماسىز ەتۋ سالاسىندا كونسۋلتاتيۆتىك جانە قۇقىقتىق كومەك الۋعا مۇمكىندىك بەرەدى. سول ءۇشىن ءبىز ءوزىمىزدىڭ موبيلدىك پۋنكتتەرىمىزدى وبلىستىڭ تۇرعىندار كوپ شوعىرلاناتىن جەرلەرىنە قويدىق. حالىقپەن تىلدەسۋ جول قوزعالىسى قاۋىپسىزدىگى بويىنشا ازاماتتاردا تۋىنداعان سۇراقتاردى تالقىلاۋ تۇرىندە ءوتتى»، – دەپ مالىمدەدى الماتى وبلىسى ءىىد جەرگىلىكتى پوليتسيا قىزمەتىنىڭ اعا ينسپەكتورى ايجان الىبايقىزى.

اكتسيا بارىسىندا وبلىس بويىنشا 1623 جۇرگىزۋشى اراسىندا ساۋالناما جۇرگىزىلدى. كولىك باسقارۋ كەزىندە جول ءجۇرۋ ەرەجەسىن بۇزۋ بويىنشا جاۋاپكەرشىلىككە تارتىلماعان جۇرگىزۋشىلەر جپق باسشىلىعىنىڭ ارنايى العىس حاتىمەن ماراپاتتالدى. سونداي-اق جۇرگىزۋشىلەرگە جول ءجۇرۋ ەرەجەسىن ساقتاۋعا شاقىراتىن بۋكلەتتەر مەن جادىنامالار تاراتىلدى. بۇدان باسقا ءىس-شاراعا دەنساۋلىق ساقتاۋ ۇيىمىنىڭ وكىلدەرى دە  قاتىسىپ، ازاماتتارعا مىندەتتى مەديتسينالىق ساقتاندىرۋ تۋرالى ايتتى. پوليتسيا قىزمەتكەرلەرى جول قوزعالىسىنا قاتىسۋشىلاردىڭ بارلىعىن وسىنداي اكتسياعا ءجيى قاتىسۋعا شاقىرادى.

 

ۇقساس جاڭالىقتار

Back to top button