«قاز داۋىستى قازىبەك بي جولىمەن: بابالارعا تاعزىم!»

تاياۋدا قاراعاندى وبلىسىندا قازاقتىڭ قابىرعالى ءبيى – قاز داۋىستى قازىبەك بي كەلدىبەك ۇلىنىڭ 350 جىلدىعىنا ارنالعان مەرەيتويلىق ءىس-شارا ءوتتى. قارقارالى اۋدانى، ەگىندىبۇلاق اۋىلىندا ۇيىمداستىرىلعان شاراعا مەملەكەتتىك حاتشى گۇلشارا ابدىقالىقوۆا قاتىستى.

سالتاناتتى ءىس-شارا قازاقتىڭ ۇلى ءبيىنىڭ تۋعان جەرى – قارقارالى اۋدانى، ەگىندىبۇلاق اۋىلىندا ءوتتى. وعان پارلامەنت دەپۋتاتتارى، مەملەكەتتىك ورگاندار جەتەكشىلەرى، قوعام قايراتكەرلەرى، بەلگىلى عالىمدار مەن شىعارماشىلىق زيالى قاۋىم وكىلدەرى قاتىستى. گۇلشارا ابدىقالىقوۆا قازاقستان پرەزيدەنتىنىڭ سالتاناتتى ءىس-شاراعا قاتىسۋشىلارعا ارنالعان قۇتتىقتاۋىن وقىپ بەردى. وندا قاز داۋىستى قازىبەك بي بابامىز ۇلتىمىزدىڭ تاريحىندا ەسىمى التىن ارىپپەن جازىلعان قايراتكەر تۇلعا ەكەنى اتاپ ءوتىلدى. «بۇگىنگى تاۋەلسىز، بەيبىت ءارى وركەندەگەن قازاقستان – اتا-بابالارىمىز ارمانىنىڭ ورىندالعانىنىڭ بەلگىسى. وسىنىڭ ءبارى حالقىمىزدىڭ بىرلىگى مەن ىنتىماعىنىڭ ارقاسى. ءبىز – وتكەنىمىزدى قاستەرلەپ، بۇگىنىمىزدى قادىرلەي وتىرىپ، بولاشاققا زور ۇمىتپەن قول سوزامىز» دەلىنگەن.

ءىس-شاراعا قاتىسۋشىلار قازىبەك بي ەسكەرتكىشىنە گۇل شوقتارىن قويدى. «بۇل تويدىڭ ءوتۋى – ەلدىكتىڭ نىشانى، اجىراماس بەرەكە-بىرلىكتىڭ ارقاسى. تاريح جىلناماسىنا ۇڭىلسەك، تولە، قازىبەك، ايتەكە بيلەردىڭ ۇلى اسقاق ارمانى قازاقتىڭ تۇتاستىعى ەدى. سوندىقتان ءۇش بي قياناتقا جول بەرمەس پاراساتتىلىقتىڭ سيمۆولىنا اينالدى. ەڭ الدىمەن ەلباسى ايتقان ءبىرتۇتاس ۇلتتىڭ پەرزەنتتەرىن تاربيەلەۋ ءۇشىن ءبىز قازىبەك ءبيدىڭ بەينەسىن مەملەكەتتىك دەڭگەيدە قاراستىرۋىمىز قاجەت. وسىنى ءبىز كەلەشەك ۇرپاقتىڭ ساناسىنا ءسىڭىرۋدى ماقسات تۇتقانىمىز ابزال»، – دەدى ءوڭىر باسشىسى ەرلان قوشانوۆ.

سونىمەن قاتار، قاراعاندى وبلىسىنىڭ شىعارماشىلىق ۇجىمدارى ازىرلەگەن «قاز داۋىستى قازىبەك بي» اتتى تەاترلاندىرىلعان قويىلىم كورسەتىلدى. بالقانتاۋدىڭ بوكتەرىنە جۇزدەن استام كيىز ءۇي تىگىلدى. قازىبەك بيگە ارنالعان حالىقارالىق ايتىسقا قاتىسۋشى اقىندار ارناۋىن توگىپ، ەلىمىزدىڭ تانىمال ارتىستەرىنىڭ قاتىسۋىمەن مەرەكەلىك كونتسەرت ءوتتى. شارا قازاق كۇرەسى جانە الامان بايگە سياقتى سپورت جارىستارىمەن جالعاستى.

جالپى، قازىبەك ءبيدىڭ 350 جىلدىعىن تويلاۋ ءۇش ايعا سوزىلماق. 30 تامىزعا دەيىن قاراعاندى وبلىسى اۋماعىنان قىزىلوردا، تۇركىستان، تاراز، شىمكەنت قالالارى ارقىلى ءجۇرىپ، وزبەكستاننىڭ تاشكەنت، ناۋاي قالالارىنا دەيىن باراتىن «قاز داۋىستى قازىبەك بي جولىمەن: بابالارعا تاعزىم!» اتتى حالىق­­ارالىق اۆتوكەرۋەن جولعا شىقتى. الداعى ۋاقىتتا بىرنەشە مادەني شارالار ۇيىمداستىرىلادى.

 

 

Back to top button