تالاپ – تەز ءارى ساپالى قىزمەت

بۇگىندە ەلىمىزدەگى مەملەكەتتىك قىزمەتتەردىڭ بارلىعى حالىققا قىزمەت كورسەتۋ ورتالىقتارى ارقىلى جۇزەگە اسىرىلادى. قۇجات راسىمدەۋ جۇمىستارىنىڭ ساپالى ءارى ۋاقتىلى اتقارىلۋى ءۇشىن بايىپتى باقىلاۋدىڭ بولۋى ماڭىزدى. سوندىقتان حالىققا قىزمەت كورسەتەتىن ورىنداردىڭ جۇمىسى «نۇر وتان» پارتياسىنىڭ باقىلاۋىنان سىرت قالعان ەمەس.

اپتا باسىندا پارتيانىڭ اقتوبە وبلىستىق فيليالى حالىققا قىزمەت كورسەتۋ ورتالىقتارىن ارالادى. پارتيالىق باقىلاۋ جۇرگىزگەندەر بىرقاتار قيىندىقتارعا كەزىككەن. ماسەلەن، مۇمكىندىگى شەكتەۋلى ازاماتتاردى ءالى دە عيماراتقا كىرۋ الاڭداتادى. «ولار ءۇشىن ەرەكشە قىزمەت ءتۇرى ۇسىنىلادى» دەپ كورسەتىلگەنىمەن، ارنايى اپپاراتتار ىستەن شىققان.

حالىققا قىزمەت كورسەتۋ ساپاسىن تەكسەرۋگە شىققان جاۋاپتى ماماندار بار قىزمەت تۇرلەرىن وزدەرى پايدالانىپ كورۋگە تىرىستى. بىراق قيىندىق كوپ، كەدەرگىلەر ءجيى كەزىكتى. «نۇر وتان» پارتياسىنىڭ وبلىستىق فيليالىندا وتكەن جيىن كەزىندە اقتوبە قالاسىنداعى حالىققا قىزمەت كورسەتۋ ورتالىعىنىڭ ءبىر ادامعا 20-25 مينۋت قىزمەت كورسەتەتىنى ايتىلدى.

«تەكسەرۋ جۇمىستارى اي سايىن جۇرگىزىلەدى. ءبىز قاراپايىم حالىققا ساپالى قىزمەت كورسەتۋ جولىن قولدايمىز. كەز كەلگەن ادام ءوزى قالاعان ۋاقىتتا قۇجات راسىمدەۋ جۇمىسىنىڭ دەر كەزىندە اياقتالعانىن كۇتەدى. ارنايى ماماندار دا سول قىزمەتتى ەش كەدەرگىسىز اتقارۋى كەرەك. سىن ايتىلعان كەزدە تۇزەتۋلەر ەنگىزىلىپ جاتىر، بىراق كەمشىلىكتەر بار. ماسەلەن حالىققا قىزمەت كورسەتۋ ورتالىعىنا بارىپ، ادامي فاكتورلارعا كەزىكتىك. مۇندا ءالى دە مۇمكىندىگى شەكتەۋلى ادامدارعا جاعداي جاسالماعان. ورتالىقتا كەزەك تولاستامايدى. بوس ۇستەلدەر بار. نەگە جۇمىس ىستەمەيتىنىن سۇراپ بىلگەن كەزدە، تەحنيكالىق ءۇزىلىس سەكىلدى سەبەپتەردى ءجيى ايتادى. مۇنىڭ ءبارىن ءبىر ىزگە كەلتىرىپ، مەيلىنشە تەز ءارى ساپالى قىزمەت كورسەتۋگە مىندەتتەۋ – ءبىزدىڭ جۇمىسىمىز»، – دەدى پارتيانىڭ سايلاۋالدى باعدارلاماسىنىڭ «مەملەكەتتىك قىزمەتتەر كورسەتۋ» باعىتى بويىنشا پارتيالىق كۋراتورى امانگەلدى ەسىركەپوۆ.

اقتوبە وبلىسى بويىنشا جەرگىلىكتى اتقارۋشى ورگاندار 3 ميلليوننان استام قىزمەت كورسەتكەن. كوبى ءالى دە بولسا، ءىستى ەلەكتروندى جولمەن ەمەس، قاعاز جۇزىندە اتقارعاندى قالايدى. قازىرگى ەسەپ بويىنشا 80 پايىزدان استامى الىس-بەرىس قاعازىن سۇراتىپ، جىبەرىپ وتىرعان. «مەملەكەتتىك قىزمەتتەر كورسەتۋ سالاسىندا قىزمەت كورسەتىلۋ مەرزىمدەرىنىڭ ساقتالۋى ماڭىزدى. وڭىردە مەملەكەتتىك قىزمەتتەردىڭ كورسەتىلۋ مەرزىمدەرىن بۇزۋ جىل وتكەن سايىن ءوسىپ كەلەدى. ەگەر 2015 جىلى ولاردىڭ سانى 42 بولسا، 2016 جىلى 96-عا دەيىن جەتتى. وسى جىلدىڭ 9 ايىندا 57 بۇزۋشىلىق انىقتالدى»، – دەدى اقتوبە وبلىسى اكىمى اپپاراتىنىڭ مەملەكەتتىك قىزمەتتەر كورسەتۋ ماسەلەلەرىن ۇيلەستىرۋ ءبولىمىنىڭ باسشىسى ج.الداشەۆ.

مەملەكەتتىك قىزمەت كورسەتۋ ساپاسىن تەكسەرۋ جان-جاقتى جۇرگىزىلدى. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اقتوبە وبلىسى بويىنشا دەپارتامەنت باسشىسى قايىرجان توقىشەۆتىڭ ايتۋىنشا، ءۇش ايلىق تەكسەرۋ كەزىندە ماماندار 37 مەملەكەتتىك ورگانعا باردى. وندا 50 كەمشىلىك انىقتالدى. مەملەكەتتىك قىزمەتتى الۋ بارىسىندا مۇمكىندىگى شەكتەۋلى ادامدارعا جاعداي جاسالماعان، مۇگەدەكتەرگە ارنالعان اپپاراتتار تەحنيكالىق تالاپتارعا ساي كەلمەگەن. سونىمەن قاتار اقپاراتتىق تاقتايشالار بولمادى، مامانداردىڭ كەڭەس بەرۋ ساپاسى تومەن، كەيدە ولار جۇمىس ورنىندا بولماي شىقتى. كەيبىر مەكەمەدە ارىز-شاعىمعا ارنالعان جاشىكتەر تابىلمادى. قازىرگى كەزدە بارلىق كەمشىلىك جويىلدى.

الماتى وبلىسىنداعى نۇروتاندىقتار دا حالىققا قىزمەت كورسەتۋ ورتالىقتارىنىڭ جۇمىسىن تۇراقتى تۇردە باقىلاپ وتىرادى. جۋىردا «نۇر وتان» پارتياسى تالعار اۋداندىق فيليالىنىڭ ۇيىمداستىرۋىمەن جەرگىلىكتى ءماسليحات دەپۋتاتتارى مەن باستاۋىش پارتيا ۇيىمى مۇشەلەرىنەن جاساقتالعان اقپاراتتىق-ناسيحات توبى، اۋداندىق حالىققا قىزمەت كورسەتۋ ورتالىعىنىڭ ۇجىمىمەن كەزدەسىپ، ەلباسى جولداۋىنىڭ جۇزەگە اسىرىلۋ بارىسىن ءتۇسىندىردى ءارى ورتالىق جۇمىسىنىڭ ناتيجەلەرىمەن تانىستى.

جولداۋدىڭ نەگىزگى باسىمدىقتارى، ەلباسىنىڭ مەملەكەتتىك ورگاندار الدىنا قويعان ماڭىزدى مىندەتتەرى مەن دامۋ باعىتتارى ەگجەي-تەگجەيلى ءتۇسىندىرىلىپ، مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى اياسىندا جاسالىنىپ جاتقان جۇمىستار ءسوز ەتىلدى.

«نۇر وتان» پارتياسى تالعار اۋداندىق فيليالى توراعاسىنىڭ ءبىرىنشى ورىنباسارى مەيرامگۇل ەرماعانبەتوۆا: «پارتيا فيليالىنىڭ بۇگىنگى ماقساتى – لاتىن الىپبيىنە كوشۋ جۇمىسىن ءسوز جۇزىندە ەمەس، ناقتى قولعا الىنۋىنا بارىنشا ىقپال ەتۋ. قازىردىڭ وزىندە اۋداندىق پارتيا فيليالى بۇل باستامانىڭ جۇمىس جوسپارىن ازىرلەۋ ۇستىندە. بارلىقتارىڭىزدى ەل بولاشاعىنىڭ بەكەمدىگى مەن حالىقتىڭ رۋحاني بىرلىگىن قامتاماسىز ەتۋگە باعىتتالعان ماقساتتى ىسكە اتسالىسۋعا شاقىرامىن»، – دەپ لاتىن الىپبيىنە كوشۋدىڭ ماڭىزىنا توقتالدى.

وبلىستىق ءماسليحات دەپۋتاتى، پارتيا بەلسەندىسى دانيار نۇرباەۆ ەلباسىنىڭ باعدارلامالىق ماقالاسىن اۋدان تۇرعىندارى اراسىندا كەڭىنەن ناسيحاتتالۋىنا قاتىستى باستاۋىش پارتيا ۇيىمدارىنىڭ توراعالارىنا ۇلكەن مىندەت جۇكتەلەتىندىگىنە نازار اۋداردى. ءبىز ءار ۇجىمدا ەلباسى باستامالارىن دۇرىس ءتۇسىندىرىپ قانا قويماي، ءىس جۇزىندە اتقارىلىپ جاتقان جۇمىستار جايىندا دا ناقتى اقپاراتتار بەرۋىمىز قاجەت. قازىرگى جاڭا جوبالاردىڭ جۇزەگە اسۋى، كيەلى جەرلەردىڭ كارتاسىن جاساۋ، لاتىن الىپبيىنە كوشۋدىڭ العىشارتتارىن جاساۋ ماسەلەسى كۇن تارتىبىندەگى وزەكتى دە وتكىر ماسەلە، – دەدى دانيار مولديار ۇلى.

– حالىققا مەملەكەتتىك قىزمەتتەردىڭ قولجەتىمدىلىگىن قامتاماسىز ەتۋ ماقساتىندا «ءبىر تەرەزە» قاعيداسى بويىنشا حالىققا قىزمەت كورسەتۋ ورتالىقتارىن قۇرۋ قازاقستان رەسپۋبليكاسى پرەزيدەنتىنىڭ 2005 جىلعى 18 اقپانداعى «قازاقستان ەكونوميكالىق، الەۋمەتتىك جانە ساياسي جەدەل جاڭارۋ جولىندا» اتتى جولداۋىن ورىنداۋ اياسىندا ىسكە اسىرىلدى. سودان بەرگى مەرزىمدە ازاماتتاردى تۇرعىلىقتى مەكەنجايعا تىركەۋ، ۋاقىتشا تىركەۋ بويىنشا 19 821 ازاماتقا قىزمەت كورسەتىلسە، قۇجاتتاندىرىلعان ازاماتتار سانى – 91 644. وزىنە-ءوزى قىزمەت كورسەتۋ سەكتورى ارقىلى 26 425 ادامعا كەڭەس بەرىلگەن جانە باسقا دا قىزمەتتەر كورسەتىلدى. بىرىكتىرىلگەن كاسىپورىندارعا حقكو قولدانىسىنداعى قىزمەت كورسەتۋ مونيتورينگى مەن ساپاسىن باعالاۋدىڭ جاڭا قۇرالدارىن پايدالانۋ، سمس حابار جىبەرۋ، كەدەرگىسىز قىزمەت كورسەتۋ، كەزەكتى برونداۋ سەرۆيسى، «ازاماتتارعا ارنالعان ۇكىمەت» مەملەكەتتىك كورپوراتسياسى «قازپوشتا» اق-مەن بىرلەسىپ دايىن قۇجاتتاردى ۇيگە جەتكىزۋ قىزمەتىن ىسكە قوستىق، – دەدى اۋداندىق حالىققا قىزمەت كورسەتۋ ورتالىعىنىڭ باسشىسى مارلان نۇربەكوۆ.

كەزدەسۋ بارىسىندا ۇجىم قىزمەتكەرلەرى «100 جاڭا ەسىم»، «100 وقۋلىق» جوبالارى جايىندا سۇراقتار قويىپ، سوعان قاتىستى تولىق جاۋاپ الدى.

ۇقساس جاڭالىقتار

Back to top button