ماڭىزدىسى - دوستىققا نەگىزدەلگەن قارىم-قاتىناس

اقپارات قۇرالدارىندا قىرعىزستان پرەزيدەنتى الماسبەك اتامباەۆتىڭ مالىمدەمەسى تۋرالى سان ءتۇرلى پىكىرلەر ايتىلۋدا. كوپشىلىك ونىڭ ايتقاندارىن ەلدەگى پرەزيدەنتتىك سايلاۋمەن بايلانىستىرا قاراۋدا. ارينە، ءبىر ەلدىڭ ەڭ جوعارعى لاۋازىم يەسىنىڭ مالىمدەمەسىندە قازاقستان جايلى ايتىلعان جاعداياتتار مەنى، ءبىلىم جانە عىلىم سالاسىنىڭ وكىلى رەتىندە تولعاندىرماي قويمادى.

قىرعىز-قازاق بايلانىسىنىڭ تامىرى تەرەڭدە ەكەنى بەسەنەدەن بەلگىلى. ماقساتىمىز ونى تالداپ، زەرتتەپ-زەردەلەۋ ەمەس، ءبىزدىڭ ايتپاعىمىز – دوستىققا، ءوزارا تۇسىنۋشىلىككە نەگىزدەلگەن سول تاريحي بايلانىسىمىزعا كولەڭكە تۇسىرمەي، ودان ءارى نىعايتا ءتۇسۋ.

راس، قازاقستاننىڭ دوستىققا نەگىزدەلگەن قارىم-قاتىناستىڭ ارقاسىندا قىرعىز ەلىنە ەكونوميكالىق جانە گۋمانيتارلىق سالادا قوماقتى كومەك كورسەتىلىپ كەلە جاتقانىن جۇرتشىلىق جاقسى بىلەدى.

سونداي-اق ءبىلىم مەن عىلىم سالاسىندا اتقارىلىپ جاتقان بىرلەسكەن جوبالاردىڭ جاسالۋى ءوز الدىنا ءبىر اڭگىمە. اكادەميالىق ستۋدەنتتەر الماسۋ باعدارلاماسىمەن ەكى ەلدىڭ كوپتەگەن جاستارى جوعارى ءبىلىم الۋ جولىندا ءدارىس الىپ، پروفەسسور-وقىتۋشى قۇرامى ءبىلىم الماسىپ، الەمدىك وزىق تاجىريبەلەرىمەن بولىسۋدە. جوعارى وقۋ ورىندارىندا بىلىكتى ماماندار مەن عىلىمي كادرلار دايارلاۋدا ەكى ەلدىڭ بىرلەسىپ، اتقارعان ەڭبەكتەرىن ەرەكشە اتاپ وتۋگە بولادى. بىرلەسكەن ديسسەرتاتسيالىق كەڭەستەردە عىلىمي دارەجەسىن قورعاعان عىلىم دوكتورلارى مەن عىلىم كانديداتتارى بۇگىنگى كۇنى قوس ەلدىڭ الەۋمەتتىك-ەكونوميكالىق دامۋ جولىندا ايانباي ەڭبەك ەتۋدە. وسىناۋ قاجىرلى ەڭبەكتىڭ ارقاسىندا ءار سالادان عىلىمي مەكتەپتەر قالىپتاسىپ، مەملەكەتتەر الەۋەتىن ارتتىرۋعا ۇلكەن ۇلەس قوسۋدا.

حالىقارالىق ءبىلىم كەڭىستىگىنە ەركىن ەنۋ ماقساتىندا قىرعىز ەلىنىڭ عالىمدارىمەن بىرلەسىپ حالىقارالىق كونفەرەنتسيا، سيمپوزيۋمدەر وتكىزۋ تۇراقتى داستۇرگە اينالعان. ەكى ەل اراسىندا عالىمداردىڭ ورنىققان ءجيى كەزدەسۋلەرى، ولاردىڭ جاھاندانۋ زامانىنداعى كۇتىلەتىن تاۋەكەلدەردى ءوزارا تالقىلاۋى، پىكىر الماسۋى، زيالى قاۋىمنىڭ دۇنيەدە بولىپ جاتقان وزگەرىستەرگە وزىندىك ءۇن قوسۋى قالىپتى جاعدايعا اينالعان. سايىپ كەلگەندە، مۇنىڭ ءبارى ەكى ەل عالىمدارىنىڭ وتاندىق ءبىلىم مەن عىلىمدى دامىتۋداعى كوزقاراستارىن ايقىندايدى.

جوعارىدا ايتىلعان مالىمدەمەدەگى ماسەلەلەرگە ەرەكشە ءمان بەرۋدىڭ قاجەتتىلىگى شامالى ەكەندىگىن عالىمدار جاقسى تۇسىنەدى. وندا ايتىلعان سوزدەر عىلىمي قاۋىمداستىق وكىلدەرىنىڭ كەلەشەكتە بىرلەسىپ اتقارار جۇمىستارىنا اسەر ەتپەسىنە سەنىمدىمىز. سايلاۋ دا وتەر، جاڭا پرەزيدەنت تە سايلانار. تەك، جالپى جۇرتشىلىق ەكى ەل اراسىنداعى بايلانىستىڭ بەرىكتىگىنە، تاريحي تامىرىنىڭ تەرەڭدىگىنە، دوستىققا ادالدىعىنا كۇمان كەلتىرمەسى انىق. ماڭىزدىسى – وسى!

 

كارىمبەك قۇرماناليەۆ،

قر ۇعا كوررەسپوندەنت مۇشەسى، فيلولوگيا عىلىمدارىنىڭ دوكتورى، پروفەسسور

ۇقساس جاڭالىقتار

Back to top button