كارلەس پۋچدەمون: "كاتالونيا تاۋەلسىز مەملەكەت بولۋ قۇقىعىن جەڭىپ الدى"

كارلەس پۋچدەمون: «كاتالونيا تاۋەلسىز مەملەكەت بولۋ قۇقىعىن جەڭىپ الدى. كاتالونيا بيلىگىنىڭ جەتەكشىسى ءارى كاتالونيا ەۋروپالىق دەموكراتيالىق پارتيا مۇشەسى كارلەس پۋچدەمون جەكسەنبى كۇنى كەشكىسىن «كاتالونيا تاۋەلسىز مەملەكەت بولۋ قۇقىعىن الدى» دەپ مالىمدەدى. بۇل جونىندە Associated Press اگەنتتىگى حابارلايدى. داۋىس بەرۋدىڭ ناتيجەسى جاقىن كۇندەرى جاريالانباق.

​كاتالونياداعى جەدەل ارەكەت ەتۋ قىزمەتىنىڭ حابارلاۋىنشا، پوليتسيامەن قاقتىعىس كەزىندە 760 ادام جاراقات العان. باسقا دەرەككوز 400-دەي ادام جارالانعان دەپ حابارلايدى. پوليتسيا كاتالونيانىڭ يسپانيادان تاۋەلسىزدىك الىپ، رەفەرەندۋم وتكىزۋىنە مۇمكىندىك بەرمەس ءۇشىن كۇش قولدانعان. ءتىپتى كەيبىر سايلاۋ ۋچاسكەلەرىندە داۋىس بەرۋ بيۋللەتەندەرى مەن جاشىكتەرى تاركىلەنگەن.

وسىعان دەيىن يسپانيا ۇكىمەتى داۋىس بەرۋگە جول بەرمەيمىز دەپ مالىمدەگەن. يسپانيانىڭ كونستيتۋتسيالىق سوتى رەفەرەندۋم وتكىزۋدى زاڭسىز دەپ جاريالاعان.

داۋىس بەرۋ جەرگىلىكتى ۋاقىت بويىنشا، كەشكى ساعات 20.00-دە اياقتالدى. بىراق كاتالونيا ۇكىمەتىنىڭ وكىلى سايلاۋ كەزەگىندە تۇرعان ادامداردىڭ ءبارى داۋىس بەرۋ بولمەسىنە جىبەرىلەدى دەدى.

يسپانيا ءىىم مالىمەتى بويىنشا، قاقتىعىس كەزىندە 12 پوليتسيا وكىلى جارالانعان. ىشكى ىستەر ءمينيسترى داۋىس بەرۋگە ارنالعان 92 ۋچاسكە جابىلدى دەپ مالىمدەدى. بۇعان دەيىن ەكى مىڭعا جۋىق سايلاۋ ۋچاسكەنىڭ ءۇش ءجۇزى جابىلدى دەپ حابارلانعان. رەفەرەندۋم الدىندا كاتالونياعا داۋىس بەرۋدى بولدىرماس ءۇشىن، «ازاماتتىق گۆارديانىڭ» جاساعى جىبەرىلگەن بولاتىن.

ۇقساس جاڭالىقتار

Back to top button