ەلباسى بەتىن بۇركەمەلەگەن قىز-كەلىنشەكتەرگە قاتاڭ ەسكەرتۋ جاسادى

اقوردادا جۋرناليستەرمەن كەزدەسكەن قازاقستان پرەزيدەنتى نۇرسۇلتان نازارباەۆ جاستاردى ءتۇرلى ءدىني اعىمداردىڭ جەتەگىندە كەتۋدەن ساق بولۋعا شاقىردى دەپ حابارلايدى Baq.kz.

«دۇنيەدە نەشە ءتۇرلى ءدىني اعىمدار بار. سيريادا قاقتىعىستار بولىپ جاتىر. ولار ءار جەردەن جاستاردى شاقىردى. اقشا تولەپ، سوعىسقا بەيىمدەدى. «ەلدەرىڭە قايتىپ، لاڭكەستىك جاساڭدار» دەپ ۇيرەتىپ جاتىر. بىزدەن دە بارىپ جاتقان ادامداردى بىلەمىن. ول جاستار بۇل جەردە ءوز ورنىن تابا الماعان، نە جۇمىسقا ورنالاسپاعان، نە ءبىلىم الماعان. اقشا تولەيمىز دەگەنگە الدانىپ قالادى دا ول جاققا جانۇياسىن دا اپارادى. سوسىن كەتە المايدى»، – دەدى پرەزيدەنت.

سونىمەن قاتار مەملەكەت باسشىسى قازىرگى تاڭدا وتانداستارىمىز سوعىسىپ جۇرگەن جاقتاعى جاعدايدىڭ وتە اۋىر ەكەنىن ايتتى.

«قازىر ول جاقتا بارلىعىن بومبالاپ جاتىر. ەلدى-مەكەندەردە ەلۋىن، قىرقىن ولتىردىك دەپ حابارلاپ جاتىر. ولاردىڭ ىشىندە ءبىزدىڭ دە بالالار بار. ونداي جولعا تۇسپەسە دەيمىن. بىزدىڭ جاستار ءۇشىن ول جاقتا ەشقانداي بولاشاق جوق»، – دەدى نۇرسۇلتان نازارباەۆ.

قازاقستان پرەزيدەنتى وسى كەزدەسۋدە شولاق شالبار مەن قارا كيىمنىڭ قازاققا جات ەكەنىن دە ايتتى.

«بۇرىن دا ايتقانمىن، قازىر دە ايتايىن. قازاقتىڭ قىزدارى، جالپى ايەل ازاماتتارى ەش ۋاقىتتا بەتىن بۇركەمەگەن. قىزدارىمىز بۇرىمىن جىبەرىپ، شولپىسىن سىڭعىرلاتىپ جۇرەتىن. ءبىزدىڭ انالارىمىز باتىر بولعان. ەرلەرىنىڭ جانىندا ءجۇرىپ سوعىسقان. سونشا عاسىرلىق تاريحىمىزعا، داستۇرىمىزگە قاراماي بۇگىن باسقاشا جولعا تۇسەمىز بە؟ شالداردىڭ شولتيتىپ شالبار كيگەنىن قايدان كوردىڭىزدەر؟ ساقالىن بەلىنە ءتۇسىرىپ ءجۇرۋ، مۇسىلماندىقتىڭ بەلگىسى ەمەس قوي. ول قۇراننىڭ قاي جەرىندە جازىلىپتى؟ مۇندا تۇرعان قانداي ەرەكشەلىك بار؟ وعان كىم قىزىعادى؟ ول بىزدىكى ەمەس. ول سالتىمىزدى بۇزادى. مەن بۇل تۋرالى ءبىر رەت ايتتىم. مەن ايتقانىن ورىنداتاتىن اداممىن. سوندىقتان جاستارعا وسىلاردان اۋلاق بولىڭدار دەيمىن»، – دەپ تۇيىندەدى ءسوزىن ەلباسى.

ۇقساس جاڭالىقتار

Back to top button