لاتىنعا كوشۋ – «رۋحاني جاڭعىرۋدىڭ» بەرىك ىرگەتاسى

كەشە «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسىنىڭ كەزەكتى وتىرىسىن وتكىزدى. وندا مەملەكەتتىك ءتىلدىڭ لاتىن الىپبيىنە كوشۋ ماسەلەسى جانە جاڭا قازاق ءالفاۆيتىنىڭ بىرىڭعاي ستاندارتتارى ءسوز بولدى.

ءسوز باسىندا «نۇر وتان» پارتياسى توراعاسىنىڭ ءبىرىنشى ورىنباسارى ەلباسىمىزدىڭ «بولاشاققا باعدار: رۋحاني جاڭعىرۋ» ماقالاسى بۇكىلحالىقتىق قولداۋعا يە بولعان وتە تەرەڭ ماعىنالى جانە بارلىق سالانى قامتيتىن اسا اۋقىمدى باعدارلامالىق قۇجات ەكەنىن اتاپ ءوتتى. رۋحاني جاڭعىرۋدىڭ نەگىزگى تەتىكتەرىنىڭ ءبىرى ءتىلدىڭ جاڭعىرۋى. ياعني ءتىلدىڭ فونەتيكاسى مەن گرافيكاسىنىڭ سايكەس كەلۋىندە ۇلكەن ءمان بار. سول سەبەپتى دە مۇحتار قۇل-مۇحاممەد ءدال وسى جاڭا قازاق ءالفاۆيتى قوعامدىق ساناعا تىڭ سەرپىن بەرىپ، ونىڭ جاڭعىرۋىنىڭ نەگىزى بولاتىنىنا ەرەكشە توقتالدى.

«ۇلت تاعدىرىنا قاتىستى كەز كەلگەن ماسەلەنى ون ويلانىپ، ءجۇز تولعانىپ، وزىنە عانا ءتان دارحان دانالىقپەن كەمەل شەشىم قابىلدايتىن ەلباسىمىز لاتىن الفاۆيتىنە كوشۋگە كەلگەندە تاعى دا كەمەڭگەرلىك تانىتتى. بۇل تەك ءالىپبي اۋىستىرۋ ەمەس، بار قازاقتىڭ بويىنا انا ءسۇتى، اكە تاربيەسىمەن داريتىن قازاق ءتىلىن زاماناعا ساي جاڭعىرتۋدىڭ كەشەندى جۇيەسىن، دۇرىس سويلەۋ مەن جازۋ مادەنيەتىن قالىپتاستىرۋ دەپ بىلەمىن. ەندەشە لاتىنعا كوشۋ ەلباسىمىز ۇسىنعان «رۋحاني جاڭعىرۋدىڭ» بەرىك ىرگەتاسى دەپ بىلەمىن»، – دەدى مۇحتار قۇل-مۇحاممەد.

سونىمەن قاتار، «نۇر وتان» پارتياسى توراعاسىنىڭ ءبىرىنشى ورىنباسارى لاتىن الىپبيىنە كوشۋ ارقىلى ۇلتىمىزدىڭ الەمدىك باسەكەگە قابىلەتتىلىگىن ارتتىراتىن ءۇش ماسەلەنىڭ شەشىلەتىنىنە نازار اۋداردى. بىرىنشىدەن، اعىلشىن ءالفاۆيتىنىڭ نەگىزىندەگى جاڭا قارىپ جۇيەسى جاستارىمىزدىڭ دا، جاسامىستارىمىزدىڭ دا اعىلشىن ءتىلىن مەڭگەرۋىن جەڭىلدەتەدى ءارى جەدەلدەتەدى. ەكىنشىدەن، اعىلشىن ءالفاۆيتى مەن ءتىلىن ۇيرەنۋ ارقىلى عىلىم-ءبىلىمنىڭ وسى تىلدە جاسالعان مول قازىناسىن ەركىن يگەرۋگە جول اشادى. ۇشىنشىدەن، جەر جۇزىنە تارىداي شاشىلعان بار قازاقتىڭ باسىن قوسادى. وسىعان وراي مۇحتار قۇل-مۇحاممەد: «لاتىن الفاۆيتىنە كوشۋ ارقىلى ءبىز گرامماتيكامىزدى جەتىلدىرىپ، ءتىلىمىزدى جاڭعىرتامىز»، – دەدى.

سونداي-اق، كيريلليتسادا جاسالعان بار ادەبي قۇندىلىقتىڭ تۇگەلدەي كومپيۋتەرلىك نۇسقاعا كوشىرىلەتىنىن ايتقان مۇحتار قۇل-مۇحاممەد: «لاتىنعا كوشۋ ارقىلى رۋحاني بايلىعىمىز تسيفرلىق تەحنولوگيا تىلىندە ودان ءارى وركەن جايادى. وسىنى حالىققا ءتۇسىندىرۋدىڭ كوش باسىندا زيالى قاۋىم وكىلدەرى بولۋعا ءتيىس»، – دەدى.

دەموكراتيالىق كۇشتەردىڭ «قازاقستان-2050» جالپىۇلتتىق كواليتسياسىنىڭ بۇل وتىرىسىنا قازاقستان رەسپۋبليكاسى پرەمەر-ءمينيسترىنىڭ ورىنباسارى ەربولات دوساەۆ، ەلىمىزدەگى جەتەكشى ساياسي پارتيالاردىڭ باسشىلارى، پارلامەنت دەپۋتاتتارى، قازاقستان حالقى اسسامبلەياسىنىڭ، كاسىبي جانە قوعامدىق بىرلەستىكتەردىڭ وكىلدەرى، مەملەكەتتىك ءتىلدىڭ لاتىن گرافيكاسىنا كوشۋى جونىندەگى جۇمىس توبىنىڭ مۇشەلەرى، لينگۆيست-عالىمدار، ءتىل ءبىلىمىنىڭ ماماندارى، تاريحشىلار، تۇركىتانۋشىلار جانە تاعى باسقا ساراپشى ماماندار قاتىستى.

وتىرىس بارىسىندا دەموكراتيالىق كۇشتەر كواليتسياسىنىڭ مۇشەلەرى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيا دايىنداعان، پارلامەنتتىك تىڭداۋدا تانىستىرىلعان جاڭا ءالفاۆيتتىڭ بىرىڭعاي ستاندارتتار جوباسىن تالقىلادى. سونداي-اق، جاڭا رەفورمانى قولداپ، بارشا ازاماتتاردى تالقىلاۋ، ءتۇسىندىرۋ جانە جاڭا قازاق ءالىپبيىنىڭ قابىلدانۋى جولىنداعى جۇمىستارعا بەلسەنە قاتىسۋعا شاقىراتىن قازاقستان حالقىنا ارنالعان ۇندەۋىن جاريالادى.

ۇقساس جاڭالىقتار

Back to top button