قىزىلوردادا اۆتوكولىك ۇرلاعاندار ۇستالدى

قىزىلوردادا اۆتوكولىك ۇرلاعاندار ۇستالدى، – دەپ حابارلايدى Tengrinews.kz ءتىلشىسى قىزىلوردا وبلىستىق ءىىد ءباسپاسوز قىزمەتىنە سىلتەمە جاساپ. ءباسپاسوز قىزمەتىنىڭ مالىمەتىنشە، 2017 جىلدىڭ 6 قىركۇيەگىندە تۇنگى ساعات 01.40 شاماسىندا قالالىق ىشكى ىستەر باسقارماسىنىڭ كەزەكشى بولىمىنە 27 جاستاعى تۇرعىن قوڭىراۋ شالىپ، ءۇيىنىڭ اۋلاسىندا تۇرعان Mercedes Benz ماركالى اۆتوكولىگىنىڭ ۇرلانعانى جايلى حابارلاعان.

«جەدەل-ىزدەستىرۋ شارالارىنا سول اۋماقتا بارلاۋ جۇمىستارىن جۇرگىزىپ جۇرگەن جول-پاترۋلدىك پوليتسيا باتالونى قىزمەتكەرلەرى جۇمىلدىرىلىپ، ناتيجەسىندە اۆتوكولىك قالا كوشەلەرىنىڭ بىرىنەن انىقتالادى. وقيعا ورنىنان 18 جانە 23 جاستاعى تۇرعىندار ۇستالىپ، قالالىق ىشكى ىستەر باسقارماسىنا جەتكىزىلدى»، – دەپ حابارلادى ءىىد وكىلدەرى. ءىىد وكىلدەرىنىڭ مالىمەتىنشە، ءدال وسىنداي قىلمىس 25 تامىزدا دا تىركەلگەن. قالا ورتالىعىنداعى مەيرامحانالاردىڭ ءبىرىنىڭ الدىنداعى اۆتوتۇراقتا تۇرعان 55 جاستاعى ازاماتتىڭ Nissan Maxima ماركالى اۆتوكولىگىن بەلگىسىز بىرەۋلەر بەلگىسىز باعىتقا ايداپ كەتكەنى بەلگىلى بولادى.

جەدەل-ىزدەستىرۋ شارالارى بارىسىندا اۆتوكولىك ەسەنوۆ كوشەسى بويىنان انىقتالادى. قىلمىستى جاسادى دەگەن كۇدىكپەن 1986 جىلى تۋىلعان قالا تۇرعىنى انىقتالىپ، ۋاقىتشا ۇستاۋ اباقتىسىنا قاماۋعا الىنادى. ەكى دەرەك بويىنشا دا قر قىلمىستىق كودەكسىنىڭ 200-بابى 1-بولىگى («ء;اۆتوموبيلدى جىمقىرۋ ماقساتىنسىز قۇقىققا سىيىمسىز يەلەنىپ الۋ») بويىنشا قىلمىستىق ءىس قوزعالىپ، قازىرگى تاڭدا سوتقا دەيىنگى تەرگەپ-تەكسەرۋ امالدارى جۇرگىزىلۋدە. وسىعان بايلانىستى قىزىلوردالىق پوليتسەيلەر وبلىس تۇرعىندارى مەن قوناقتارىنا اۆتوكولىكتەرىن ءۇي اۋلالارىنا، گاراجدارعا، اۆتوتۇراقتاردا قالدىرعان كەزدە قىراعىلىق تانىتۋىنا كەڭەس بەرەدى. سونداي-اق، اۆتوكولىكتى قاراۋسىز قالدىرماۋدى، قاراڭعى جەرلەردە ۇزاق ۋاقىتقا تۇراققا قويماۋدى، قۇجاتتار مەن قۇندى زاتتاردى اۆتوكولىك ىشىندە ساقتاماۋدى ەسكەرتەدى. كولىكتەن از ۋاقىتقا شىققان كەزدە دە ەسىكتەرى مەن تەرەزەلەرىنىڭ، جۇكسالعىشىنىڭ جابىق ەكەندىگىنە كوز جەتكىزىپ، كىلتتى تۇتاندىرۋ تەتىگىندە قالدىرماۋلارىن، مۇمكىندىگىنشە اۆتوكولىكتى ساقتاندىرىپ، ايداپ كەتۋگە قارسى جۇيەنى ورناتۋلارىن سۇرايدى.

ۇقساس جاڭالىقتار

Back to top button