بىرلىكتىڭ ارقاسىندا باعىندىرىلعان بيىكتەر

استانادا پارلامەنتتىڭ كەزەكتى سەسسياسى اشىلدى. قالىپتاسقان ۇردىسكە ساي، پرەزيدەنت نۇرسۇلتان نازارباەۆ پارلامەنت ۇيىنە كەلىپ، دەپۋتاتتاردىڭ جۇمىسىنا ساتتىلىك تىلەدى، ودان سوڭ ءۇشىنشى سەسسيادا قابىلدانۋى ءتيىس زاڭ جوبالارىنا باعدار سىلتەدى.

«ءبىز بيىل جاڭعىرۋدىڭ جاڭا كوكجيەكتەرىن اشىپ، ىرگەلى پروتسەستەردى جۇيەلى تۇردە جۇزەگە اسىرۋعا كىرىستىك. جاڭعىرۋ ءۇردىسى نەگىزگى ءۇش سالا – ەكونوميكالىق، ساياسي جانە رۋحاني باعىتتار بويىنشا وربۋدە. بۇل رەفورمالاردىڭ نەگىزىندە ءبىز «قازاقستان – 2050» ستراتەگياسىنداعى ماقساتتارىمىزعا جەتەمىز. ەلدەگى تۇراقتىلىق پەن تىنىشتىقتىڭ، تاتۋلىق پەن بىرلىكتىڭ ارقاسىندا دايەكتى تۇردە بارلىق بيىكتەردى باعىندىرىپ كەلەمىز. كوزدەلگەن جۇمىستاردىڭ قارقىندى ءارى جۇيەلى اتقارىلۋىنا پارلامەنتتىڭ دە قوسقان ۇلەسى زور. وتكەن سەسسيادا ءبىرشاما جەمىستى جۇمىس جاسالدى. پارلامەنت قورجىنىنداعى 111 زاڭ جوباسىنىڭ 84-ءى قارالىپ، قابىلداندى. قازىر ولار كۇشىنە ەنىپ، ەلىمىزدىڭ يگىلىگىنە قىزمەت ەتۋدە»، – دەدى نۇرسۇلتان نازارباەۆ.

وتكەن سەسسياعا باعا بەرگەن ەلباسى قابىلدانعان زاڭ جوبالارىنىڭ ىشىندە «قازاقستان كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» زاڭدى ايرىقشا اتاپ ءوتتى. «دەپۋتاتتاردىڭ بەلسەندىلىگى دە جوعارى دەڭگەيدە، سىزدەردىڭ باستامالارىڭىزبەن 1 جىلدا 15 زاڭ جوباسى دايىندالدى. 17 ۇكىمەت ساعاتى مەن 7 پارلامەنتتىك تىڭداۋ اياسىندا بيلىك تارماقتارى ماڭىزدى ماسەلەلەر بويىنشا قويان-قولتىق جۇمىس ىستەدى. قوس پالاتانىڭ جالپى وتىرىستارى مەن «ۇكىمەت ساعاتتارىنىڭ» ونلاين رەجيمدە ءوتۋى پارلامەنتتىڭ جۇمىسىن اشىق، ءارى حالىققا قولجەتىمدى ەتە ءتۇستى. ءۇشىنشى سەسسيادا وسى جاقسى ۇدەرىستەردى جالعاستىرىپ، قارقىندى، ءارى ساپالى جۇمىس ىستەۋ كەرەك. الدىمىزدا تالاي سۇبەلى شارۋالار تۇر. باستالعان كەلەلى ىستەردى ارى قاراي دا زاڭنامالىق قامتاماسىز ەتۋ قاجەت»، – دەدى پرەزيدەنت.

بيىلدان باستاپ پارلامەنت جاڭاشا قۇزىرەت اياسىندا جۇمىس ىستەيدى. كونستيتۋتسياعا ەنگىزىلگەن تولىقتىرۋلار مەن وزگەرتۋلەر بويىنشا پارلامەنت پەن ۇكىمەت قوسىمشا وكىلەتتىلىكتەر مەن جاۋاپكەرشىلىكتەرگە يە بولدى. ايتسە دە، زاڭ شىعارۋشى تارماقتىڭ السىزدىگى مەن اتقارۋشى بيلىكتىڭ جۇمىسىنداعى كەمشىلىكتەرگە كوز جۇما قاراۋعا بولمايدى. بۇگىنگە دەيىن قابىلدانعان زاڭ جوبالارىنىڭ دەنىن ۇكىمەت دايىنداپ بەرگەنى ءمالىم. پارلامەنت دەپۋتاتتارى زاڭ دايىنداۋدا ەندى عانا باستاماشىلدىق تانىتا باستادى. «بۇگىن پارلامەنت جۇمىسىن جاڭا جاعدايدا باستاعالى وتىر. ويتكەنى پارلامەنت پالاتالارى مەن ۇكىمەت قوسىمشا وكىلەتتىكتەرگە يە بولدى، تيىسىنشە جاۋاپكەرشىلىك تە كۇشەيدى. مەن سىزدەرگە ءبىزدىڭ ماسەلەمىزدى اشىق ايتايىن، مۇمكىن بۇل مەنىڭ كىنام شىعار، بيلىك تارماقتارى تاراپىنان باستاما وتە ءالسىز. وتكەن جولى ۇكىمەتتى وزگەرتكەن كەزدە بۇل ماسەلەنى ايتتىق، قازىر دە جاعداي وسى. ءارى قاراي وسى كۇيىندە جالعاسۋى مۇمكىن ەمەس»، – دەدى پرەزيدەنت.

جاڭا سەسسيادا «كينەماتوگرافيا تۋرالى» دەپ اتالاتىن جاڭا زاڭ قابىلدانىپ، «قازاقستان حالقى اسسامبلەياسى تۋرالى» زاڭىنا وزگەرىستەر مەن تولىقتىرۋلار ەنگىزىلۋى ءتيىس. قوعامدى ءدىن سالاسىنداعى دەسترۋكتيۆتى اعىمداردىڭ تەرىس ىقپالىنان قورعاۋ تەتىكتەرىن ىسكە قوسۋ قاجەتتىگى تۋدى. سوندىقتان مەملەكەت پەن ءدىن قارىم-قاتىناستارىن جەتىلدىرۋ ءۇشىن زاڭنامالىق بازانى قايتا قاراۋ كەرەك.

بيىل پارلامەنتكە جاڭا سالىق كودەكسىنىڭ جوباسى ەنگىزىلەدى. بۇل قۇجات بيزنەستى كولەڭكەدەن شىعارىپ، مەيلىنشە اشىق جۇمىس ىستەۋگە ىنتالاندىرۋى شارت. ونىڭ ىشىندە «ءوزىن-ءوزى جۇمىسپەن قامتۋشى» سانالاتىن 2،7 ميلليون ادامنىڭ تابىسىن ەسەپتەپ، ولارعا سالىق تولەتۋدىڭ جولدارىن قاراستىرۋدى تاپسىردى. بۇعان قوسا، كەدەنگە قاتىستى، ارنايى ەكونوميكالىق جانە يندۋستريالىق ايماقتارعا قاتىستى زاڭنامالار جاڭارتىلۋى قاجەت. جاڭا سەسسيانىڭ جاڭالىقتارىنىڭ ءبىرى – ەلباسى ۇلتتىق بانك قۇزىرەتىن كەڭەيتۋدى ۇسىندى. قارجى سالاسىنداعى باستى رەتتەۋشى بانك باسقالارعا باقىلاۋ جۇرگىزۋ ءۇشىن قوسىمشا تەتىكتەرگە يە بولادى.

«اۋقىمدى مىندەتتەر مەن شەشىمدەر – ءبىزدىڭ 2017 جىلعى جاھاندىق سىن-قاتەرلەرگە جاۋابىمىز. جاڭعىرۋ بارلىق كۇشىمىزدى جۇمىلدىرۋدى قاجەت ەتەدى. جاڭا جاعدايدا بيلىكتىڭ زاڭ شىعارۋ جانە اتقارۋشى تارماقتارى سىندارلى تۇردە ىنتىماقتاسۋعا ءتيىس» دەگەن ن.نازارباەۆ دەپۋتاتتاردى باستاماشىلدىق بەلسەندىلىكتى ارتتىرۋعا ۇندەدى.

ۇقساس جاڭالىقتار

Back to top button