نۇرسۇلتان نازارباەۆ: كوك تۋدىڭ  استىنا بىرىككەن  ءبىرتۇتاس  ۇلتپىز

ەسىلدىڭ جاعالاۋىندا ورنالاسقان قازاقستانداعى ەڭ ۇلكەن تۋتۇعىردا كوك بايراقتى جەلبىرەتۋ ارقىلى استانا كۇنىن مەرەكەلەۋ داستۇرگە اينالعانى بەلگىلى. وسى جورالعى بويىنشا ەلباسى نۇرسۇلتان نازارباەۆ استاناداعى «اتامەكەن» قازاقستاننىڭ كارتاسى» ەتنو-مەموريالدى كەشەنى اۋماعىندا ەلىمىزدەگى ەڭ ۇلكەن تۋدى كوتەرۋ راسىمىنە قاتىسىپ، سالتاناتتى شارا اياسىندا قالا كۇنىن تويلاۋعا ارنالعان مەرەكەلىك باعدارلامالاردىڭ باستالعانىن جاريالادى.

بۇل سالتاناتتى ءىس-شاراعا پرەزيدەنت اكىمشىلىگىنىڭ وكىلدەرى، پارلامەنت دەپۋتاتتارى، ۇكىمەت مۇشەلەرى، مينيسترلەر مەن ۆەدومستۆو باسشىلارى، استانا باسشىلىعى، قالا تۇرعىندارى مەن قوناقتارى – بارلىعى 5 مىڭعا جۋىق ادام شاقىرىلدى. كوپشىلىك الدىندا ءسوز العان ەلباسى ءاربىر قازاقستاندىق ءۇشىن مەملەكەتتىك تۋ ەرەكشە ماڭىزعا يە ەكەنىن ايتىپ، ەلىمىزدىڭ تاۋەلسىزدىك جىلدارىندا ابىرويلى دامۋ جولىنان وتكەنىنە توقتالدى. «ءبىز ەلوردا كۇنى قارساڭىندا مەملەكەتتىك تۋىمىزدى كوتەرۋ ءراسىمىن ءداستۇرلى تۇردە وتكىزىپ كەلەمىز. 25 جىل ىشىندە قازاقستاندى ءبىر تۋدىڭ استىنا بىرىككەن ءبىرتۇتاس ۇلت رەتىندە قالىپتاستىرا الدىق»، – دەدى ەلباسى. نۇرسۇلتان نازارباەۆ قازاقستاننىڭ جاھاندىق تەحنولوگيالىق دامۋدىڭ الدىڭعى شەبىنەن تابىلۋعا ۇمتىلاتىنىن ايتىپ، ەلىمىزدىڭ ەكونوميكا جانە سپورت سالالارىنداعى جەتىستىكتەرىنە دە ەرەكشە نازار اۋداردى.  «قازاقستاننىڭ كوك بايراعى الەمنىڭ كوپتەگەن ءىرى ارەنالارىندا ۇلتتىق جەڭىسىمىزدىڭ سالتاناتىندا جەلبىرەيدى. ءبىز ەلىمىزگە دەگەن شىنايى قۋانىش پەن ماقتانىش سەزىمىنە تولى ساتتەرگە الماتىدا وتكەن قىسقى ۋنيۆەرسيادا ويىندارى بارىسىندا كۋا بولدىق. اسپان تۇستەس كوك تۋىمىزدىڭ استىندا قازاقستان بۇكىل الەمگە تانىلدى»، – دەدى قازاقستان پرەزيدەنتى.

سونداي-اق، ەلباسى قازاقستاننىڭ جاھاندىق ۇدەرىستەرگە بەلسەندى اتسالىسىپ وتىرعانىنا نازار اۋدارىپ، ەلىمىز حالىقارالىق ارەنادا بىتىمگەرشىلىك قىزمەتتى جالعاستىرا بەرەتىنىن ايتتى. «ءبىز قاقتىعىسىپ جاتقان تاراپتاردى كەلىسىمگە كەلىپ، تاتۋلاسۋعا شاقىراتىن مەملەكەتكە اينالدىق. سول ارقىلى بەدەلىمىز دە ارتىپ كەلەدى. ءبىز جەر بەتىندە بەيبىتشىلىك ورناتۋ ءۇشىن كۇرەسىپ، يادرولىق قارۋدىڭ جويىلۋىنا اتسالىسۋدامىز. ءبىز سەنىمگە يە بولىپ، ءبىرتۇتاس ءارى تولەرانتتى قوعامدا ءومىر سۇرۋدەمىز. سوندىقتان مۇندا الەمدىك جانە ءداستۇرلى دىندەر كوشباسشىلارىنىڭ  سەزدەرى وتكىزىلىپ كەلەدى»، – دەدى مەملەكەت باسشىسى. نۇرسۇلتان نازارباەۆ بىرلىك ەلىمىزدىڭ ودان ءارى دامۋىنىڭ جانە الدىمىزعا قويعان بارلىق مىندەتتەر مەن باعدارلامالاردى ىسكە اسىرۋدىڭ نەگىزى ەكەنىن اتاپ ءوتتى.

وسى ورايدا پرەزيدەنت قازاقستاندىقتاردى كەلە جاتقان مەرەكەمەن – استانانىڭ 19 جاسقا تولۋىمەن قۇتتىقتادى. «استانا – مۇمكىندىكتەرىمىزدىڭ، حالقىمىزدىڭ ۇلىلىعى مەن اۋىزبىرشىلىگىنىڭ نىشانى. ەلوردامىز – ورتالىق ازيانىڭ، بۇكىل ازيا قۇرلىعىنىڭ مارجانى. ءبىز باس قالامىزدى سۇيەمىز، ال قوناقتارىمىز وعان تاڭىرقاي قارايدى. استانا كۇنى – بارشا قازاقستاندىقتارعا ورتاق مەرەكە. ءبىز – باقىتتى ۇرپاقپىز! سەبەبى اتا-بابالارىمىز كورگەن سۇراپىل سوعىستار مەن اشارشىلىق زارداپتارى مەن قيىندىقتارىن باستان وتكەرگەن جوقپىز. بۇگىنگى ۇرپاق اتا-بابالارىمىزدىڭ، اعا بۋىننىڭ ارقاسىندا وسى كۇنگە جەتىپ وتىر. ءبىزدىڭ ەندىگى ماقساتىمىز – بىرلىك پەن بەرەكەنى ساقتاۋ. ءبىز الەمدەگى باسەكەلەستىككە توتەپ بەرىپ، تەك جەڭىسكە جەتۋىمىز كەرەك، – دەدى قازاقستان پرەزيدەنتى.

جىل سايىن استانا كۇنى مەرەكەسى قارساڭىندا، مەملەكەتتىك تۋدى بيىك تۇعىرىنا قوندىرۋ ءراسىمى اياسىندا وتان شەبىن قورعاۋعا كىرىسكەن ۇلانداردىڭ ۇزدىكتەرىنە العاشقى اسكەري شەندەرىن تابىس ەتۋ دە داستۇرگە ەنگەن. قازاقتىڭ كوك تۋىن الىپ تۋتۇعىرعا كوتەرۋ ءراسىمى العاش رەت 2009 جىلى وتكىزىلگەن ەكەن. سول كەزدەن بەرى 108 تۇلەككە اسكەري شەن تاپسىرىلىپتى. بيىلعى سالتاناتتى ءراسىم بارىسىندا دا مەملەكەت باسشىسى – قازاقستان قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ ەلىمىزدىڭ جوعارى اسكەري وقۋ ورىندارىنىڭ 12 تاڭداۋلى تۇلەگىنە ءوز قولىمەن العاشقى وفيتسەر شەنىن تاپسىردى. ولار قورعانىس مينيسترلىگىنە قاراستى قۇرلىق اسكەرلەرى اسكەري ينستيتۋتىن، قورعانىس مينيسترلىگىنىڭ راديوەلەكترونيكا جانە بايلانىس اسكەري-ينجەنەرلىك ينستيتۋتىن، ۇلتتىق قاۋىپسىزدىك كوميتەتىنىڭ شەكارا اكادەمياسىن، ىشكى ىستەر مينيسترلىگى اكادەمياسىن، ىشكى ىستەر مينيسترلىگىنىڭ ۇلتتىق ۇلان اسكەري ينستيتۋتىن، ىشكى ىستەر مينيسترلىگىنىڭ كوكشەتاۋ تەحنيكالىق ينستيتۋتىن ءبىتىرىپ وتىر.

قازاقستان پرەزيدەنتى جوعارى اسكەري وقۋ ورىندارىنىڭ بارلىق تۇلەكتەرىنە وتانىمىزعا قىزمەت ەتۋ جانە قازىرگى الەمدەگى ۇدەرىستەر جاعدايىندا ۇلتىمىزدىڭ مۇددەسىن قورعاۋ پارىز ەكەندىگىن ەسكەرتتى. «سىزدەردەن وفيتسەرلىك مىندەتتى مۇلتىكسىز ورىنداۋ تالاپ ەتىلەدى، قاي جەردە بولساڭىزدار دا، تۋىمىزدى قورعاپ، ونى بيىكتە ۇستاۋعا تيىسسىزدەر. سىزدەرگە كۇردەلى ءارى جاۋاپتى ميسسيا جۇكتەلەدى، ول – ازاماتتاردىڭ بەيبىت ءومىر ءسۇرۋىن قامتاماسىز ەتۋ جانە ەلىمىزدىڭ ۇلتتىق مۇددەسىن قورعاۋ»، – دەدى ەلباسى.

شارا سوڭىندا نۇرسۇلتان نازارباەۆ تۋ كوتەرۋ راسىمىنەن كەيىن ەلوردا كۇنى قۇرمەتىنە ارنالعان مەرەكەلىك ءىس-شارالاردىڭ باستالاتىنىن ايتىپ، بارشا  جۇرتتى ايتۋلى مەرەكەمەن قۇتتىقتادى.

ۇقساس جاڭالىقتار

Back to top button