يگەرىلمەگەن 40 ملن تەڭگە ءۇشىن 5 قىزمەتكەر جۇمىستان قۋىلدى

وڭتۇستىك قازاقستان وبلىسىندا 2016 جىلى 40 ميلليون تەڭگە يگەرىلمەگەن، جاۋاپتى قىزمەتكەرلەرگە قاتىستى اكىمشىلىك شارالار قولدانىلدى، دەپ حابارلادى Otyrar.kz جەرگىلىكتى باسىلىمى.

وقو ءماسليحات دەپۋتاتتارىنىڭ دەمالىس الدىنداعى سوڭعى وتىرىسىندا وبلىستىق بيۋدجەت ناقتىلانىپ، 2016 جىلى اكىمدىك پەن رەۆيزيالىق كوميسسيانىڭ بيۋدجەتتى ورىنداۋى بويىنشا ەسەپ بەرۋ تىڭدالدى.

2016 جىلى بيۋدجەت 99،9 پايىزعا ورىندالعان — 484 ميلليارد 726 ميلليون تەڭگەنىڭ 484 ميلليارد 467 ميلليونى يگەرىلگەن، 259 ميلليوننىڭ 218 ميلليونى بەلگىلى سەبەپتەرگە بايلانىستى يگەرىلمەي قالعان. «جەكە سەبەپتەرگە بايلانىستى، مەملەكەتتىك ساتىپ الۋ بويىنشا بايقاۋلار ۋاقىتىلى وتكىزىلمەگەندىكتەن، سونىمەن بىرگە مەردىگەرلەر مىندەتتەرىن ورىنداماعاندىقتان، 40 ميلليون تەڭگە يەگىرلمەدى. 24 ميلليوندى اۋىل شارۋاشىلىعى باسقارماسى يگەرمەگەن، 10 ميلليون — دەنساۋلىق ساقتاۋ باسقارماسى جانە 3 ميلليوندى — قۇرىلىس باسقارماسى»، — دەپ ءتۇسىندىردى وبلىستىق قارجى باسقارماسى باسشىسى كەڭەسبەك مەندەباەۆ.

بولىنگەن قاراجاتتى يگەرۋگە جاۋاپتى قىزمەتكەرلەرگە قاتىستى اكىمشىلىك شارالار قولدانىلدى. شاردارا اۋداندىق تكش ءبولىمى باسشىسى وسپانوۆ، تۇركىستان قالالىق تكش ءبولىمى باسشىسىنىڭ ورىنباسارى ورازبەكوۆ جانە تولەبي اۋداندىق ءبىلىم بەرۋ ءبولىمىنىڭ باس بۋحگالتەرى سوگىس الدى، ال بەس مەملەكەتتىك قىزمەتكەر، ياعني كاسىپكەرلىك باسقارماسىنىڭ باسشىسى قاراباەۆ، ونىڭ ورىنباسارى جانە ەكى ءبولىم باسشىسى جانە تولەبي اۋداندىق ءبىلىم بەرۋ ءبولىمى باسشىسى قىزمەتتەن بوساتىلدى. 663 ميلليون تەڭگە قارىز رەسپۋبليكالىق بيۋدجەتكە قايتارىلدى. وسى اقشا ەسەبىنەن التى كەلىسىمشارتقا سايكەس نەسيە بويىنشا نەگىزگى اقشالاي قاراجات تولىقتاي قايتارىلدى.

ۇقساس جاڭالىقتار

Back to top button