Оқу демалысы кезеңінде кәмелетке толмағандардың қауіпсіздігін қамтамасыз ету мақсатында Астанада полиция ата-аналарға ескерту жасады, деп хабарлайды turkystan.kz.
Демалыс уақытында балалардың бос уақыты көбейіп, достарымен серуендеуге жиі шығатыны белгілі. Осыған байланысты ата-аналардан балаларының қайда жүргенін, кіммен бірге уақыт өткізетінін және үйге қай уақытта оралатынын бақылауда ұстау сұралады.
Қолданыстағы заңнамаға сәйкес, кәмелетке толмағандардың заңды өкілдерінің еріп жүруінсіз түнгі уақытта ойын-сауық орындарында сағат 22:00-ден таңғы 06:00-ге дейін болуына тыйым салынады.
Аталған талаптарды бұзған жағдайда ата-аналар немесе заңды өкілдер заңнамада көзделген жауапқа тартылады.
Полиция қызметкерлері демалыс уақытында кәмелетке толмағандар арасындағы құқық бұзушылықтардың алдын алу және балалардың қауіпсіздігін қамтамасыз ету бағытындағы профилактикалық жұмыстарды жалғастырады.
Полиция ата-аналарды балалардың бос уақытын тиімді ұйымдастыруға, олардың түнгі уақытта қараусыз жүруіне жол бермеуге және қауіпсіздігіне ерекше көңіл бөлуге шақырады.
