Ыстамбұлда нөсер жауын мен қолайсыз ауа-райына байланысты мотоциклдердің қозғалысына тыйым салынды, деп хабарлайды turkystan.kz.
Қала билігінің шешіміне сәйкес, 15 қазанда қаладағы барлық мемлекеттік және жеке білім беру мекемелерінде бір күнге дәстүрлі форматтағы оқу сабақтары тоқтатылды.
Сонымен қатар мемлекеттік мекемелердің жекелеген санаттағы қызметкерлері әкімшілік демалыс мәртебесін сақтай отырып, жұмыстан босатылды. Бұл шара мүгедектігі бар адамдарға, жүкті әйелдерге, ардагерлерге және сегіз жасқа толмаған балалары бар әйелдерге қатысты қолданылады.
Алайда соңғы санаттағы қызметкерлерге қатысты денсаулық сақтау, полиция және табиғи апаттардың салдарын жою қызметтерінде ерекшеліктер қарастырылған. Ал сегіз жасқа толмаған мүгедектігі бар балаларды тәрбиелеп отырған әйелдер қызмет саласына қарамастан жұмыстан босатылады.
Сондай-ақ 14 қазан сағат 21:00-ден бастап арнайы өкім шыққанға дейін мотоциклдер мен осыған ұқсас басқа да екі доңғалақты көлік құралдарының қозғалысына тыйым салынды.
Қабылданған шаралар қолайсыз ауа райының салдарын азайтуға және қала тұрғындарының қауіпсіздігін қамтамасыз етуге бағытталған.
Бұған дейін нөсер жауын салдарынан Ыстамбұл көшелері мен тұрғын үйлерді су басқаны хабарланған болатын. Су ағындары көліктерді ағызып әкетіп, кейбір жол учаскелерінде автомобильдер жүре алмай қалған.
