Ақмола облысында пойыз 13 бас малды қағып кетті, деп хабарлайды turkystan.kx Көліктегі полиция департаментінің баспасөз қызметіне сілтеме жасап.
Жыл басынан бері Көліктегі полиция департаментінің қызметкерлері пойыздардың шұғыл тежеуіне қатысты 1005 фактіні тіркеген. Оның 746 жағдайы, яғни жартысынан астамы, ауыл шаруашылығы жануарларының теміржол жолдарына шығуымен байланысты. Бұл туралы Көліктегі ПД бастығының орынбасары Құрмет Мәжікенов мәлімдеді.
Оның айтуынша, кезекті оқиға 13 қыркүйекте Ақмола облысындағы Макинка – Елтай аралығында болған.
"Петропавл - Алматы" бағытындағы жолаушылар пойызының машинисі теміржол жолында ұсақ малдың жүргенін байқап, шұғыл тежеуге мәжбүр болған. Қабылданған шараларға қарамастан, пойыз 13 бас малды қағып кеткен. Соның салдарынан пойыз қозғалысы 9 минутқа тоқтатылды.
"Көлік полицейлері жануарлардың иесі – Ақмола облысының 63 жастағы тұрғынын анықтады. Теміржолдың бөлінген жолағында мал жаю қағидаларын бұзғаны үшін азамат әкімшілік жауапкершілікке тартылды", - деді полиция полковнигі.
Көліктегі полиция департаменті теміржол жолдарына жақын жерде малды бақылаусыз жаю пойыздардың қозғалысы мен жолаушылардың қауіпсіздігіне елеулі қауіп төндіретінін ескертеді.
Малға иелері белгіленген талаптарды сақтап, теміржолдың бөлінген жолағында жануарлардың жүруіне жол бермеуі және оларды қараусыз қалдырмауы қажет.
