Достарымен және жақын адамдарымен қарым-қатынасына көңілі толатын азаматтар өзінің психикалық және физикалық денсаулығын жоғары бағалайды. 22 елдегі 200 мыңнан астам адамның дерегін қамтыған ауқымды зерттеу осындай байланысты көрсетті, деп хабарлайды turkystan.kz.
Journal of Mental Health журналында жарияланған зерттеуді Түркиядағы Күтаһия денсаулық ғылымдары университетінің ғалымы Вели Дурмуш жүргізген. Ол Global Flourishing Study жобасына қатысқан 18 жастан асқан 204 907 адамның жауабын талдады. Зерттеу Ұлыбритания, АҚШ, Аустралия, Аргентина, Бразилия, Германия, Испания, Үндістан, Жапония, Мысыр, Нигерия, Оңтүстік Африка және Мексиканы қоса алғанда, 22 мемлекетті қамтыды.
Сауалнамаға қатысушылар достарымен және жақындарымен қарым-қатынасына қаншалықты риза екенін бағалады. Сондай-ақ олардан балалық шағында ата-анасымен қарым-қатынасы қандай болғаны, қазіргі психикалық және физикалық денсаулығын қалай бағалайтыны сұралды. Нәтижелерді саралау кезінде табыс, білім және басқа да әлеуметтік жағдайлар ескерілді.
Талдау достық пен жақын қарым-қатынасқа қанағаттану деңгейі жоғары адамдардың психикалық және физикалық саулығын да жақсырақ бағалайтынын көрсетті. Балалық шақта ата-анасымен жақсы қарым-қатынаста болғандар арасында да осыған ұқсас байланыс байқалғанымен, оның ықпалы ересек кездегі әлеуметтік қатынастарға қарағанда әлсіздеу болды.
Зерттеушінің айтуынша, жақын қарым-қатынас күйзелісті еңсеруге, адамның өзін бағалауына және эмоциясын басқаруына көмектеседі. Сонымен бірге адамның әлеуметтік ортасы өмір бойы өзгеріп отырады. Сондықтан достық, серіктестік және басқа да байланыстар балалық шақтағы тәжірибенің ықпалын күшейтуі немесе өзгертуі мүмкін.
Зерттеу жас ерекшеліктеріне байланысты айырмашылықтарды да анықтады. 35 жастан 49 жасқа дейінгі адамдардың психикалық денсаулық көрсеткіштері 18-34 жастағыларға қарағанда төмен болған. Ал 65 жастан асқан қатысушылардың көрсеткіші жоғары шыққан. Некеде болу, жеткілікті табыс және өзін белгілі бір дінге жатқызу, әсіресе ислам дінін ұстану психикалық және физикалық денсаулықты жоғары бағалаумен байланысты болған.
Елдер арасында да елеулі айырмашылық байқалды. Индонезия тұрғындары достық пен жақын қарым-қатынасқа қанағаттану бойынша ең жоғары нәтиже көрсетсе, ең төмен көрсеткіш Жапонияда тіркелген.
Зерттеу авторы әлеуметтік байланыстарды қоғамдық денсаулық сақтау саясатының маңызды бөлігі ретінде қарастыру қажет деп есептейді. Дегенмен зерттеу достықтың денсаулықты тікелей жақсартатынын дәлелдемейді. Қорытынды қатысушылардың өз бағасына негізделгендіктен, ол жақын қарым-қатынас пен жақсы денсаулықтың арасында байланыс бар екенін ғана көрсетеді.
