Алматылық «Қайрат» UEFA Чемпиондар лигасының екінші іріктеу кезеңінде Кипрдің «Омония» клубын жеңіп, турнирдің келесі сатысына жолдама алды, деп хабарлайды turkystan.kz.
Қарымта кездесу Алматыда өтіп, алаң иелері алғашқы минуттардан-ақ шабуылға ден қойды. Кездесудің 37-минутында Эдмилсон есеп ашып, командасын алға шығарды.
Айта кетейік, алғашқы ойында «Қайрат» сырт алаңда 0:1 есебімен жеңілген болатын. Сондықтан негізгі уақыттағы 1:0 есебі екі матчтың қорытындысы бойынша таразы басын теңестірді.
Қосымша уақытта да командалар жеңімпазды анықтай алмады. Нәтижесінде жолдама тағдыры пенальти сериясында шешілді. Бұл сында алматылық клуб 7:5 есебімен басым түсіп, UEFA Чемпиондар лигасының үшінші іріктеу кезеңіне өтті.
Енді «Қайрат» келесі кезеңде Болгарияның «Левски» және Румынияның «Университатя» Крайова клубтары арасындағы жұптың жеңімпазымен кездеседі. Аталған қарсыластардың алғашқы матчында «Левски» 1:0 есебімен жеңіске жеткен.
