Тараз қаласының әкімшілік құқық бұзушылықтар жөніндегі мамандандырылған соты лицензиялау нормалары мен есірткі айналымы саласындағы объектілерді техникалық нығайту талаптарын бұзу фактісі бойынша Медициналық клиникаға қатысты 2 істі қарады, деп хабарлайды turkystan.kz.
Медициналық ұйым жекелеген лицензиялық талаптарды, сондай-ақ есірткі құралдарын сақтауға арналған үй-жайларды техникалық нығайтуға қойылатын талаптарды сақтамағаны анықталды. Тексеру тәулік бойы күзеттің, күзет дабылы жүйесінің және үй-жайларды қажетті техникалық жарақтандырудың жоқтығын анықтады.
Сотта клиника өкілі кінәні мойындады, барлық бұзушылықтар толығымен жойылғанын хабарлады және мекеменің жұмысын тоқтатпауды сұрады, өйткені бұл пациенттерге тәулік бойы медициналық көмек көрсетуге кері әсерін тигізеді.
Сот қаулысымен клиника екі бап бойынша кінәлі деп танылып, оған тиісінше 346 мың және 216 мың теңге көлемінде айыппұл тағайындалды.
