Ингушетияда Сунжа өзеніндегі оқиғадан кейін бірнеше күн бойы іздестірілген 8 жастағы Хизир Дербичевті іздеу жұмыстары аяқталды. Баланың денесі іздеу-құтқару операциясының сегізінші тәулігінде табылды, деп хабарлайды turkystan.kz.
Республика үкіметінің мәліметінше, Хизирдің денесі 22 маусым күні жергілікті уақытпен 16:50-де анықталған. Осыдан кейін Төтенше жағдайлар министрлігі іздеу-құтқару жұмыстарының аяқталғанын ресми түрде хабарлады. Оқиғаның мән-жайы нақтыланып жатыр.
Қайғылы жағдай 15 маусым күні болған. БАҚ мәліметінше, Хизир Сунжа өзенінің жағасында екі досымен бірге жүрген. Сол кезде балалардың бірі, Адам, суға құлап кетіп, ағаш бұтағына немесе тамырына жармасып үлгерген.
Хизир досына көмектесу үшін суға секірген. Алайда өзі қатты ағысқа төтеп бере алмай, оны су алып кеткен. Үшінші бала ересектерді көмекке шақыруға жүгірген. Нәтижесінде Адамды құтқарып қалған.
Бұл оқиға қоғамда үлкен резонанс тудырды. Хизирді көпшілік кішкентай батыр деп атап жатыр. Адамдар оның небәрі 8 жасында ересек адамдай әрекет етіп, қорықпай досын құтқаруға ұмтылғанын жазуда.
Куәгерлердің айтуынша, Хизир өзенге секірер алдында: "Қане, біз еркекпіз ғой, оны құтқарайық", – деген.
Хизирді іздеуге мыңдаған адам қатысты. Іздеу жұмыстарына құтқарушылар, еріктілер, жергілікті тұрғындар, сондай-ақ Шешенстан, Дағыстан, Солтүстік Осетия, Кабардино-Балқария және Қарашай-Шеркесиядан келген еріктілер қосылды.
Іздеу тобы Сунжа өзенінің арнасын, жағалауын және оған жақын аумақтарды тексерді. Жұмыстарға ауа райы да кедергі келтірді. Жауыннан кейін судың деңгейі көтеріліп, ағыс күшейген.
