Зеренді ауданының прокуратурасы ветеринариялық қауіпсіздікті қамтамасыз ету жұмыстарының тиісті деңгейде жүргізілмегенін анықтады, деп хабарлайды turkystan.kz.
Мал басының есебін жүргізуде нақты деректердің жоқтығы анықталды. Полицияның учаскелік инспекторларымен бірлескен іс-шаралар барысында жалпы саны 7 мыңнан асатын 57 тіркелмеген жылқы табыны анықталды.
Сондай-ақ эпизоотияға қарсы іс-шараларды жүргізу кезінде заң бұзушылықтар анықталды: ветеринариялық дәрігерлер вакцинация актілеріне жалған мәліметтер енгізіп, оның ішінде жоқ жануарларды көрсеткен және бір мал басын бірнеше рет есепке алған.
Жалпы саны 2,8 мың жалған вакцинация фактісі анықталды, мемлекеттік бюджетке 996,2 мың теңге сомасына шығындар өтелді.
Аудандағы 14 мал қорымы ветеринариялық талаптарға сәйкес келмейді — қоршаулары жоқ, жер учаскелері рәсімделмеген және балансқа қойылмаған.
Сонымен қатар ветеринариялық станцияда 6 млн теңгеден астам сомаға негізсіз сыйақы мен үстемақы есептеу фактілері анықталды, қазіргі уақытта оның 4 млн теңгеден астамы бюджетке қайтарылды.
Прокурорлық қадағалау актілері бойынша кінәлі лауазымды тұлғалар тәртіптік және әкімшілік жауапкершілікке тартылды, заң бұзушылықтарды жою шаралары қабылдануда.
