Ғалымдар қағаз өндірісінен шығатын қалдықтарды қайта өңдеп, жаңартылатын отын алуға болатынын анықтады. Зерттеу барысында мамандар целлюлоза-қағаз өндірісіндегі тұнбаның үш түрін зерттеп, олардың қайсысы биоэтанол, ал қайсысы биогаз өндіруге тиімді екенін бағалаған, деп хабарлайды turkystan.kz.
Жыл сайын целлюлоза-қағаз саласында шамамен 500 миллион тоннаға дейін ылғалды қағаз шламы түзіледі. Әдетте мұндай талшықты қалдықтар қоқыс полигондарына жіберіледі. Бұл метанның бөлінуіне және судың ысырап болуына әкеледі.
Зерттеу нәтижелері Biofuels, Bioproducts and Biorefining журналында жарияланды. Ғалымдар қағаз қалдықтарының үш негізгі түрін талдаған: бастапқы целлюлоза тұнбасы, гофрленген картон қалдығы және қағаз бұйымдары мен баспа қағазын өндіруден қалған шлам.
Әр үлгінің химиялық құрамы, ферменттік ыдырауы және ашыту процесіндегі тиімділігі зерттелген. Нәтижесінде қалдықтардың қасиеттері бір-бірінен едәуір ерекшеленетіні анықталды.
Бастапқы целлюлоза тұнбасы биоэтанол өндіруге ең қолайлы материал болып шыққан. Ал гофрленген картон қалдықтары биогаз бен метан өндіруде ең жоғары өнімділік көрсеткен.
Зерттеу авторлары мұндай технология қоқыс көлемін азайтып қана қоймай, қазба отындарының орнына тұрақты балама ұсына алатынын айтады. Сонымен қатар қағаз өндірісіндегі әртүрлі қалдық түрлерін тиімді пайдалану болашақта айналымды биоэкономика жүйесін дамытуға мүмкіндік береді.
