Esil University жастар арасында салауатты өмір салтын насихаттау және нашақорлықтың алдын алу мақсатында «Астана – есірткісіз қала!» акциясын өткізді. Жиынға спортшылар, медиа тұлғалар, сарапшылар мен студенттер атсалысты.
Іс-шараның мақсаты – студенттердің дұрыс өмірлік ұстанымын қалыптастыру, есірткі қолдануға қарсы айқын көзқарас қалыптастыру, саналы, қауіпсіз және салауатты таңдау мәдениетін дамыту.
Жиында жеті мәрте Гиннестің рекордтар кітабына енген Сергей Цирульников, әлем чемпионы Мерей Ақшалов, театр мен кино актері Әділ Ахметов, танымал блогер Нұргелді Кердеш (Dragon) қатысушылармен ашық әңгіме жүргізіп, жастарға мотивация берді. Қонақтар өз өмір жолдары туралы баяндап, студенттердің сұрақтарына жауап берді. Адам есірткісіз өмірді саналы түрде таңдай алатыны және белсенді өмірлік ұстанымның маңыздылығы туралы да айтылды. Сергей Цирульников өзінің өнерін паш етіп, студенттермен бірге тағаны бүгуді көрсетті.
Арнайы жедел әрекет ету жасағы жауынгерлері қару-жарақ пен кәсіби дағдыларын көрсетті. Бұл қатысушылардың ерекше қызығушылығын тудырды. Олар қылмыскерді ұстау тәсілдері мен тактикалық әрекеттерді көрсетті. Сонымен қатар кинологтар қызметтік иттермен көрсетілім жасап, тыйым салынған заттарды іздеу шеберліктерімен таныстырды.
Астана қаласы Есірткіге қарсы күрес басқармасының қызметкері, полиция подполковнигі Дамир Байбазаров бөлімнің қызметі туралы айтып, студенттермен құқықбұзушылықтардың алдын алу бойынша интерактивті сессия өткізді.
– Бүгін саламатты қоғамның негізі саналатын жастар алдында Арнайы жедел әрекет ету жасағының (СОБР) жауынгерлері ел арасында «закладчик» аталып кеткендердің ізін кесу, есірткі жасырылған орындарды іздеп табу бағытында жасалатын қырағы қадамдарын нақты көрсетті. Осындай жүйелі әрекеттердің арқасында қылмыс бүгін немесе ертең ашылатынын жастар аңдамай жатады. Сондықтан осы іске барудың салдарын көз алдарында көрсеттік. Алдымен өзін, ата-анасын ойлайтын саналы жас есірткіге әуестенбеуі керек, – деп түсіндірді Дамир Байбазаров.
Акция аясында студенттер тақырыптық бейнероликтер көріп, нарколог дәрігердің дәрісіне қатысты, шақырылған спикерлермен ашық пікірталас жүргізді. Нашақорлармен жұмыс және психоактивті заттарды қолданудың салдары туралы дәрігер-наркологтар Назым Омарова мен Русалина Молдахметова таныстырды. Мамандар студенттерге тәуелділіктің пайда болу себептері мен салдары туралы айтып, салауатты өмір салтын таңдап, есірткіден бас тартуға шақырды.
Акция жастар арасында есірткіге қарсы тұрақты қоғамдық иммунитет қалыптастыруға бағытталған. Биыл жыл басынан бері Кеңес мүшелерінің қатысуымен профилак-тикалық іс-шаралар тұрақты өткізіліп келеді. Сонымен қатар ерікті жастардың қатысуымен қала аумағынан 2 500-ден астам наркограффити жойылған. Полиция өкіл-дері есірткі қылмысының алдын алу – бүкіл қоғамның ортақ міндеті екенін атап өтті.
Елорда жастары профилактикалық жұмысқа белсенді түрде қатысып, салауатты әрі қауіпсіз өмір салтын таңдауға дайын екенін көрсетіп отыр.
Акция жастардың дұрыс құндылықтарды қалыптастыруда, құқықтық сананы нығайтуда және жас ұрпақтың жауапкершілігін арттыруда шешуші рөл атқаратынын дәлелдеді. Құқық қорғау органдары жастарды есірткі қаупінен қорғауға, құқықтық сананы нығайтуға және өз болашағы үшін жауапкершілікті арттыруға бағытталған профилактикалық жұмыстарды жүйелі жүрде жалғастыра береді.
А.БИМЕНДІ
