АҚШ-та тұратын ливиялық Мұхаммед Бзик ауыр дертке шалдыққан жетім балаларды асырап алумен танылды, деп хабарлайды turkystan.kz.
Калифорния штатының Лос-Анджелес қаласында өмір сүріп жатқан 70 жастағы Мұхаммед Бзик — түбі сириялық, тегі ливиялық азамат. Ол 1980-жылдары АҚШ-қа қоныс аударып, сол кезден бері тағдыр тәлкегіне түскен, өмірінің соңғы кезеңін өткізетін жетім балаларды қамқорлығына алып келеді.
Мейірімді жан бұл іспен марқұм әйелі Донна Бзик екеуі 1989 жылдан бастап айналысқан. Алғашында дені сау балаларды асырап алған ерлі-зайыптылар кейін ешкім қамқор болғысы келмейтін, ауыр дертке шалдыққан балаларды өз үйлеріне қабылдай бастаған.
Донна Бзик қайтыс болғаннан кейін Мұхаммед игі істі тоқтатпай, жалғыз өзі 30-дан астам балаға әке атанды. Олардың көбі дүниеден ерте өтсе де, ол әрқайсысына отбасы жылуын сезінуге мүмкіндік берген.
> «Бұл балалардың көбі ешқашан өз отбасын көрмейді. Мен олардың соңғы күндері сүйіспеншілікке толы үйде өткенін қалаймын», – дейді Мұхаммед Бзик.
Оның мейірімді еңбегі әлем жұртшылығын тәнті етті. 2017 жылы Мұхаммед Бзик Лос-Анджелес қалалық кеңесінің “Мейірім иесі” марапатына ие болды. Сондай-ақ ол CNN Heroes жобасында “күнделікті қаһарман” деп танылған.
көпшілік Мұхаммед Бзикті тірі періште деп атайды, себебі ол өз өмірін ауыр науқас жетім балаларға арнап, олардың соңғы күндерін махаббат пен қамқорлыққа толы ортада өткізуге мүмкіндік беріп келеді.
Қазір Мұхаммед Бзик денсаулығына байланысты қиындықтарға қарамастан, тағы бір ауыр дертке шалдыққан баланы бағып отыр.
